ރަޙިމްގެ ގުޅުން ދެމެހުއްޓުމަކީ ބަދަލަށް ބަދަލު ދިނުމެއް ނޫން

ރަޙިމްގެ ގުޅުން ދެމެހުއްޓުމުގެ ވާޖިބުކަމާއި، ގުޅުން ކަނޑާލާ މީހާގެ މައްޗަށް އައިސްފައިވާ ވަޢީދުގެ ބަސްތައް އެއީ ނުހަނު ގިނަވެގެންވާ އެންމެންނަށްވެސް އެނގޭ ކަމެކެވެ.

ޙަދީޘްގައިވެއެވެ: "ﷲ އާއި އާޚިރަތް ދުވަހަށް އީމާންވާ މީހާ ފަހެ ރަޙިމްގެ ގުޅުން ދަމަހައްޓާށެވެ."

ކޮންމެ މީހެއްވެސް ރެޔާއި ދުވާލު މަސައްކަތް ކުރަނީ މުދަލާއި ރިޒްޤު އިތުރުކޮށް ހޯދާ، ޞިއްޙަތު ސަލާމަތުން ދުނިޔޭގައި ހުރެ ރަނގަޅު މަރަކުން މަރުވުމަށެވެ. އެކަމަކު އެ ކަމަށްވާ ސަބަބު ދޫކޮށްލާފައި ކިތަންމެ މަސައްކަތެއް ކުރިޔަސް އޭގެ ފައިދާއެއް ނެތެވެ. އެހެނީ ޙަދީޘްގައިވެއެވެ:

"އެމީހެއްގެ ރިޒްޤު އިތުރުކުރެވި، ޢުމުރު ދިގުކުރެވި، އަދި ނުބައި މަރަކުން ސަލާމަތްވާން ބޭނުންވާ މީހާ ފަހެ ރަޙިމްގެ ގުޅުން ދަމަހައްޓާށެވެ."

އަދި ރަޙިމްގެ ގުޅުން ކަނޑައިފި މީހާގެ ކިބައިން ﷲ ގެ ރަޙްމަތް ކަނޑުއްވާނޭކަމަށް އެންގެވިއެވެ. އެކަލާނގެ ރަޙްމަތް ކެނޑިގެން ދިޔުމަށް ވުރެ ބިރުވެރިކަމެއް ކޮބައިހެއްޔެވެ!

!އަދި ރަޙިމްގެ ގުޅުން ކަނޑާ މީހާއަށް ދުނިޔެ މަތީގައިވެސް ޢުޤޫބާތް އަވަސްވެގެން އަންނާނެކަމަށް ރަސޫލާ އެންގެވިއެވެ.

!އަދި ރަޙިމްގެ ގުޅުން ކަނޑައިގެން ހުންނަ މީހާ ކުރާ އެއްވެސް ހެޔޮ ޢަމަލެއް ﷲ ގެ ޙަޟްރަތަށް ނުއުފުއްލެވޭނެކަމަށް އެންގެވިއެވެ.

!އަދި ރަޙިމްގެ ގުޅުން ކަނޑާ މީހާ ސުވަރުގެވެސް ނުވަންނާނޭކަމަށް އެންގެވިއެވެ.

މިނޫންވެސް އެތައް ބައިވަރު އާޔަތްތަކާއި ޙަދީޘްތައްވެއެވެ.

 🔵ގިނަ މީހުންނަށް ރަޙިމްގެ ގުޅުން ދެމެހެއްޓުމުގެ މުހިއްމުކަން އެނގުނަސް އެއީ ކޮބައިކަމެއް ނޭނގެއެވެ.

