އަޅުންގެ އަޅުވެތިކަން
މިއަދު ދުނިޔެއިން މިފެންނަނީ މީސްތަކުން އަޅުންގެ އަޅުވެތިކަމުގެދަށަށް ދިއުމުން ކަންތައްވެގެންދާ ގޮތެވެ. އަނިޔާވެރިކަމާއި ގަދަބަދަވިކަމެވެ. ބިންތަކާއި ގެދޮރުތައް ފޭރި އަމިއްލަ ވަޒަނުން ނެރެލައި ، ރެފިޔުޖީންނަށް ހަދާލާތަނެވެ. ޢާއިލާތައް ހުރިގޮތަށް މަރާލައި ކުދިކުދި ކޮށްލާތަނެވެ. ތުއްތު ޅަދަރިންނާއި ، ނިކަމެތި އަންހެނުންނާއި މުސްކުޅިންވެސް ވަނީ ދިރިހުރުމުގެ ޙައްޤުން މަޙުރޫމްވެފައެވެ. ފަހަރުގައި ޔޫރަޕުގައި ގެއެއްގެ ދޮރުމަތީ ބާއްވާ ކުއްތާއެއްގެ ދަރަޖަ ލިބިއްޖެނަމަ އެ އިންސާނުންނަށް ދިރިހުރުމުގެ ފުރުސަތެއް ލިބިދާނެއެވެ. ނުވަތަ ގެރިއެއްގެ ސިފަ ލިބެއްޖެނަމަ އިންޑިޔާގައި ދިރިއުޅޭނެ މަގުތަނަވަސް ވެދާނެއެވެ. ނަމަވެސް މިއިންއެއްވެސް ޖަނަވާރެއްގެ ކެޓަގަރީގައި ނުގުނި މުސްލިމެއް ކަމަށް ގުނިގެންދިޔުމުން މިޖެހެނީ މަރުވާށެވެ. ހުޅަނގާއި ޔަހޫދީ ޒަޔަނިސްޓުގެ ޖެޓްތައް އައިސް ބޮންއަޅާނެ ވަގުތެއްގެ އިންތިޒާރުގައި ވަގުތުތައް ގުނަގުނަ ހުންނާށެވެ.
ނަމަވެސް އޭ އިސްލާމީ އުއްމަތެވެ. މި އަނދިރިކަމުން އިސްލާމީ އުއްމަތް އަދި އެހެން މީސްތަކުންވެސް ނެރޭނީ ކޮންދުވަހަކުން ހެއްޔެވެ؟ ސަލަފުއްޞާލިޙުންގެ މަންހަޖުން ހިނގާނީ ކޮންދުވަހަކުން ހެއްޔެވެ؟ މާތް ނަބިއްޔާ ﷺ ގެ އަޞްޙާބުން ދެއްކެވި ނަމޫނާ ދައްކަދޭނީ އުއްމަތުގެ ކޮން ދަރިއެއް ހެއްޔެވެ؟
ސަޢުދުބިން އަބީ ވައްޤާޞްގެ ލަޝްކަރުން ، ރުސްތުމް ގެ ގާތަށް މަންދޫބެއްގެ ގޮތުގައި ފޮނުވުނު "ރިބްޢިއްޔު ބިން ޢާމިރު" ރަޟިޔަﷲ ޢަންހުގެ ބަސްކޮޅު އަޑުއެހިން ހެއްޔެވެ؟ އެކަލޭގެފާނު ރުސްތުމްއަށް ބުންޏެވެ.
(( ﷲ ތަޢާލާ އަހަރެމެން ފޮނުއްވެވީ ، އަޅުތަކުންގެ އަޅުންގެ ގޮތުގައިތިބި މީހުންގެ ތެރެއިން ﷲ ގެ އަޅުންގެ ގޮތުގައި ވުމަށް އެދޭމީހާ ، އެއިލާހުގެ އަޅުވަންތަކަމުގެ ދަށަށް ނެރުމަށެވެ. އަދި ދުނިޔޭގެ ނުތަނަވަސްކަމުން ، އޭގެ ތަނަވަސްކަމަށް ނެރުމަށެވެ. އަދި ދީންތަކުގެ އަނިޔާވެރިކަމުން ނެރެ އިސްލާމްދީނުގެ ޢަދުލުގެ ދަށަށް ގެނައުމަށެވެ. ފަހެ އަހަރެމެން ފޮނުއްވިގެންވަނީ އެއިލާހުގެ ދީނާއިގެން އެއިލާހުގެ ޚަލްޤުތަކުންގެ ގާތަށް އެކަމަށް ދަޢުވަތު ދިނުމަށްޓަކައެވެ. ފަހެ އެކަން ޤަބޫލުކޮށްފި މީހާގެ ކިބައިން އަހަރެމެން ޤަބޫލުކުރާނަމެވެ. އަދި އެމީހުން ދޫކޮށް ( ހަނގުރާމަނުކޮށް) އަހަރެމެން އެނބުރި ދާހުށީމެވެ. އަދި އިންކާރުކޮށް ދެކޮޅުހަދައިފި ބަޔަކާއި އަހަރެމެން ހަނގުރާމަކުރާހުށީމެވެ. އަހަރެމެން ﷲ ތަޢާލާގެ ވަޢުދުކުރަނިވި ކަންތަކާއި ހަމައަށް ފޯރައްޖައުމަށް ދާންދެނެވެ. ))
[ އިބްނުކަޘީރު ރަޙިމަހުﷲގެ ، އަލްބިދާޔަތު ވައްނިހާޔަތު / ވޮލިއުމް 7 ]
އެހެންކަމުން އަދުގެ ޙާލަތަށް ބަލާއިރު ، އިސްލާމީ އުއްމަތުގެ ކޮންމެ ދަރިއެއް ރިބްޢިއްޔު ބިން ޢާމިރަށް ވާންޖެހިއްޖެއެވެ. ޚާއްޞަކޮށް އުންމަތުގެ ފިރިހެންތަކުންނެވެ. އަދި އަޅުންގެ ޤާނޫނުތައް ނައްތާލައި އިލާހީ ޤާނޫނަށް މީސްތަކުން ރުޖޫޢަކޮށްދިނުމަށް ނިކުންނާނެ ދަރިއަކަށް އުއްމަތް އެދި ގޮވަމުންދެއެވެ. "ޔޫ. އެން" އާއި "ހުޅަނގު" ގެ އަޅުވެތިކަމުން ޤައުމުތަކާއި ، ރައްޔިތުންތައް ނެރެދޭނެ ދަރިންތަކަކަށް އުއްމަތް ގޮވަމުންދެއެވެ. ފަހެ މިގޮވާލުންތަކަށް އިޖާބަދޭނެ މީހަކު ، ވޭހެއްޔެވެ؟
