އިބްނުލް ޤައްޔިމުގެ ތަރުބަވީ ބަސްފުޅުތައް-10
"ސަމާލުކަންދީ ބަލަންޖެހޭ އެއްކަމަކީ:
ކުއްޖާގެ ޙާލަތު ހުރި ގޮތެވެ. މަސައްކަތްތަކުގެ ތެރެއިން ކުއްޖާ އެކަމަކަށް ތައްޔާރުވެގެންވާ، އަދި ކުއްޖާގެ ޙާލަތަށް ބަލާފައި އެކަށޭނެ ކަމެކެވެ. ދެން އެއަށްފަހު ކުއްޖާ ޚަލްޤުކުރެވިގެންވަނީ އެކަމެއްކުރަންކަން އެކުއްޖާއަށް އަންގައިދޭށެވެ. އެކަމަކު ޝަރުޢީ ގޮތުން ހުއްދަވެގެންނުވާ ކަމެއްކުރަން ކުއްޖާއަށް ނުޖައްސާށެވެ.
އެހެނީ ކުއްޖާ އެކަމެއްކުރަން ޤާބިލުވެގެންނުވާ ކަމެއްކުރުވަން އުޅެފިނަމަ ކާމިޔާބެއް ނުވާނެއެވެ. އަދި އެއިރުން އެކަމެއްކުރުމަށް އެކުއްޖާ ހެއްދެވިގެންވާ ކަންތައް ނުކުރެވި ފާއިތުވެގެންދާނެއެވެ.
އެގޮތުން ކުއްޖާގެ ވިސްނުމާއި ނަގައިގަތުން ރަނގަޅުކަމުގައި، ހިތުދަސްކުރުން ފުރިހަމަކަމުގައި، އަދި އެކުއްޖާ ހޭލުންތެރިވެގެންވާ ތަން ފެނިއްޖެނަމަ ފަހެ މިއީ އެކުއްޖާ ޢިލްމު އުނގެނުމަށް ތައްޔާރުވެ، އެކަމަށް ޤާބިލުވެގެންވާކަމުގެ ޢަލާމާތެކެވެ.
ދެންފަހެ އެކުއްޖާގެ ހިތް ހުސްވެގެންވަނިކޮށް، އެހިތުގެ ވޮށުފިލާގައި ޢިލްމު ކަނޑުވާ ނަގާހުށިކަމެވެ. އެއިރުން ޢިލްމު ހިތުގައި ޤަރާރުވެ ހަމަޖެހޭނެއެވެ. އަދި ޢިލްމާއި އެކު އެހިތް ޠާހިރުވެގެންދާނެއެވެ.
އެކަމަކު އެކުއްޖާ ހުރިހާ ގޮތަކުން އެއާއި ޚިލާފުކޮށް ފެނިއްޖެނަމަ، އަދި އަސްވާރުކަމާއި އޭގެ ސަބަބުތައް ކަމުގައިވާ ދުއްވުމާއި ތީރުއުކުމާއި، ދުނިދަނޑީގެ ކުޅިވަރުފަދަ ކަންކަމަށް ތައްޔާރުވެގެންވަނިކޮށް އެކުއްޖާ ފެންނަނަމަ، އަދި ޢިލްމުހޯދާ ނަގައިގަތުމުގެ އަހުލުވެރިކަމެއް އެކުއްޖާގެ ގައިގައި ނެތްކަމުގައި އަދި ޢިލްމަށް އެކުއްޖާ ހެއްދެވިގެންނުވާކަމަށް ފެނިއްޖެނަމަ:, ދެން އަސްވާރުކަމުގެ ސަބަބުތައް އުނގެނި ފަރިތަކޮށް އެކަންކަން ތަމްރީނުކުރަން އެކުއްޖާއަށް މަގުފަހިކޮށް ފުރުޞަތުދޭހުށިކަމެވެ. އެހެނީ އޭނާއަށާއި އަދި މުސްލިމުންނަށް އެންމެ ފައިދާބޮޑުވެގެންވަނީ އެގޮތެވެ.
އަދި އެކުއްޖާވަނީ އެއާއިވެސް ޚިލާފަށްކަމުގައި، އަދި އެކަންތައް ކުރުމަށް އެކުއްޖާ ޚަލްޤުކުރެވިގެންނުވާކަމަށް ފެނިއްޖެނަމަ، އަދިއެއާއިއެކު އެކުއްޖާގެ ލޯހުޅުވިގެންވަނީ މަސައްކަތްތެރިކަމާއި އުފެއްދުންތެރިކަމުގެ ތެރެއިން ކަމަކަށްކަމުގައި، އަދި އެކަމަކަށް ތައްޔާރުވެ ޤާބިލުވެގެންވާކަމަށް ފެނިއްޖެނަމަ، އަދި އެކަމަކީ މީސްތަކުންނަށް މަންފާކުރާނޭ ހުއްދަކަމެއް ކަމުގައިވާނަމަ ދެން އެކުއްޖާ ލައްވާ އެކަމެއް ކުރުވާހުށިކަމެވެ.
މިހުރިހާ ކަމެއްވެސްވަނީ އެކުއްޖާގެ ދީނުން ކޮންމެހެން ބޭނުންވާނޭ ކަންކަން ކުއްޖާއަށް އުނގަންނައިދިނުމަށް ފަހުގައިއެވެ. ފަހެ ކޮންމެ މީހަކަށްވެސް އެކަންތައްވަނީ ފަސޭހަވެގެންނެވެ. އެއީ އަޅާގެ މައްޗަށް ﷲ ގެ ޙުއްޖަތް ޤާއިމުވެގެން ދިޔުމަށެވެ. ފަހެ ﷲ ތަޢާލާއަށް އެކަލާނގެ އަޅުތަކުންގެ މައްޗަށް ފުރިހަމަވެގެންވާ ޙުއްޖަތް ލިބިގެންވެއެވެ. އެއީ އެމީހުންގެ މައްޗަށް ފުރިހަމަވެގެންވާ ނިޢުމަތް އެކަލާނގެ ދެއްވި ފަދައިންނެވެ."
📖ތުޙްފަތުލް މައުދޫދު 📖
