މުސްލިމް އުޚްތުންނަށް ނަމޫނާއެއްކަމުގައި އެކަނބަލުންގެ މާމަ (އުއްމުލް މުއުމިނީން) ޢާއިޝާ ރަޟިޔަﷲ ޢަނ
🌿އުއްމުލް މުއުމިނީން ޢާއިޝާ ރަޟިޔަﷲ ޢަންހާގެ ކިބައިން ރިވާވެގެން ވެއެވެ. ތިމަން ކަމަނާއަށް ނަބިއްޔާ ﷺ ފެނުމުން ހިތްޕުޅު ހަމަޖެހުނެވެ. ތިމަން ކަމަނާ ދެންނެވީމެވެ. އޭ ﷲ ގެ ރަސޫލާ އެވެ. ﷲ ގެ ޙަޟްރަތުގައި ތިމަން ކަމަނާއަށް ދުޢާއެއް ކޮށްދެއްވާށެވެ. އެހިނދު އެކަލޭގެފާނު ޙަދީޘް ކުރެއްވިއެވެ. ”ހައްދަވާ ބޮޑުކުރެއްވި އިލާހެވެ. ޢާއިޝާގެ އިސްވެ ގޮސްފައިވާހައި ފާފައަކާއި ، ފަސްވެ އަންނާނެހައި ފާފައެއް ފުއްސާވާށިއެވެ. އަދި ސިއްރުވެގެން ވާހައި ކަމަކާއި ، ފާޅުވެގެން ވާހައި ކަމެއްވެސް މެއެވެ.“ އެހިނދު އެކަމަނާ ( ޢާއިޝާ ރަޟިޔަﷲ ޢަންހާ) ހިނިފުޅު ވަޑުވަމުންގޮސް އުނގަށް ބޯވަންނަ ވަރަށް ހިނިފުޅު ވެޑުވިއެވެ. އެހިނދު ނަބިއްޔާ ﷺ ޙަދީޘްކުރެއްވިއެވެ. ”ތިމަންކަލޭގެފާނުގެ ދުޢާއިން ، ކަމަނާ އުފާކުރުވީތޯ އެވެ؟“ އެކަމަނާ ވިދާޅުވިއެވެ. ކަލޭގެފާނުގެ ދުޢާފުޅުން އުފާ ނުވާނީ ކީއްވެތޯއެވެ؟ ( އެބަހީ އެހައިވެސް އުފާކުރުވައިފިއެވެ.)
((صحيح ابن حبان ، 7111 / سلسلة الصحيحة ، للشيخ ألباني ))
🌸 ނިކަން ދެކޭށެވެ. އޭ ލޮބުވެތި މުސްލިމް އަޚުންނާއި އުޚްތުންނޭވެ. މިއީ އަޅުގަނޑުމެންގެ މާތް ނަބިއްޔާ ﷺ ، ގެ ކޮޅުގައި އެކަލޭގެ ފާނުގެ އަނބި އަނބި ކަނބަލުންނާއި މެދު މުޢާމަލާތު ކުރެއްވި ގޮތެވެ. ފަހެ މިފަދަ ގެއެއް ބާއްޖަވެރި ވެއްޖެއެވެ. އެހެނީ އަނބިމީހާ އެދެނީ ފިރިމީހާގެ ފަރާތުން ، ފާފަ ފުއްސެވުމަށް އެދި ދުޢާ ކޮށްދެއްވުމެވެ. އަދި ފިރި މީހާގެ ހިތް ލޯތްބާއި ، ކުލުނާއި ، އޯގާތެރިކަމުން ފުރިގެންވާ ޙާލު ދުޢާކޮށްދެއްވަނީ ، އަނބި މީހާގެ މުޅި ޙަޔާތުގެ ހުރިހާ ފާފައެއް ފުއްސެވުމަށެވެ. އެބަހީ ފިރިމީހާ އޭނާގެ އަނބިމީހާއާއި މެދު ރުހިގެންވުމެވެ. އެހެންވެއްޖެނަމަ އެފަދަ އަންބަކާއި މެދު ﷲ ތަޢާލާގެ ރުއްސެވުމާއި ފުއްސެވުން ލިބުން ގާތް ވެއްޖެއެވެ.
އޭ މުސްލިމް އުޚްތުންގެ ފިރިންނޭވެ . ފަހެ ތިޔަބައި މީހުންގެ އަނބީންނަށް ފާފަ ފުއްސަވައި ، ﷲ ގެ ރުއްސެވުން ލިބުން އެދި ﷲ ގެ ޙަޟްރަތުގައި ގިނަ ގިނައިން ދުޢާ ކުރައްވާށެވެ. އަދި ތިބާގެ ދިރިއުޅުމުގައި ، ތިބާ އާއި އެކު އެ އަނބީން އެވާ ޤުރުބާނީގެ އަގު ވަޒަން ކުރާށެވެ. އެއީ ތިބާގެ ދަރީންގެ ލޯބިވާ މަންމައެވެ. ތިބާގެ އަތުގައި އެކަނބަލުންނަށް ދޭނެ އަގުބޮޑު އެއްޗެހިތަކެއް ނެތެއްކަމަކު ، މިފަދައިން އެކާނބަލުންނަށް ދުޢާއެއް ކޮށްދިނުމަށް ނުކުޅެދިގެންވާ މީހެއްކަމުގައި ތިބާ ނުވާށެވެ. އެހެނީ ތިބާގެ ދުޢާއިން އެކަނބަލުން ނަރަކައިން ސަލާމަތްވެ ޖަންނަތަށް ވަނުމަށް މަގުފަހި ވެދާނެއެވެ.
ފަހެ ތިބާ ، ދުނިޔެމަތީގައި އެކަނބުލޭގެ ލިބުނު ފަދައިން ، ޖަންނަތުގައި ތިބާއަށް އެކަނބުލޭގެ ލިބުމަށް ނޭދެންތޯ އެވެ. ދަންނާށެވެ . ދުނިޔޭގެ އަންހެންތަކުން ޖަންނަތަށް ވަދެއްޖެނަމަ ، އެ ޖަންނަތުގެ ޙޫރުންނަށް ވުރެ ރީތިވެފައި މަތިވެރި ވެގެންވެއެވެ.
