ބިނާއެއް އެޅުމުގައި މީހަކު އުޅެނިކޮށް އަހަރެން ސުފްޔާނު އައްޘައުރީއާއިއެކު އެތަނުގެ ކައިރިން....

💠 ޔަޙްޔާ ބްނުލް މުތަވައްކިލު ވިދާޅުވިއެވެ:

"ބިނާއެއް އެޅުމުގައި މީހަކު އުޅެނިކޮށް އަހަރެން ސުފްޔާނު އައްޘައުރީއާއިއެކު އެތަނުގެ ކައިރިން ދިޔައީމެވެ. އޭނާވަނީ އެބިނާ ވަރުގަދަކޮށް، ޖަރީކޮށް ޒީނަތްތެރިކޮށްފައެވެ.

ދެން ސުފްޔާނު އަހަރެންނަށް ވިދާޅުވިއެވެ:

"އެއަށް ނުބަލާށެވެ!"

އަހަރެން ދެންނެވީމެވެ:

" އޭ އަބޫ ޢަބްދުﷲ އެވެ. އެއީ ކީއްވެތޯއެވެ؟"

ވިދާޅުވިއެވެ:

"އޭނާ އެގޮތަށް އެތަން ބިނާކުރީވެސް މީސްތަކުން އެތަނަށް ބެލުމަށްޓަކައިއެވެ. ފަހެ އެތަނުން ލާފައި ދާ އެކަކުވެސް އެއަށް ބަލާވެސް ނުލާނަމަ އޭނާ މިހެން ނުހެދީހެވެ."

📖 ޙިލްޔަތުލް އައުލިޔާއު 📖

▪ ބައެއް ސަލަފުން ވިދާޅުވިއެވެ:

"އެމީހުންގެ އިމާރާތްތަކަށް ތިޔަބައިމީހުން ނުބަލާށެވެ. އެހެނީ އެމީހުން އެހާވަރަށް އެތަންތަން ޖަރީކުރީވެސް ތިޔަބައިމީހުންނަށް ދައްކަންވެގެންނެވެ."

📖 ޤޫތުލް ޤުލޫބު 📖

ﷲ ތަޢާލާ ވަޙީކުރެއްވިއެވެ:

(وَلَا تَمُدَّنَّ عَیۡنَیۡكَ إِلَىٰ مَا مَتَّعۡنَا بِهِۦۤ أَزۡوَ ٰ⁠جࣰا مِّنۡهُمۡ زَهۡرَةَ ٱلۡحَیَوٰةِ ٱلدُّنۡیَا لِنَفۡتِنَهُمۡ فِیهِۚ وَرِزۡقُ رَبِّكَ خَیۡرࣱ وَأَبۡقَىٰ)  طه:١٣١-

"އަދި އެއުރެންގެ ތެރެއިން މުއްސަނދިންގެ ބަޔަކަށް ދުނިޔަވީ ޙަޔާތުގެ ޒީނަތްތެރިކަމުގެ ގޮތުން ތިމަންއިލާހު އެތަކެއްޗާމެދު އެއުރެން އިމްތިޙާނުކުރެއްވުމަށްޓަކައި، ތިމަންއިލާހު އެއުރެންނަށް އުފަލާއި އަރާމުގެގޮތުގައި ދެއްވި ތަކެއްޗަށް އެދިވަޑައިގެން، ކަލޭގެފާނު ނުބައްލަވާށެވެ! ކަލޭގެފާނުގެ ވެރިރަސްކަލާނގެ ދެއްވަވާ ތަކެތި ހެޔޮކަން ބޮޑެވެ. އަދި ދެމިހުރުން މާބޮޑުމެއެވެ."

🔸ހިޝާމު ބްނު ޢުރްވާ ވިދާޅުވިއެވެ:

"އެކަލޭގެފާނުގެ ބައްޕާފުޅު ޢުރްވަތު ބްނުއް ޒުބައިރު، ދުނިޔަވީ ޒީނަތްތަކުގެ އަހުލުވެރިންގެ ގާތަށް ވަދެވަޑައިގަނެ، ދެން އެމީހުންގެ ދުނިޔޭގެ އުފާތަކުން އެއްޗެއް ފެނިވަޑައިގަންނަވާހިނދު،

އެނބުރި އެކަލޭގެފާނުގެ އަހުލުވެރިންގެ ގާތަށް ވަޑައިގެން ގެކޮޅަށް ވަދެވަޑައިގަންނަވާހިނދު އެއާޔަތް ކިޔަވާވިދާޅުވެއެވެ.

އަދި ވިދާޅުވެއެވެ:

"ނަމާދެވެ! ނަމާދެވެ! ﷲ ތިޔަބައިމީހުންނަށް ރަޙްމަތްލައްވާށިއެވެ."

📖 އައްޒުހްދު ލިއަބީ ދާވޫދު 📖

✍🏽 އެހެންކަމުން ޑުބާއީއާއި ސަޢުދީއާއި އެނޫންވެސް ތަނަވަސް ބައެއް ޤައުމުތަކުގައި އުރެދުމުގެ މައްޗަށް، އިސްރާފު ބޮޑުކޮށް މަތިމައްޗަށް ޖަރީކޮށްގެން ޒާތްޒާތަށް އުފުލާފައި ހުންނަ އިމާރާތްތަކާއި ބިނާތަކަށް ޝައުގުވެރިކަމާއިއެކު އާޝޯޚުވެ ބެލުމުން ދުރުވާށެވެ. ހަމައެގޮތަށް ޙާޖަތަށްވުރެ ބޮޑަށް ޖަރީކޮށް ދެއްކުމަށްޓަކައި ބައެއް ކޮހުން އެތެރެކޮށްގެން އުޅޭ މާމޮޅެތި އަގުބޮޑު ކާރު، ސައިކަލު އުޅަނދު ފަހަރަށްވެސް ދެލޯދިއްކޮށްގެން ނުބަލާށެވެ!

އެއީ އެފަދަ ތަންތަނަށް ތިބާގެ ހިތްކިޔާ، އަދި ނަފްސުގައި އެތަކެތި މޮޅުކުރުމުގެ ނަޒަރެއް ހަރުލިޔަ ނުދިނުމަށެވެ. އޭގެ ސަބަބުން ﷲ ތަޢާލާގެ ޙަޟްރަތުގައި މަދިރިއެއްގެ ފިޔައަކަށްވުރެވެސް ދަށްވެގެންވާ އެއްޗަކަށް ޙައްޤުނޫން ދަރަޖައެއް ދެވިދާނެއެވެ. އޭގެ ބަދަލުގައި އިހާނެތިކަމާއި، ނުރުހުމުގެ ލޮލަކުން އެތަންތަނާ ތަކެތި ދެކޭށެވެ.