އަހަރުމެންގެ ގާތަށް މަދީނާގެ އަހުލުވެރިންގެ ތެރެއިން މީހަކު އައެވެ. އޭނާއަށް ކިޔަނީ ޒިޔާދެވެ.
#ވާހަކައެއް
އިމާމް އިބްނުލް މުބާރަކުގެ ކިތާބުލް ޖިހާދުގައި ގެންނަވާފައިވާ ވާހަކައެކެވެ:
އަބޫ އިދްރީސް ވިދާޅުވިއެވެ:
"އަހަރުމެންގެ ގާތަށް މަދީނާގެ އަހުލުވެރިންގެ ތެރެއިން މީހަކު އައެވެ. އޭނާއަށް ކިޔަނީ ޒިޔާދެވެ. ދެން އަހަރުމެން ރޫމްކަރައިގެ ރަށެއްކަމުގައިވާ ޞިޤިއްލިއްޔާއާ ހަނގުރާމަކުރީމެވެ. އަދި ރަށެއް ވަށާލާ ޙިޞާރުކުރީމެވެ.
އަހަރުމެން ތިން މީހުން އުޅުނީ އެކުގައިއެވެ. އަހަރެންނާއި، ޒިޔާދުއާއި، އަދި މަދީނާގެ އެހެން މީހެކެވެ. ދެން އެއްދުވަހަކު އަހަރުމެން އެރަށް ޙިޞާރުކޮށްގެން ތިބެ، ކާއެއްޗެހި ގެނައުމަށް އަހަރުމެންގެ ތެރެއިން އެކަކު ފޮނުވީމެވެ. އެދަނޑިވަޅުގައި ހިލައުކާސޭލައިން އެރަށުން ހިލައެއް އަހަރުމެންނާއި ދިމާލަށް އެއްލިއެވެ. އަދި އެހިލަ ޒިޔާދުއާއި ކައިރި ހިސާބަކަށް ވެއްޓި ފުނޑިގެންދިޔައެވެ. އަދި ޒިޔާދުގެ ކަކުލުގައި އެއިން ބައެއް ޖެހުނެވެ.
އެހިނދު އޭނާ ހޭނެތުނެވެ. އަހަރެން ވަޤުތުންގޮސް އޭނާ ދަމާފައި ގެންދިޔައީމެވެ. އަދި އަހަރެންގެ އެކުވެރިޔާ ފެނުމުން އޭނާއަށް ގޮވާލީމެވެ. ދެން އޭނާ އައުމުން އަހަރުމެން ދެމީހުންވެގެން ޒިޔާދު ދަމާފައި ހަމަލާދެވޭ ހިސާބުން ދުރަށް ގެންދިޔައީމެވެ.
ދުވާލު ގަޑީ އެތައް އިރެއް ވަންދެން އަހަރުމެން އޭނާގެ ހިލަމެއްވޭތޯ މަޑުކޮށްގެން ތިބީމެވެ. އެކަމަކު ޙަރަކާތްކޮށެއް ނުލިއެވެ. ދެން ކުއްލިއަކަށް އޭނާ ހިނިއައިސް ކޮލުދަތް ފެންނަވަރަށް ހީލިއެވެ. ދެން އަނެއްކާ މައިތިރިވެއްޖެއެވެ. ދެން އަނެއްކާ އެތާ އޮވެ ކަރުނަތައް ފައިބާވަރަށް ރޯންފެށިއެވެ. ދެން ހުއްޓާލައިފިއެވެ. އަނެއްކާ ހޭންފެށިއެވެ. އެހެން އޮވެ އިރުގަނޑަކަށްފަހު އޭނާ ހޭއަރައިފިއެވެ.
އެހިނދު އިށީންދެ ސީދާވެފައި ބުނެފިއެވެ: 'އަހަރެން މިތާ މިއޮތީ ކީއްވެހެއްޔެވެ؟'
އަހަރުމެން ބުނެފީމެވެ: 'ތިބާއަށް ޖެހުނު ކަންތައް ނޭނގޭހެއްޔެވެ؟' އޭނާ ބުންޏެވެ: 'ނޭނގެއެވެ.'
އަހަރުމެން ބުނީމެވެ: 'ތިބާގެ އަރިމައްޗަށް ހިލަސޭލާއިން ބޮޑުހިލައެއް ވެއްޓުނު ހަނދާނެއް ނުވޭހެއްޔެވެ؟' އޭނާ ބުންޏެވެ: 'އާނއެކެވެ.'
އަހަރުމެން ބުނީމެވެ: 'އެހިލަގަނޑުން އެއްޗެއް ތިބާގެ ގައިގައި ޖެހުނެވެ. ދެން ތިބާ ހޭނެތުނީއެވެ. ދެން ތިބާ ހޭނެތިފައި އޮވެ މިވެނި އެވެނި ކަމެއް ކުރިތަން އަހަރުމެން ދެކުނީމެވެ.'
