އިބްނުލް ޤައްޔިމުގެ ތަރުބަވީ ބަސްފުޅުތައް-6
"ކުއްޖާ އެކަމަކަށް އިންތިހާއަށް ބޭނުންޖެހިގެންވާ ކަންތަކުގެ ތެރޭގައި: ކުއްޖާގެ އަޚްލާޤުގެ ކަންތަކަށް އަޅާލާ ސަމާލުކަން ދިނުންވެއެވެ. އެހެނީ ކުއްޖާ ބޮޑުވެގެންދާނީ ތަރުބިއްޔަތުކުރާ މީހާ އެކުއްޖާ ކުޑައިރު ޢާދަކުރުވާ ގޮތެއްގެ މައްޗަށެވެ.
ރުޅިގަދަކޮށް ރުޅިއަރުވަންޔާ އެގޮތަކަށެވެ. އަވަސްއަރުވާލާ، އަޑުގަދަކޮށް، އާދޭސްކުރަން ޖައްސާނަމަ އެގޮތުގެ މައްޗަށެވެ.
ބޭނުންހާކަމެއް ފަސޭހަކޮށް ހޯދެންޏާ އެގޮތަކަށެވެ. އަދި ހަމައެއްލަމައެއްނެތި އުޅޭނަމަ، އަދި ހަރުއަޑުން ދިމާލަށް ބަސްބުނެ އުޅޭނަމަ، އަދި ދަހިވެތިވެގެން އުޅޭނަމަ އެގޮތުގެ މަތީގައިއެވެ.
ދެން ކުއްޖާ ބޮޑުވުމަށްފަހު އެގޮތެއް ފިލުވާލުން އުނދަގޫވެގެންދެއެވެ. އަދި މިއަޚްލާޤުތައް ވެގެންދާނީ އޭނާގެ ގައިގައި ހަރުލާފައިވާ ޞިފަތަކެއްކަމުގައި، އުޅުންކަމުގައިއެވެ. ދެން އެހިނދު އޭނާ އެގޮތަކުން ސަލާމަތްވާން ކިތަންމެ ވަރަކަށް އުޅުނަސް، ކޮންމެވެސް ދުވަހަކު ފަޟީޙަތްވެ ޙަޤީޤީ ޞޫރަ ކޮންމެހެންވެސް ހާމަވާނެއެވެ.
މިކަމަށްޓަކައި ތިބާއަށް ފެނިގެންދާނީ މީސްތަކުންގެ ތެރެއިން ގިނަ ބަޔަކު އަޚްލާޤީގޮތުން ކަސިޔާރުވެގެންވާތަނެވެ. އެހެން އެކަންވީ އެތަރުބިއްޔަތެއްގެ މަތީގައި އެބައިމީހުން ހެދިބޮޑުވި ތަރުބިއްޔަތުގެ ސަބަބުންނެވެ.
އެކަމަށްޓަކައި: ކުއްޖާ ވިސްނޭ ޢުމުރަށް ގޮސްފިނަމަ، ކުޅެމަޖާކުރުމާއި، ބާޠިލުކަންކަމާއި ލަވައިގެ މަޖްލިސްތަކާއި، ފާޙިޝް ބަސްތައް އަޑުއިވުމުންނާއި، ބިދުޢަތަކާއި، ހަޑިހުތުރުކޮށް އަދަބެއްނެތި ވާހަކަދެއްކުމުން ދުރުކޮށް އެއްކިބާކުރުން ވާޖިބުވެގެންވެއެވެ. އެހެނީ ކުއްޖާގެ އަޑުއިވުމުގައި އެކަން ހަރުލައިފިނަމަ، ބޮޑުވުމަށްފަހު ދެން އެކަންތަކުން ސަލާމަތްވުން ދަތިވެގެންދެއެވެ. އަދި އެކުއްޖާގެ ބެލެނިވެރިޔާއަށް އެކުއްޖާ އެގޮތަކުން ދުރުކުރުމަކީ ނާދިރުކަމަކަށްވެގެންދެއެވެ. އެހެނީ ހަރުލާފައިވާ ޢާދަތައް ބަދަލުކުރުމަކީ އެންމެ އުނދަގޫވެގެންވާ އެއްކަންތަކެވެ. އެޢާދައެއްގެ އަހުލުވެރިޔާ އެއިރުން އެޖެހެނީ ދެވަނަ ޠަބީޢަތެއް އަލުން ބިނާކުރާށެވެ. އަދި ޠަބީޢަތުގައިވާ ޙުކުމަކުން ބޭރުވުމަކީ ވަރަށްވެސް އުނދަގޫކަމެކެވެ."
📖 ތުޙްފަތުލް މައުދޫދު 📖
