ވައިބަރ ފަދަ މަންސާތަކުގައިވާ ކަށުނަމާދު ޕޭޖަށް ވަދެ ފިކުރުކޮށްލާ ފުންކޮށް ވިސްނާލާށެވެ.
އެތަނުން އެފެންނަ އެކި ޢުމުރު ފުރައިގެ ތަފާތު މޫނުތަކާއިމެދު، އެމީހުންގެ ޙަޔާތާއިމެދު ޚިޔާލުކޮށްލާށެވެ.
ކިހާ ފޮނި އުއްމީދުތަކަކާއި، ޢާއިލާއާއި ރައްޓެހިންނާއި، މުދަލާއި މަޤާމުތަކާއި ވަޒީފާތަކުގައި އެމީހުން އުޅުނުހެއްޔެވެ؟
ހަމަ ތިބާ ފަދައިން ފޯނުން ފޭސްބުކުފަދަ ތަންތާގައި އެމީހުންވެސް ވާހަކަދައްކާ، މިވާހަކަތައް ކިޔާ، ހިނގާބިގާވެ ދުއްވާ މި ބިންމަތީގައި އުޅުނު ބައެކެވެ.
ކުޑަކޮށް މައްޗަށް ހައެއްކަ މަސް ކުރިއަށް ސުކުރޯލުކޮށްލާށެވެ.
އެހެރަ ފެންނަ އެއްވެސް މޫނެއްގެ އަސަރެއް ޒިކުރާއެއް މިހާރު މިދުނިޔެމަތީގައި ވޭހެއްޔެވެ؟
ހަމަ ތިބާއާ އެއްނަމެއް ކިޔާ، ނުވަތަ ތިބާގެ މައިންބަފައިންގެ ނަމުން ނަންކިޔާ ބަޔަކުވެސް އެތަނުން ފެންނަން ހުރުން ޢިބްރަތަކަށް ނުފުދޭހެއްޔެވެ؟
މާދަމާ އެތަނުގައި ފަވާލެވޭނީ ތިބާގެ ލޯބިވާ މައިންބަފައިންގެ ނަންކަމެއް، ނުވަތަ ޚުދު ތިބާގެ ނަންކަމެއްވެސް ނޭނގެއެވެ. ހަމަ ކުއްލިއަކަށް ނުވެސް ދެނެހުއްޓައެވެ.
ދުވަސްނިމި އަނެއް ދުވަސް، މަސް ނިމި އަނެއް މަސް، އަހަރު ނިމި އަނެއް އަހަރު ފެށިގެންދަނީއެވެ. މިއަދުގެ މަރުގެ ލިސްޓުގައި، ނުވަތަ މިމަހުގެ މަރުގެ ލިސްޓުގައި، ނުވަތަ މި އަހަރުގެ މަރުގެ ލިސްޓުގައި ތިބާއާއި ތިބާގެ ގާތްތިމާގެ އެތައްބަޔަކުގެ ނަން ނުހިމެނޭކަމުގެ ގެރެންޓީއެއް ދޭނެ އެއްވެސް މީހަކު ހަމަހިލާ ނުހުންނާނެެވެ.
ވީމާ، ﷲ ގެ ޙަޟްރަތަށް އަވަހަށް ރުޖޫޢަވާށެވެ. އެންމެ ހިނދުކޮޅަކަށްވެސް ލަސްނުކުރާށެވެ. ދުނިޔަވީ ޒީނަތްތަކާއި، ވަޒީފާއާއި މުދަލާއި އަރާމަށް ގެނބިގެން، ބޭކާރު ޒުވާބުތަކާއި އަނގަތެޅުންތަކުގައި ދުވަސްތައް ފާއިތުވިޔަ ނުދޭށެވެ.
ތިބާ މި ދުނިޔެއަށް ފޮނުވުނު މަޤްޞަދު، އަދި ހަމައެކަނި ތިބާއަށް ސަލާމަތްވެެވެން އޮތް މަގު ދެނެގަތުމަށްޓަކައި، އަދި އެގޮތުގައި ޘާބިތުވުމަށްޓަކައި ގަދައަޅާ މަސައްކަތްކުރާށެވެ.
ﷲ ތަޢާލާގެ ރުއްސެވުން ލިބިފައިވާ ޙާލުގައި މެނުވީ، އަޅަމެންގެ މަރުނުގަންނަވާށިއެވެ! އާމީން.