އެގޮތުން ގިނަ މީހުން ޤަބޫލު ކުރާ ގޮތުގައި ރަޙިމްގެ ގުޅުން ދެމެހެއްޓުމަކީ ބަދަލަށް ބަދަލުދޭ އުޞޫލުން އޮންނަކަމެކެވެ. އެގޮތުން އެމީހުން ދެކޭގޮތުގައި:

⭕ތިމާގެ މީހާ ޒިޔާރަތްކޮށްފިނަމަ މަވެސް އޭނާއަށް ޒިޔާރަތް ކުރާނަމެވެ. ޒިޔާރަތް ނުކުރަންޔާ މަށެއްވެސް ވަކި ނުދާނަމެވެ!

⭕ތިމާގެ މީހާ ނުގުޅާތީ ދެން މަ ވަކި އޭނާއާއި ގުޅާއި ޙާލު ބަލަންވީ ކީއް ކުރަން ހެއްޔެވެ!

⭕ނޫނީ އޭނާ މަށަކީ ތިމާގެ މީހެއްކަމުގައި ނުބަލަންޏާ ދެން މަ މަތިންބައިން ޖެހިގެން އޭނާ ފައިބުޑަށް ވެއްޓެން ޖެހޭހެއްޔެވެ!

⭕ނޫނީ ތިމާގެ މީހާ މަ ބަލިވީމަވެސް ޙާލުގައި ޖެހުނު ދުވަހުވެސް އަޅައެއްވެސް ނުލިއެވެ. އެހެންވީމާ ވަކި މަ އޭނާއާއި ގުޅެންވީ ކީއް ކުރަން ހެއްޔެވެ!

⭕ތިމާގެ މީހާ މަށާައިމެދު ކަންތައް ކުރީ ވަރަށް ގޯސްކޮށެވެ. އެހެން ވީމާ މަވެސް އެކަން ދަންނާނަމެވެ!

މިފަދަ އެތައް ވާހަކަ ތަކެކެވެ.

✅އަޚުންނޭވެ! ރަޙިމްގެ ގުޅުން ދެމެހެއްޓުމަކީ އަޅުކަމެކެވެ. ހަތް އުޑު މަތިން ﷲ އަހަރުމެންނަށް އެންގެވީމާ އެކަލާނގެއަށް ކިޔަމަންތެރިވާން ކުރަން ޖެހޭ އަޅުކަމެކެވެ. ނަމާދާއި ރޯދަފަދަ ކުރަން ޖެހޭ އަޅުކަމެކެވެ. އަނެކާ ނުކުރިޔަސް އެ ވާޖިބު ތިބާގެ ބޮލުންނެއް ނުކެނޑޭނެއެވެ. އެކަން ބަޔާން ކުރައްވާ ރަސޫލާ صلى الله عليه وسلم ޙަދީޘް ކުރެއްވިއެވެ:

"ރަޙިމްގެ ގުޅުން ދަމަހައްޓާ މީހަކީ ބަދަލަށް ބަދަލުދޭ މީހާއެއް ނޫނެވެ. އެހެނެއްކަމަކު ރަޙިމްގެ ގުޅުން ދަމަހައްޓާ މީހަކީ އަނެކާ އެމީހާއާއި ގުޅުން ކަނޑާލިޔަސް އޭނާ އަމިއްލައަށް ގުޅުން ޤާއިމް ކުރާ މީހާއެވެ."

އަދި އެއްފަހަރަކު މީހަކު އައިސް ރަސޫލާގެ  އަރިހުގައި ދެންނެވިއެވެ:

"އޭ ﷲ ގެ ރަސޫލާއެވެ! އަހަރެންނަށް ތިމާގެ މީހުންތަކެއް ވެއެވެ. އެމީހުންނާ އަހަރެން ގުޅުން ދަމަހައްޓާ އިރުވެސް އެމީހުން ގުޅުން ކަނޑަނީއެވެ. އަދި އަހަރެން އެމީހުންނަށް ހެޔޮކޮށް ކަންތައް ކޮށްދޭއިރުވެސް އެމީހުން އަހަރެންނަށް ކަންތައް ކުރަނީ ނުބައިކޮށެވެ. އަދި އަހަރެން އެމީހުންނަށް ދީލަތިވެ މާތްކޮށް ހިތުމުންވެސް އެމީހުން އަހަރެންނަށް ދުއްތުރާކޮށް ހަދައެވެ.' އެހިނދު ރަސޫލާ ޙަދީޘް ކުރެއްވިއެވެ: "ކަންތައް ހުރީ ތިބާ ތިޔަ ބުނާ ގޮތަށްނަމަ ފަހެ އެމީހުން (ތިބާއަށް ޝުކުރުވެރި ނުވުމުން) އަލިފާން އަޅި ކައި ފަދައެވެ. އަދި ތިބާ ތިޔަ ގޮތަށް ދެމިހުރިހާ ހިނދަކު ﷲ ގެ ޙަޟްރަތުން އެހީތެރިއެއް އެމީހުންގެ މައްޗަށް ތިބާއަށް ލިބިގެން ވާހުއްޓެވެ."

ްެއެހެންކަމުން އަޚުންނޭވެ. ﷲ އަށްޓަކައި ރަޙިމްގެ ގުޅުން ދަމަހައްޓާށެވެ. ދުނިޔެއަށްޓަކައި އެއް ނޫނެވެ.

ރަޙިމްގެ ގުޅުން ދެމެހުއްޓުމުގެ ތެރޭގައި: ވާހަކަދައްކާ، ޙާލު ބަލާ، ޒިޔާރަތް ކޮށް، އޯގާތެރިވެ ހަދިޔާ ދީ، ޙާޖަތްތައް ފުއްދައިދީ، ނުބައިކޮށް ކަމެއް ހުރިއްޔާ ނަޞޭޙަތްތެރިވެ، އުފަލުގައި ބައިވެރިވެ، ހިތާމާގައި ހިތްވަރު ލައިދީ ހެދުންފަދަ ކަންކަން ހިމެނެއެވެ.

އޭނާގެ ވާޖިބު އޭނާ އަދާ ނުކުރިޔަސް ތިބާގެ ވާޖިބު ތިބާ އަދާކުރާށެވެ.

އޭނާ ތިބާގެ ޙާލު ނުބެލިޔަސް ތިބާ އޭނާގެ ޙާލު ބަލާށެވެ.

އޭނާ ތިބާއަށް ބަދުބަސްބުނެ ހުތުރު އެއްޗެހި ކިޔަސް ތިބާ އޭނާއާއި ރިވެތި ކޮށް ވާހަކަ ދައްކާށެވެ.

އޭނާ ތިބާއަށް ޒިޔާރަތް ނުކުރިޔަސް ތިބާ އޭނާއަށް ޒިޔާރަތް ކުރާށެވެ.

އޭނާއަށް ތިބާއަށް އެއްވެސް އެއްޗެއް ނުދިނަސް ތިބާގެ މުދަލުން އޭނާއަށް ހޭދަކުރާށެވެ.

އޭނާ ތިބާއަށް މާފު ނުކުރިޔަސް ތިބާ އޭނާ އަށް މާފު ކުރާށެވެ. އަދި ހެޔޮ ނަސޭހަތް ދީ ދުޢާ ކޮށްދޭށެވެ.

ﷲ އަށްޓަކައި ތިބާގެ ވާޖިބު ތިބާ އަދާ ކުރާށެވެ. ދުނިޔޭގައި ތިބާއަށް ހެޔޮ ގޮތް ލިބި، ރިޒްޤު ބަރަކާތްލިބި، ރަނގަޅު މަރެއް ލިބި، ރަނގަޅު ޢުމުރެއް ލިބި ، ﷲ ގެ ރަޙްމަތް ލިބި އަދި އާޚިރަތުގައިވެސް ކާމިޔާބު ލިބޭނީ އޭރުންނެވެ.

MuhammedAlMaldheefi