محمد ގެފާނީ، اللَّه ގެ رسول އާއެވެ. އަދި އެކަލޭގެފާނުގެ އަރިހުގައިވާ މީހުންނީ...
﴿محمد ގެފާނީ، اللَّه ގެ رسول އާއެވެ. އަދި އެކަލޭގެފާނުގެ އަރިހުގައިވާ މީހުންނީ(އަޞްޙާބުނީ) كافر ންގެ މައްޗަށް ގަދަފަދަވެގެންވާ ބަޔެކެވެ. އެއުރެންގެ މެދުގައި، އޯގާވެރި ޙަމްދަރުދީވާ ބައެކެވެ.﴾ (ސޫރަތުލް ފަތުޙް 29)
ފަހެ މިއުއްމަތުގެ ސަލަފުއްޞާލިޙުންނަކީ މާތްނަބިއްޔާގެ އަޞްޙާބުނާ އެބޭކަލުންނަށް ތަބަޢަވީ ތާބިޢީންނާއި، ދެން އެބޭކަލުންނާއި އެއްގޮތްވެ އެގޮތުގެމަތީގައި އިސްލާމްދީން އަޅުގަނޑުމެނަށް ފޯރުކޮށްދިން ހެޔޮލަފާ ބައެކެވެ. ފަހަރެއްގަވެސް، އުއްމަތަށް މުޞީބާތެއް ތުރާލެއް ޖެހޭހިނދު، އުއްމަތުގެ މައްޗަށް އަރައިގަންނަ ބައެއް ނޫނެވެ. އެބޭކަލުންނަށް ދަސްވެފައި ވަނީ ލޮބުވެތި މާތްނަބިއްޔާ ﷺ ފަދައިން ((އުއްމަތީ)) އަހަރެމެންގެ އުއްމަތެވެ.
ހަމައެހެންމެ އެބޭކަލުންވީ ވެރިންގެ މުންކަރާތްވެސް މަނާކުރާ ބައެއްކަމުގައެވެ. އުމަވީ ޚިލާފަތުގައި މަރްވާނު، ޢީދު ނަމާދުގެ ކުރިން ޢީދު ޚުތުބާ ދޭން އުޅުމުން، މީހަކު ތެދުވެ ބުންޏެވެ. އޭ މަރްވާނެވެ. ތިބާ ސުންނަތާއި ޚިލާފުވެއްޖެ ނަމާދުގެ ކުރިއަށް ޚުތުބާ ދެނީއެވެ. އެހިނދު ޞަޙާބީ އަބޫ ސަޢީދުލްޚުދްރީ ދެންނެވިއެވެ. ((ފަހެ އޭނާ އޭނާގެ ވާޖިބު އަދާކޮށްފިއެވެ.))
