ޝަހުވަތްތަކަކީ ދީނާއިމެދު ޝައްކުކޮށް ނަފްރަތު ކުރުމަށް ގެންދާ މަގުފާލަމެކެވެ.
ހަވާނަފްސުގެ އެދުމަށް އިޖާބަދީ ވަކި ފާފައެއް ކުރުމުގައި ދެމިހުންނަ މީހާ، އެކަމެއް އެއީ ހުއްދަ، އޯކޭ ކަމެއްކަމުގައި ޤަބޫލުކުރުމަށް ޝައިޠާނާ އެމީހެއްގެ ނަފްސަށް ވަސްވާސްލައިދެއެވެ.
އެއީ ޙަރާމްކަމެއް ކަމުގައި ދެކިގެން ކުރާތީވެ، ނަފްސުގައި އޮންނަ ކުއްވެރިވާކަމުގެ ދަތި އިޙްސާސް ކުރެވުން ކަނޑުވާލުމަށްޓަކައިއެވެ.
ދެން އޭނާ ހިފާނީ ތަފާތު އެކި ޝުބުހަތަކާއި ޝައްކުތައް ބޭނުންކޮށްގެން އެފާފައެއްގެ ބޮޑުކަމާއި ނުބައިކަން ކުޑަކޮށްލުމަށެވެ. އަދި އެހެން ފާފަތަކާއި އަޅާކިޔާ އޭނާ އެކުރާ ކަންތައް މާބޮޑު ނޫންކަމުގައި ވިސްނައިދެއެވެ.
ދެން މަރްޙަލާތައް ކަޑައްތުކުރަމުން ގޮސް، ހާމަކަންބޮޑު އެފާފައަކީ ހުއްދަ ކަމެއްކަމުގައި އޭނާ ދެކެއެވެ.
އެހިސާބުން އޭނާ އެބަދަލުވީ ފާފަވެރި މުސްލިމެއްގެ މަޤާމުން، ދާއިމީ ހަލާކުގެ ތެރޭގައި އޮންނާނޭ ކާފަރެއްގެ މަޤާމަށެވެ.
މިއަދުގެ މުޖްތަމަޢަށް ނަޒަރު ހިންގާލާއިރު، ދީނުގައި ކަނޑައެޅިގެން އެންމެންނަށް އެނގިގެންވާ ކަންކަން ކަމުގައިވާ އަންހެނުން ޢައުރަ ނިވާކުރުމާއި، ހިލޭ ފިރިހެނުންނާއި އަންހެނުން ގައިގޯޅިވެ، ރައްޓެހިވުމުގެ ނަމުގައި އެކުގައި އުޅޭއުޅުން، އިންޓަރަސްޓުގެ ނަމުގައި ރިބާ ނެގުންފަދަ ކަންކަން، މިކަންތަކުގެ ތެރޭގައި ޣަރަޤުވެގެންވާ މީހުންގެ ޙާލަތަށް ވިސްނާލާ ވާހަކަދައްކާލައިފިނަމަ މި ޙަޤީޤަތް ހާމަވެގެންދެއެވެ.
އޭގެ ގިނަ ބަޔަކު އެކަންތައް ހުއްދަކޮށް އަދި އެއީ މައްސަލައެއްކަމުގައި ނުދެކެއެވެ. ފަހަރެއްގައި ސާފު ޞަރީޙަކޮށް ބައެއް މީހުން އެހެން ނުބުނި ނަމަވެސް، އޭނާގެ ވާހަކަތަކުން ހިތުގައި ފޮރުވާގޮތުގެ އަސަރުތައް ފާޅުވެއެވެ.
މިހެންވެ ބައެއް ސަލަފުން ވިދާޅުވެފަވެއެވެ: 'ފާފަތަކާއި އުރެދުންތަކަކީ ކާފަރުވުމަށް ގެންދާ މަގެކެވެ.' ފާފައެއްގެ ސަބަބުން ކާފަރު ނުވިޔަސް، ސާފުކޮށް އެނގިގެންވާ ފާފައެއް ހުއްދަކަމަށް ދެކިއްޖެނަމަ ކާފަރުވާނެއެވެ.
