ދޮގު ޙަދީޘް ހެދުމުގެ ޢަޖައިބުކުރުވަނިވި ވާހަކައެއް

އެއްފަހަރަކު ޙަދީޘް ޢިލްމުގެ އެންމެ ބޮޑެތި ދެއިމާމުންކަމުގައިވާ އިމާމް އަޙްމަދު ބްނު ޙަންބަލުއާއި، އިމާމް ޔަޙްޔާ ބްނު މަޢީން ބަޣުދާދުގައި ހުންނަ ބޮޑު މިސްކިތް މަސްޖިދުއް ރަޞާފާގައި ނަމާދުކުރެއްވިއެވެ.

ދެން ނަމާދުކުރައްވާ ނިމުނުތަނާ ދަރުސްދީ ވާހަކަކިޔާދޭ މީހެއް މީސްތަކުންގެ ތެރޭގައި ތެދުވެ ދަރުސްދޭން ފެށިއެވެ. އޭނާ ކިޔަންފެށިއެވެ:

'ތިމަންނާއަށް އަޙްމަދު ބްނު ޙަންބަލުއާއި ޔަޙްޔާ ބްނު މަޢީނު ކިޔާދެއްވިއެވެ: އެދެބޭކަލުންނަށް ޢަބްދުއްރައްޒާޤު ކިޔާދެއްވިއެވެ: ވިދާޅުވިއެވެ: ތިމަންނާއަށް މަޢުމަރު، ޤަތާދާގެ އަރިހުން އަނަސްގެފާނުގެ އަރިހުން ކިޔާދެއްވިއެވެ: ﷲ ގެ ރަސޫލާ صلى الله عليه وسلم ޙަދީޘްކުރެއްވިއެވެ:

'لا إله إلا الله މީހަކު ކިޔައިފިނަމަ، އެއިން ކޮންމެ ކަލިމައަކަށް ދޫންޏެއް ޚަލްޤުކުރެއްވޭނެއެވެ. އެދޫނީގެ ތުންވަނީ ރަނުންނެވެ. އަދި ފަތްތައްވަނީ އިތާމުތުންނެވެ..' މިހެންގޮސް ވިއްސަކަށް ކަރުދާސްގަނޑު ފުރޭވަރަށް ދިގު ޙަދީޘެއް މީނާ ކިޔާދީފިއެވެ.

ދެން އަޙްމަދު ބްނު ޙަންބަލު އެތާ އިންނަވާ އަންތަރީސްވެ ޔަޙްޔާ ބްނު މަޢީނުއަށް ބައްލަވަން ފެއްޓެވިއެވެ. އަދި ޔަޙްޔާވެސް ޢަޖައިބުވެފައި އަޙްމަދު ބްނު ޙަންބަލުއަށް ބައްލަވަންހުއްޓެވެ. އަދި ވިދާޅުވެއްޖެއެވެ: 'މިފަދަ ޙަދީޘެއް ތިބާ މީނާއަށް ކިޔާދިނިންތޯއެވެ؟'

އަޙްމަދު ވިދާޅުވިއެވެ: 'ﷲ ގަންދީ ބުނަމެވެ! އަހަރެންވެސް އަދިކިރިޔާ މިއަޑުއެހީއެވެ!'

ދެން އެދެބޭކަލުން ހަނުތިއްބެވިއެވެ. އޭނާ ވާހަކަކިޔާދީ ނިމިއްޖައުމަށް ދާންދެނެވެ. ދެން މީސްތަކުން އޭނާއަށް ދިން ދިރްހަމުތައް ނަގައިގެން އިތުރު އެއްޗެއް ލިބޭތޯ އިންތިޒާރުގައި މަޑުކޮށްގެން އިނެވެ.

ދެން ޔަޙްޔާ ބްނު މަޢީނު އަތުގެ އިޝާރާތުން އޭނާއަށް ގޮވާލައްވާ އަންނަން ވިދާޅުވިއެވެ. އެހިނދު އޭނާ އިތުރު ހަދިޔާއެއް ދޭން އުޅެނީކަމަށް ހީކޮށް އަވަހަށް އަތުވެއްޖެއެވެ.

ޔަޙްޔާ އޭނާއަށް ވިދާޅުވިއެވެ: 'ކަލެއަށް މިޙަދީޘް ކިޔާދިނީ ކާކުހެއްޔެވެ؟'

އޭނާ ބުންޏެވެ: 'އަޙްމަދު ބްނު ޙަންބަލުއާއި ޔަޙްޔާ ބްނު މަޢީނެވެ.'

ވިދާޅުވިއެވެ: 'އަހަރެންނަކީ ޔަޙްޔާ ބްނު މަޢީނެވެ. އަޙްމަދު ބްނު ޙަންބަލު މިހުންނެވީއެވެ. ﷲ ގެ ރަސޫލާގެ ޙަދީޘަކުން ދުވަހަކުވެސް މިފަދަ ވާހަކަތަކެއް އަހަރުމެން ކުރިން އަޑުނާހަމެވެ. ކަލޭ ދެން ދޮގުހަދަން އުޅުނަސް އެހެންބަޔަކުގެ ނަންލައިގެން ހެދިނަމަ މާތާހިރުވީހެވެ.'

އެހިނދު އޭނާ ބުނެފިއެވެ: 'ތިޔައީ ހަމަ ޔަޙްޔާ ބްނު މަޢީނުހެއްޔެވެ؟' ވިދާޅުވިއެވެ: 'އާނއެކެވެ.'

އޭނާ ބުންޏެވެ: 'މިހާރު މިއެނގުނީއެވެ! ޔަޙްޔާ ބްނު މަޢީނުއަކީ ބޯހަމަނުޖެހޭ މޮޔައެއްކަމަށް އަހަރެން އަބަދުވެސް އަޑުއަހަމެވެ. މިހާރު ޔަޤީންވެއްޖެއެވެ!'

ޔަޙްޔާ ވިދާޅުވިއެވެ: 'އަހަރެންނަކީ މޮޔައެއްކަން ކަލެއަށް އެނގުނީ ކިހިނެއްހެއްޔެވެ؟'

އޭނާ ބުނެފިއެވެ: 'އެހެންޏާފަހެ ތިޔަ ހީކުރަނީ މިޔޮއް ބޮޑު ދުނިޔޭގައި ތިޔަ ދެމީހުން ނޫނީ ޔަޙްޔާ ބްނު މަޢީނުއަކާއި އަޙްމަދު ބްނު ޙަންބަލެއް ނުވާކަމަށްހެއްޔެވެ؟؟ މިނޫނަސް 17 އަޙްމަދު ބްނު ޙަންބަލުގެ ނަންކިޔާ މީހުންގެ ކިބައިން އަހަރެންވާނީ ޙަދީޘް ލިޔެފައެވެ.'

އެހިނދު އިމާމް އަޙްމަދު އެކަލޭގެފާނުގެ އަތްކުރި މޫނުގައި އަޅާ ފޮރުވާލެއްވިއެވެ. އަދި ވިދާޅުވިއެވެ: 'މީނާ ދާތާކަށް ދާން ދޫކޮށްލާށެވެ.'

ދެން އޭނާ މަލާމާތްކުރާ ފާޑަކަށް ތެދުވެގެން ހިނގައްޖެއެވެ."

📖އަލްމަޖްރޫޙީން ލިއިބްނު ޙިއްބާން📖