އުއްމަތުގެ ޖީލުތަކަށް އެނގުން މުހިއްމު ތާރީޚުގެ ޞަފްޙާތަކުން
ފަލަސްޠީނު، ފަލަސްޠީނުގެ ގޮތުގައި މުސްލިމް ބިމެއްގެ ގޮތުގައި އޮންނަތާ އެތައް ޤަރުނެއްވަނީ ވެފައެވެ. ޞަލީބީ ބައެއް ހަނގުރާމަތަކުގައި ފަލަސްޠީނުގެ ބައެއް ބިންތައް އެމީހުންގެ އަޅުވެތިކަމުގައި އަހަރުތަކެއް ހޭދަކުރިއެއްކަމަކު ފަލަސްޠީނަކީ މުސްލިމުންގެ ބިމެކެވެ.
މިހިސާބުން ތާރީޚަށް ބައްލަވާށެވެ.
މީލާދީން 1800 ގެ ކުރީގައިވެސް ފަލަސްޠީނު އެގޮތުގައި މުސްލިމް ބިމެއްގެ ގޮތުގައި އޮތެވެ. ނަމަވެސް އޭރު ޔަހޫދީންތައް ކޮބައި ހެއްޔެވެ؟ އެބައިމީހުން އުޅެމުން އައީ ކޮންތަންތާކު ހެއްޔެވެ؟ އޭރުގައި އިސްރާއީލޭ މިކިޔޭ ދައުލަތް ކޮބައި ހެއްޔެވެ؟ ހަމައެކަނި ޗާޓުގައި ނެތީއެއްވެސް ނޫނެވެ. ވުޖޫދުގައިވެސް ނެތެވެ. ޔަހޫދީންވީ އެބައިމީހުންގެ މައްޗަށް ޤުރުއާނުގައިވާ ތީހުގެ ޢުޤޫބާތް ލިޔެވުނުފަދަައިން އަދި ނިކަމެތިކަމާއި ކުޑަކަން ލިޔެވުނު ފަދައިން ނިކަމެތިޙާލެއްގައެވެ.
އެގޮތުން އެންމެ ފުރަތަމަ ޔަހޫދީންނަށް ދައުލަތެއް ބިނާކުރުމުގެ ޚިޔާލު ވެރިންގެ ލެވެލްގައި ހުށައެޅި ވެރިއަކީ އޭރުގެ ފްރާންސް އިސްތިޢުމާރީގެ ވެރިއެއްކަމަށްވާ "ނަޕޯލިއަން" އެވެ. އެއީ 1799 މ. ހިސާބުގައި އޭނާ މިޞްރާއި ސޫރިޔާ އަޅުވެތިކުރި ދުވަސްވަރުގައެވެ.
ދެން އެއަށްފަހު އިނގިރޭސިވިލާތުގެ ފޮރިން މިނިސްޓަރުކަން ތަކުރާރުކޮށް ކޮށްފައިވާ "ހެންރީ ޖޯން ޓެމްޕަލް" ނުވަތަ (ލޯރޑް ޕަލްމަސްޓަން) ބްރިޓިޝްގެ ބޮޑުވަޒީރުކަމަށް އައިސް 1838 މ. ގައި ފުރަތަމަ ފަހަރަށް ބްރިޓިޝްގެ ކޮންސިޔުލޭޓްއެއް ޤުދުސްގައި ޤާއިމްކުރިއެވެ. އަދި އޭނާގެ ޒަޢާމަތުގައި ޔަހޫދީން، ފަލަސްޠީނުގައި ވަޒަންވެރިވުމުގެ ހުއްދަ ރަސްމީ ސިފައެއްގައި ދޭންފެށިއެވެ. އަދި 1880 މ. އާއި ހަމައަށް އައިއިރު 22 ވަރަކަށް ޔަހޫދީން ވަނީ ފަލަސްޠީނުގެ ދަނޑުބިންތަކުގައި ވަޒަންވެރިވެފައެވެ. އޭގެ ތެރޭގައި ބައެއް ބިންތައް އެބައިމީހުން ގަތްކަމަށް ވެއެވެ. އަދި ބައެއް ބިންތައް ދިގުމުއްދަތަކަށް ކުއްޔަށް ނެގިއެވެ. އަދިވެސް އިސްރާއީލޭ މިކިޔުނު ދައުލަތް ވުޖޫދަކު ނެތެވެ. އެގޮތުގައި ގޮސް މުސްލިމުންގެ ޚިލާފަތް ވައްޓާލިއިރުވެސް ޔަހޫދީންނަށް ބިންމަތީގައި ދައުލަތެއް ނެތެވެ.
އިސްރާއިލަށް ދައުލަތެއްގެ ސިފަ ލިބި ޤައުމުތައް އެބައިމީހުން ބަލައިޤަތީ 1948 މ. ހިސާބުގައެވެ. އޭގެ ކުރީގާއި އިސްރާއީލަކީ ނެތްތަނެކެވެ. ވެރިވެގަނެގެން އެއުޅެނީ ބައެއްގެ ބިމަކަށެވެ. ފޭރެމުން އެދަނީ މުސްލިމުންގެ މުދާތަކާއި ބިންތަކެވެ.
ވީއިރު ޔަހޫދީންނަށް، ތަންތަން ފޭރި ލޫޓުވުމަކީ ޙައްޤެއްކަމަށް، މިއަދު ދުނިޔޭގެ ޤާނޫނު ކަމަށްވާ އެމެރިކާ އާއި ޔޫ.އެން ކަނޑައަޅައި ހުޅަނގުން އެއަށް ވާގިދިނަސް، އިސްލާމީ އުއްމަތަށް އެބައިމީހުންގެ ޙަޤީޤީތް އޮޅިގެންނުވާނެއެވެ. އަދި މިއަދު އިސްލާމީ އުއްމަތުގެ ވާޖިބަކީ ހުޅަނގުގެ މި އިސްތިޢުމާރީން މިންޖުވުމަށްޓަކައި ފާޅުގައި ތެދުވުމެވެ. މުސްލިމުން، މުސްލިމުންގެ ޙައްޤުތައް ހޯދުމަށް ބަޔަކުގެ (ޕަޕެޓުވެރިންގެ) ގާތަށް ދިޔުމުގެ ބަދަލުގައި، އެކަމަށް އަމިއްލައަށް ނިކުތުމެވެ. އަދި އިސްތިޢުމާރީންގެ ލާބަޔާ މަންފާއާއި ގުޅިފައިވާ އެންމެހާ ކަންކަމެއް ނިމުމަކަށް ގެނައުމެވެ. އަޅުގަނޑުމެންގެ ބިންތަކާއި އެބިންތަކުގައިވާ މުއްސަނދިކަން ހުޅަނގުގެ އިސްތިޢުމާރީ ވަކިތަކުން މިންޖު ކުރުމެވެ.
ދެކޭށެވެ. މުސްލިމުންގެ ބިންތަކުގައި އެންމެހާ ޤުދުރަތީ މުއްސަނދިކަމެއް ވާއިރު ދުނިޔޭގެ އެންމެ ފަޤީރުބައެއްގެ ގޮތުގައި މުސްލިމުން އޮންނަ އޮތުން އެއީ އިއްތިފާގެއް ހެއްޔެވެ؟ ނުވަތަ ބައެއްގެ މަކަރާއި ޙީލަތް ހެއްޔެވެ؟
