ފަހެ އެފަދަ މީހުން އެބުނާ އަންހެނުންނަކީ ކޮންބައެއް ހެއްޔެވެ؟
#ހުޅަނގުގެ އަޅުން އެދެނީ މުސްލިމް އުއްމަތުގެ އަންހެންތަކުން ހުޅަނގުގެ ޝަހުވަތުގެ ބާޒާރުގައި ގަނެވިއްކޭ މުދާގަނޑެއްފަދައިން ވުމަށެވެ.
ދަންނާށެވެ. އަހަރެމެންގެ އުޚްތުންނަކީ ރަނާ ޖަވާހިރާ މުތައްވުރެވެސް އަގުބޮޑު ޚަޒާނާއެކެވެ.
ފަހެ އެފަދަ ސެކިޔުލަރ އެތިޒަމްގެ މީހުންގެ ބަހަނާގެ ދެކޮޅު ނުޖެހޭކަމެވެ. މުސްލިމް އުޚްތާ އޭނާގެ ހަށިގަނޑު ފޮރުވުމުގެ ޙައްޤު ލިބިގެން ނުވާކަމަށް އެ މުޖުރިމް ދޫތަކުން ބުނާނަމަ އެބައިމީހުން އެ އަރައިގަންނަނީ މުސްލިމް އަންހެނުންގެ އަންހެންވަންތަ ކަމަށެވެ. ފަހެ މުސްލިމް އަންހެނުންގެ އަންހެންވަންތަކަން ނިގުޅައިގަތުމަށްވުރެ ބޮޑަށް، އަންހެނުންގެ ޙައްޤުތަކަށް އަރައިގަނެވި ދާނެތޯއެވެ. އެހެންކަމުން މުސްލިމް އުޚްތާއަކީ އަންހެނަކަށް ވީފަދައިން އެ އުޚްތާއަށް އެ އުޚްތާގެ ނިވާކުރުމުގެ ޙައްޤު ނުލިބޭނަމަ ދެން "ޖެންޑަރ މިނިސްޓްރީއާއި ، ހުޅަނގުގެ ނިވާފައިގަނޑުގައި ތިބި ސެކިޔުލަރ ޖަމާޢަތްތައް އެ ދައްކަނީ ކޮން އަންހެނުންގެ ޙައްޤުތަކެއްގެ ވާހަކައެއް ތޯއެވެ.
ނިވާކުރުމުން ކިޔެވުމުން މަޙުރޫމް ކުރުވައެވެ. އޮރިޔާންވުމުން ކިޔެވުމަށް ފުރުސަތު ދެއެވެ. ނިވާވުމުން ވަޒީފާއިން މަޙުރޫމު ކުރެއެވެ. އަދި އޮރިޔާންވުމުން ވަޒީފާއަށް ފުރުސަތު ދެއެވެ. ނިވާވުމުން ކުށްވެރި ވެއެވެ. އޮރިޔާންވުމުން މިނިވަންވެއެވެ. ވީއިރު އެބުނާ ޙައްޤުތައް ލިބުމަކީ އޮރިޔާންކޮށްފައި މުޖުތަމަޢުތެރެއަށް ދޫކޮށްލުމުން ، އަންހެންކަނބަލުންގެ ޢިއްފަތް ފޭރިގަނެގެން ދިޔުންތޯއެވެ. އަދި ރެޔާއިދުވާލު އަންހެނުންތައް ހިލޭފިރިހެނުންގެ ކުރިމަތީ ދުވެނަގައި ޖިންސީއަނިޔާގެ ޝިކާރައަކަށް ވުންތޯއެވެ. ހަމައެހެންމެ މި ހުރިހާކަމަކަށް މަގުފަހިކޮށްދިނުމަށްފަހު ދެން އެފަދައިން ކަންތައް ހިނގުމުން އަނގަ ތައްމިނަށް ހޮޅުވައި ޙައްޤޭ ގޮވުމަކުން ، ޙައްޤެއް ނުލިބޭނެއެވެ.
އެހެންކަމުން ލޮބުވެތި މުސްލިމް އުޚްތުންނޭވެ . ބަޔަކު ޝައިޠާނާގެ އަޅުންނަށްވެ ހެއްލިގެން ހިނގައްޖެއެވެ. އަދި އެބައިމީހުން އެދެނީ ތިޔަ އުޚްތުންވެސް ހައްލުވައި ތިޔަ އުޚްތުންގެ ޢިއްފަތްވެސް ރެޔާއިދުވާލު ފޭރިގަނެވިގެން ދިއުމަށެވެ. އެބައިމީހުންގެ ހިތްތަކުގައިވާ ޙަސަދައިގެ އަލިފާނުގެ ސަބަބުންނެވެ. އެއީ ތިޔަ އުޚްތުންނަށް މުސްލިމް އުއްމަތް ޤަދަރާއި ޢިއްޒަތްދޭތީއެވެ. އަދި އެބައިމީހުނަށް ޝައިޠާނާގެ އަޅުންވެސް އަދި އެހެންމީހުންވެސް ޤަދަރު ނުކުރާތީއެވެ.
އޭލޮބުވެތި އުޚްތުންނޭވެ . ތިޔަކަނބަލުން ތިޔަކަނބަލުންގެ ޙިޖާބުގައި ސާބިތުވާށެވެ. އަދި ޢިއްފާތާއި ޢިއްޒަތާއިއެކު ވާށެވެ. ތިޔައީ އުއްމަތުގެ ފަޚުރެކެވެ.
