ކުޅަދާނަކަން ހުރި ޢަދުލުވެރިވާ މީހާ، އެކަކަށް ވުރެ ގިނަ މީހުންނާއި އިނުމަކީ ނަބަވީ މަންހަޖެކެވެ...
"ކުޅަދާނަކަން ހުރި ޢަދުލުވެރިވާ މީހާ، އެކަކަށް ވުރެ ގިނަ މީހުންނާއި އިނުމަކީ ނަބަވީ މަންހަޖެކެވެ. އަދި ޞައްޙަ ފިޠުރަތެކެވެ.
ފަހެ އިބްރާހިމްގެފާނު ދެކަނބަލުންނާއި ކައިވެނި ކުރެއްވިއެވެ.
އަދި ދާވޫދުގެފާނު އެއްހާސް އަންހެނުންނާ ކައިވެނި ކުރެއްވިއެވެ. އެއީ ތައުރާތުގައާއި، ބަނީ އިސްރާއީލުގެ ބައެއް ވާހަކަތަކުގައި އައިސްފައިވާ ފަދައިންނެވެ.
އަދި ސުލައިމާނުގެފާނު ސަތޭކަ އަންހެނުންނާ ކައިވެނި ކުރެއްވިއެވެ. އެއީ ބުޚާރީއާއި މުސްލިމްގައި އަބޫ ހުރައިރާގެ ޙަދީޘްގައިވާ ފަދައިންނެވެ.
އަދި މީސްތަކުންގެ ތެރެއިންވާ އެންމެ ހެޔޮ އިންސާނާ މުޙައްމަދު صلى الله عليه وسلم އެގާރަ ކަނބަލުން ޖަމަޢަކުރައްވާފައިއެވެ. އަދި ނުވަ ކަނބަލުންނޭވެސް ބުނެވުނެވެ. އެދެރިވާޔަތްވެސް ވަނީ ޞަޙީޙުގައިއެވެ. އަނަސްގެފާނުގެ ޙަދީޘްގައިއެވެ.
ގިނަ ޞަޙާބީންވެސް އެކަކަށްވުރެ ގިނަ ކަނބަލުންނާއި ކައިވެނި ކުރެއްވިއެވެ. އެބޭކަލުންގެ ތެރޭގައި: އެކަނބަލުން އެއްފަހަރާއި ޖަމަޢަކުރެއްވި ބޭކަލުންވެއެވެ. އަދި އެބޭކަލުންގެ ތެރޭގައި ކައިވެނި ބައްލަވައިގަނެ ދެން ވަކިވެ ވަޑައިގެންނެވި ބޭކަލުންވެސްވެއެވެ.
ބުޚާރީ، ސަޢީދު ބްނު ޖުބައިރު ވިދާޅުވިކަމަށް ރިވާކުރެއްވިއެވެ: އިބްނު ޢައްބާސް އަހަރެންނަށް ވިދާޅުވިއެވެ: 'ތިބާ ކައިވެނިކޮށްފިން ހެއްޔެވެ؟' އަހަރެން ދެންނެވީމެވެ: 'ނޫނެކެވެ.' އެކަލޭގެފާނު ވިދާޅުވިއެވެ: 'ފަހެ ކައިވެނި ކުރާށެވެ. ހަމަކަށަވަރުން މި އުއްމަތުގެ އެންމެ ހެޔޮ މީހަކީ އެންމެ އަންހެނުން ގިނަ މީހާއެވެ.'
އެއީ ބޮޑުވެގެންވާ ޙިކްމަތަކަށްޓަކައިވާ އިލާހީ ޝަރީޢަތެކެވެ. އޭގެ ސަބަބުން ފިރިހެނުންނާއި އަންހެނުންގެ ކިބައިން ބޮޑެތި ފަސާދަތައް ދުރުކުރުން ޙައްޤުކޮށްދެއެވެ. ބައެއް މީސްތަކުންގެ ގާތުގައި އޭގެ ޙިކްމަތް ނޭނގި ގެއްލިފައި ހުއްޓަސްމެއެވެ. އެއީ ނަފްސުތަކުގެ އެތެރޭގައިވާ ބޭނުންތަކާއި، ފޮރުވިގެންވާ ޣަރީޒާތައް ދެނެގަތުމަށް އެމީހުން ނުކުޅެދިގެންވާތީ އަދި ބޮޑާވެގެންވާތީއެވެ."
-ޝެއިޚު ޠަރީފީ-
