أبو الأعلى المودودي ( އަބުލް އަޢުލާ އަލްމައުދޫދީ ) ރަޙިމަހު ﷲ
1903 ގައި އިންޑިޔާގެ ހައިދަރު އާބާދަށް އުފަންވެ ވަޑައިގެންނެވި ޢިލްމުވެރިއެއް ، އަދި އިސްލާމީ މުފައްކިރެއް ، އެތައް އިސްލާމީ ޙަރަކާތެއްގެ ބާނީއެކެވެ.
أبو الأعلى المودودي ( އަބުލް އަޢުލާ އަލްމައުދޫދީ ) ރަޙިމަހު ﷲ ދުނިޔެ ދޫކުރެއްވީ 1979 ގައެވެ.
މުސްލިމް ދީންވެރި ޢިލްމުވެރި ޢާއިލާއަކަށް އުފަންވެ ވަޑައިގަތް އަލްމައުދޫދީ ކިޔަވައި ވަޑައިގަތީ ގޭގައެވެ. އެހޭނީ އިނގިރޭސީން އިންޑިޔާ އިސްތިޢުމާރުކޮށް ، ތަޢުލީމީ މަންހަޖު ބަދަލުކޮށް ، ސްކޫލްތައް ގަޑުބަޑު ކޮށްފައި ވުމުން މައުދޫދީގެ ބައްޕާފުޅު އެކަލޭގެފާނު ސްކޫލަށް ނުފޮނުއްވައެވެ. އަދި ގޭގައި ޢިލްމު އުނގަންނައިދީ ތަރުބިއްޔަތު ކުރެއްވިއެވެ. ނަމަވެސް ގޭގައި ތަޢުލީމު ޙާސިލްކުރުން ، މައުދޫދީ މި ފަހުގެ ޒަމާނުގައި ދެކުނު ބޮޑެތި ޢާލިމުންގެ ތެރެއިންވުމަކަށް މަނަލެއް ނުކުރިއެވެ. އެހެނީ އިސްލާމްދީން ބިނާވަނީ ޢިލްމާއި ޢަމަލުގެ މައްޗަށް ކަމަށްވާތީއެވެ. އެގޮތުން މި ޢާލިމަކީ ޤުރުއާނުގެ ޢިލްމާއި ، ޙަދީޘް ޢިލްމާއި ، އިޤްތިޞާދީ ޢިލްމު ، އަދި އިސްލާމީ ފިޤުހާއި ، ފަލްސަފާގައިވެސް އަރާހުންނެވި ބޭކަލެކެވެ. އިސްލާމީ އުއްމަތް ދެކެމުންއައި އަނިޔާއާއި ، އުއްމަތުގެ ދިފާޢުގައި ބަސްބުނެ އުއްމަތް ތަމްސީލުކޮށް ، އުއްމަތުގެ އެންމެން އެއެއްޗެއްގެ ދަށަށް އެެއްވާނެ ސިސްޓަމެއް ނެތުމުން (ޚިލާފަތު) އަދި ، އުއްމަތަށް ދެމުންއައި އަނިޔާތައް ފަސްއަޅައި ފޮރުވަމުންދާންފެށުމުން ، އުއްމަތުގެ ކަންކަން އަދި އިސްލާމީ ތާރީޚު ރައްކާކުރުމަށް މީޑިއާގެ ދައުރުގެ މުހިއްމުކަން ދެނެވަޑައިގަތެވެ. އަދި އިންޑިޔާއިން އިނގިރޭސީންނާއިއެކު އޭރު އިސްލާމްދީނާއި ދެކޮޅަށް ހިންގި ޖަރީމާތަކާއި ، އިސްލާމީ ޝަރީޢަތް އުވާލުމަށް ކުރަމުން އައި މަސައްކަތްތަކާއި ދެކޮޅަށް އަޑުއުފުލައި ، އެ ޚަބަރުތައް ރައްޔިތުންނަށް ފޯރުކޮށްދިނުމަށް އަމިއްލަ މީޑިއާއެއް ހިންގެވިއެވެ. ހަމައެހެންމެ ނެތިފައިވާ އިސްލާމީ ޚިލާފަތު އަލުން އިޢާދަކުރުމަށް ނުހަނުގިނަ މަސައްކަތްކުރެއްވިއެވެ. އެތަކެއް ފޮތެއްލިޔުއްވައި މަޖައްލާތައް ނެރުއްވިއެވެ. އަދި އިންޑިއާ އާއި ޕާކިސްތާނުގައި އެތަކެއް އިސްލާމީ ހަރަކާތްތަކެއް ފައްޓަވައިދެއްވި މޭސްތިރިއެއްވެސް މެއެވެ.
