މީހާވަނީ އެމީހަކު ލޯބިވާ މީހަކާއި އެކުގައި ކަމަށް ބުނެވޭ ބުނުން ތިބާ ހެއްލުންތެރި ކުރިޔަނުދޭށެވެ!
💥އަލްޙަސަނުލް ބަޞަރީ ވިދާޅުވިއެވެ:
"އޭ އާދަމުގެ ދަރިޔާއެވެ!
މީހާވަނީ އެމީހަކު ލޯބިވާ މީހަކާއި އެކުގައި ކަމަށް ބުނެވޭ ބުނުން ތިބާ ހެއްލުންތެރި ކުރިޔަނުދޭށެވެ!
އެހެނީ ހަމަކަށަވަރުން ބަޔަކުދެކެ ލޯބިވެއްޖެ މީހަކު އެބަޔަކުގެ ފިޔަވަޅުތަކަށް ތަބަޢަވާނެއެވެ.
ދަންނާށެވެ. ތިބާ ހެޔޮ ރަނގަޅު ބޭކަލުންގެ ފިޔަވަޅުތަކަށް ތަބަޢަވެ، އެބޭކަލުން ދެއްކެވި ހިދާޔަތުގައި ހިފަހައްޓާ،
އެބޭކަލުންގެ ސުންނަތުގެ މަތީގައި ތިބާ ފިޔަވަޅު އަޅާ، އަދި ތިބާ ހެނދުނާއި ހަވީރުކުރަނީ އެބޭކަލުންގެ މަންހަޖުގެ މަތީގައި ހުންނަ ޙާލުކަމުގައިވެ،
އަދި އެބޭކަލުންގެ ތެރެއިން ތިބާވެސްވުމަށް ފަރުވާތެރިވެ ދަހިވެތިވާ ޙާލު،
ދެން އެބޭކަލުން ދެއްކެވި މަގުން ތިބާ ހިނގައިގެން މެނުވީ ތިބާއަށް ހެޔޮ ރަނގަޅު މީސްތަކުންނާ ބައްދަލުވެ އެކުނުވެވޭނެއެވެ.
އެއީ ތިބާ ޢަމަލުކުރުމުގައި ބައެއްފަހަރު ފަރުވާކުޑަކުރެވުނަސްމެއެވެ.
ހުރިހާވެސް މުހިއްމުކަމަކީ ތިބާ ސީދާމަގުގައި ޘާބިތުވެ ހުރުމެވެ.
ފަހެ ޔަހޫދީންނާއި ނަޞާރާއިންނާއި، އަދި ހަލާކުކުރަނިވި ހަވާނަފްސުގެ އެދުންތަކާއި ބިދުޢަތަކުގެ އަހުލުވެރިންވެސް އެމީހުންގެ ނަބިއްޔުންދެކެ ލޯބިވާކަމަށް ދަޢުވާކުރާތަން ތިބާ ނުދެކެމުހެއްޔެވެ؟
އެކަމަކު އެއިން އެއްވެސް ބަޔަކު އެބޭކަލުންނާއި އެކުގައި ނުވެއެވެ.
އެހެނީ އެހުރިހާ އެންމެން ބަހާއި ޢަމަލުގައި އެބޭކަލުންގެ ގޮތާއި ޚިލާފުވިއެވެ. އަދި އެބޭކަލުންގެ މަގު ފިޔަވައި އެހެން މަގެއް އެމީހުން ހިފިއެވެ. ދެންފަހެ އެމީހުން ގޮސްނިމޭނެ ތަނެއްކަމުގައިވީ ނަރަކައެވެ.
ﷲ ގެ ޙަޟްރަތުން އެހެންވުމުން ރައްކާތެރިކަން އެދެމެވެ."
📖 މަޖްމޫޢު ރަސާއިލި އިބްނު ރަޖަބު📖