އޭނާ ބުންޏެވެ: 'އާނއެކެވެ. އަހަރެންނަށްވީ ގޮތް ކިޔާދޭނަމެވެ. އަހަރެން ގޮވައިގެން ޔާޤޫތުން ނުވަތަ ޖަވާހިރުން ހަދާފައިވާ ކޮޓަރިއަކަށް ގެންދެވުނެވެ. އަދި އެކަތި އަނެކައްޗަށް ވިއެ އަތްކަންކޮށް ގުޅުވާލެވިފައިވާ ދާންކޮޅުތަކެއްގެ ކައިރިއަށް އަހަރެން ގެންދެވުނެވެ. އަދި އޭގެ ކުރިމަތީގައި ދެއަރިއަކަށް ބާލީސްތަކެއް އަތުރާލާފައިވެއެވެ.
ދެން އެދާންކޮޅު މަތީގައި އިށީންނިހިނދު އަހަރެންގެ ކަނާތްފަރާތުން ގަހަނާތަކެއް ތެޅުވޭ އަޑު އިވުނެވެ. ދެން އެދިމާލުން އަންހެނެއް ނިކުތެވެ. ރީތިވެގެންވަނީ އެއަންހެނާތޯ ނުވަތަ އެއަންހެނާ ލައިގެންހުރި ހެދުންތޯ ނުވަތަ އެއަންހެނާގެ ގަހަނާތޯއެއް އަހަރެންނަކަށް ޔަޤީންކުރާކަށް ނޭނގުނެވެ.
ދެން ދާންތަކުގެ ކޮޅުން ލާފައި އެއަންހެނާ އައިސް އަހަރެންނާއި އިސްތިޤްބާލުކުރިހިނދު މަރުޙަބާ ތަހުނިޔާކިޔާ ބުނެފިއެވެ: 'އަހަރުމެން ދެއްވުމަށް ﷲ ޢައްޒަ ވަޖައްލައަށް ސުވާލު ނުދަންނަވާ، ހުސްފަޔާ ހުރި މީހާއަށް މަރުހަބާއެވެ. އަހަރުމެން މިވެނި އެވެނި އަންހެނާފަދައިންނެއް ނުވާނެއެވެ. -ދެން ޒިޔާދުގެ އަނބިމީހާގެ ވާހަކަ ޛިކުރުކުރިއެވެ- ދެން އެއަންހެނާގެ އެވާހަކަތައް ކިޔަން ފެށުމުން އަހަރެންނަށް ހެވުނެވެ. ދެން އެއަންހެނާ އައިސް އަހަރެންގެ ކަނާތްފަރާތުގައި އިށީންދެއްޖެއެވެ.
އަހަރެން ބުނެފީމެވެ: 'ކަނބުލޭގެ ތިޔައީ ކާކުހެއްޔެވެ؟' އޭނާ ބުންޏެވެ: 'އަހަރެންނަކީ ތިބާގެ އަނބިމީހާގެ ޖާރިޔާއެކެވެ.' ދެން އަހަރެން އަތްދިއްކޮށްލުމުން އެއަންހެނާ ބުނެފިއެވެ: 'އިހަށް މަޑުކުރާށެވެ. މެންދުރު ވަޤުތުގައި ތިބާ އަހަރުމެންގެ ގާތަށް އަންނާނެއެވެ.' އެހިނދު އަހަރެންނަށް ރޮވުނެވެ.
އޭނާ ވާހަކަދައްކާ ނިމުނުތަނާ އަހަރެންގެ ވާތްފަރާތާއި ދިމާލުން އަނެއްކާ ގަހަނާތަކެއްގެ އަޑު އިވުނެވެ. ދެން ބަލާލިއިރު ހަމަ މިއަންހެނާފަދަ ރީތި އެހެން އަންހެނެކެވެ. އަދި މިއަންހެނާ ކަންތައްކުރި ފަދައިން އެއަންހެނާވެސް ކަންތައް ކުރިއެވެ. ދެން މީނާވެސް އަނބިމީހާގެ ވާހަކަ ޛިކުރުކުރިހިނދު އަހަރެންނަށް ހެވުނެވެ. އަހަރެންގެ ވާތްފަރާތުގައި އެއަންހެނާ އައިސް އިށީންނިއެވެ. ދެން އަހަރެންގެ އަތް ދިއްކޮށްލުމުން އޭނާވެސް ބުނެފިއެވެ: 'އިހަށް މަޑުކުރާށެވެ. މެންދުރު ގަޑީގައި ތިބާ އަހަރުމެންގެ ގާތަށް އަންނާނެއެވެ.' ދެން އަހަރެންނަށް ރޮވުނެވެ.''
އަބޫ އިދްރީސް ވިދާޅުވިއެވެ: މިވާހަކަތައް ކިޔާދީ ވާހަކަދައްކަން ޒިޔާދު އަހަރުމެންނާއި އެކީގައި އިށީންދެގެން އިނެވެ. ދެން މެންދުރަށް ބަންގި ގޮވިތަނާ އޭނާ އެއްފަޅިއަކަށް ލެނބިއްޖެއެވެ. އަދި މަރުވެއްޖެއެވެ."
-ކިތާބުލް ޖިހާދު ލިއިބްނިލް މުބާރަކު: 1/ 140-
