އިބްނުލް ޤައްޔިމުގެ ތަރުބަވީ ބަސްފުޅުތައް-4
"ކުއްޖާގެ ރުއިމާއި ހަޅޭކުގެ ސަބަބުން މައިންބަފައިން ކަންތައް ބޮޑުވެ، ދަތިނުވުން ހުއްޓެވެ. ޚާއްޞަކޮށް ކުއްޖާ ބަނޑުހައިވެގެން ކިރުބޯންވެގެން ރުޔަސްމެއެވެ.
އެހެނީ އެރުއިމުގެ ސަބަބުން ކުއްޖާއަށް ބޮޑު ފައިދާއެއް ލިބެއެވެ.
އެގޮތުން ކުއްޖާގެ ގުނަވަންތަކަށް އެކަމުން ކަސްރަތު ލިބެއެވެ. އަދި މައިދާ ފުޅާވެއެވެ. އަދި މޭ ތަނަވަސްކުރުވައެވެ. އަދި ސިކުނޑިއަށް ހޫނުކަން ފޯރުކޮށްދެއެވެ.
އޭގެ އިތުރުން އޭގެ ސަބަބުން : މިޒާޖު ޙިމާޔަތްކޮށްދީ، އަދި ޣަރީޒާގެ ހޫނުކަން ދިރުވައި، ޠަބީޢަތުގައިވާ ބޭކާރު ގޮތްތައް ދުރުކުރުމަށް ޙަރަކާތް ކުރުވައެވެ. އަދި ސިކުނޑީގައި އިތުރުވެގެންވާ ރޯގާފަދަ ދިޔަތައްވެސް ދުރުކޮށްދެއެވެ.
އަދި ގަދަފަދަ އަޑުތަކާއި، ބިރުވެރި މަންޒަރުތަކާއި، އުނދަގޫވާފަދަ ޙަރަކާތްތައްފަދަ ކުއްޖާ ބިރުގަނެ ސިއްސައިގެންދާފަދަ އެންމެހާ ކަންތައްތަކުން ކުއްޖާ ރައްކާތެރި ކުރަން ޖެހެއެވެ.
އެހެނީ ފަހަރެއްގައި ކުއްޖާގެ ވިސްނުމުގެ ބާރު ބަލިކަށިވެގެންވާކަމަށްޓަކައި އެކަމުގެ ސަބަބުން ވިސްނުމުގެ ބާރު ހަލާކުވެދާނެއެވެ. އެއިރުން ބޮޑުވުމަށްފަހު އެއިން އޭނާއަށް ފައިދާއެއް ނުކުރާނެއެވެ.
އެހެންކަމުން ކުއްޖާއަށް އެފަދަ ކަމެއް ހުށަހެޅޭ ހިނދު އަވަހަށް އަރާހަމަކޮށް އެކަން ހުއްޓުވަންޖެހެއެވެ. އަދި ކުއްޖާ މުނިފޫހި ފިލުވައި ކަހަލަ ކަމެއް ކޮށްގެން އެކަން ހަނދާން ނައްތާލަދީ، އަދި ވަޤުތުން ކިރުޖައްސާ، ކުއްޖާއަށް އުނދަގޫވި ކަންތައް ފިލުވާލަދިނުމަށްޓަކައި އެކަން އަވަސްކުރަންޖެހެއެވެ.
އެއީ ކުއްޖާގެ ފޮހެވިގެންނުދާ ހަނދާނުގައި އެކަން ކުރެހިގެން ނުދިޔުމަށެވެ. އެއިރުން އެކަމެއް ފިލުވައިލުން އުނދަގޫވާނެއެވެ. އަދި ކުއްޖާ ނިދައްޖައުމަށް މަޑުމައިތިރި ޙަރަކާތްތަކުން މަސަލަަސްކުރާ ހުއްޓެވެ. އެއިރުން އެކަމެއް ހަނދާން ނެތިދާނެއެވެ.
މިކަންތަކާއިމެދު އިހްމާލުނުވާހުށިކަމެވެ. އެހެނީ މިކަމާއި އިހްމާލުވުމުން ކުއްޖާގެ ހިތުގައި ބިރުވެރިކަމާއި ސިހުންވެރިވުން ހަރުލައި، ދިރިގެންދެއެވެ. ދެން އެގޮތުގެ މަތީ އެކުއްޖާ ބޮޑުވެއެވެ. ދެން އެއިރުން އެކަން ފިލުވާލުން އުނދަގޫވެ މުސްތަޙީލުވެގެންދެއެވެ. "
📖 ތުޙްފަތުލް މައުދޫދު 📖