ދީނުގެ ޢިލްމު އުއްމަތުގެ ދަރީންނަށް ފޯރުކޮށްދިނުމަށް އަބަދުވެސް މަސައްކަތްކުރައްވާ ، އަދި އެކަމާއި މެދު ފިކުރުކުރައްވާ މިންވަރަކީ ، މިއަދު އަޅުގަނޑުމެން މިދެކޭ ، މަދީނަތުލް މުނައްވަރާގައި ހުންނަ އިސްލާމިކް ޔުނިވަރސިޓީ ބިނާކުރުމުގެ ފިކުރު ، އަދި އެމަޝްރޫޢުގެ ޙަޤީޤީ ބާނީއެއްކަމުގައި މި ޢާލިމުވެގެން ދިއުމެވެ. ހަމައެހެންމެ އުއްމަތުގެ ޙާލާމެދު ފިކުރުކުރައްވައި ، އިސްލާމީއުއްމަތް އެކަތިގަނޑެއްގެގޮތުގައި އޮތުމަށް ބާރުއަޅުއްވައި ، އުއްމަތުގެ ޢިލްމުވެރިން އެ ޖަމުޢިއްޔާއެއްގެ ދަށުގައި ގުޅުވައިލަދިން ޖަމުޢިއްޔާ "ރާބިޠަތުލް ޢާލަމުލް އިސްލާމީ" ގެ ވެސް ފައުންޑަރއެއްގެގޮތުގައި ހިމެނިވަޑައިގަތެވެ.
މައުދޫދީ ރަޙިމަހުﷲ ޤަތުލުކޮށްލުމަށް އިސްލާމްދީނުގެ ޢަދުއްވުން އެތައްފަހަރަކު މަސައްކަތްކުރިއެވެ. ނަމަވެސް އޭގެން ކޮންމެފަހަރަކުވެސް ﷲ ތަޢާލާ މަޢުދޫދީ ރައްކާތެރިކުރައްވާ ސަލާމަތް ކުރެއްވިއެވެ. އަދި ޕާކިސްތާނުގެ ސަރުކާރުންވެސް އެތައްފަހަރަކު މައުދޫދީ ރަޙިމަހުﷲ ހައްޔަރުކޮށް ޖަލަށްލިއެވެ. އަދި މެރުމަށް ޙުކުމްވެސް ކުރިއެވެ. ނަމަވެސް މީގެން ކޮންމެފަހަރަކުވެސް ވަނީ ، ﷲ ގެ ރަޙުމަތުން ސަލާމަތްވެފައެވެ.
ހަމައެހެންމެ އަލް މައުދޫދީއަކީ އިސްލާމީ ތާރީޚުގައި މައްކާގެ ޙަރަމްފުޅުގައި ޣައިބަށްކަށުނަމާދު ކުރެވުނު ދެވަނަ ފަރާތެވެ.
އެހެންކަމުން މުސްލިމް ކޮންމެ މަންމައަކާއި ބައްޕައެއް ، އަދި ކޮންމެ ބެލެނިވެރިއެއް މިއަދު ވިސްނާލަންވީ ، މައުދޫދީ ރަޙިމަހުﷲ ، އެވަރުގެ ބޮޑު ޢާލިމަކަށް މުފައްކިރަކަށް ހެދީ ކާކު ހެއްޔެވެ؟ އެއީ މައުދޫދީގެ ބައްޕާފުޅުގެ މިންނެތްމަސައްކަތެވެ. އެހެނީ އެންމެފުރަތަމަވެސް ، އިސްތިޢުމާރީ އިނގިރޭސީންގެ ސްކޫލްތަކާއި ، އެ ފަރަންޖީ ގެންނަ ޝުބުހަތަކާއި ޚުރާފީތަކާއި ދުރުކޮށްލީއެވެ. އަދި ފިޠުރަތުގެމަތީގައި ބުއްދި ހުންނާނެހެން ގޭގައި ތަޢުލީމުދެއްވީއެވެ. އެހެންކަމުން މިއަދު އެމަންމައާއި ބައްޕަ އެމީހުންގެ އެ ދަރިފުޅުގެ ހެޔޮއަމަލުގައި އެވަނީ ބައިވެރިވެގެންނެވެ. އަދިވެސް މައުދޫދިއެޅުއްވި ބިންގާގެ ޢަމަލުތައް އެހުރީ ހިނގަ ހިނގައެވެ. އެބޭކަލުން ކައްވަޅުގައި ވީހިނދުވެސް މެއެވެ.
