އެއްހަށިގަނޑެއް، އެހެންނަސް މިއަދު ބައެއްގެ ދޫތަކުން ކޮށައި ކުދިކޮށްފި
ކުފުރާއި ޝިރުކަށްފަހު އުންމަތަށް ފާވި އެންމެ ބޮޑު ބަލާވެރިކަމަކީ ، އުއްމަތުގެ އެއްބައިވަންތަކަން ގެއްލުވާލުމެވެ. އަދި މީސްތަކުން ބައިބަޔަށް އަޅައި ބެހުމެވެ. އޭ މިވެނި މީހާއެވެ. ފަހެ ތިބާ ދުނިޔެއަށް އައީ މީސްތަކުންގެ ބޯކޮޅުބަލައި ފާފަތައް ހޯދައި މީހުންގެ އުނިސިފަ ކިޔުމަށްތޯއެވެ. އަދި މީސްތަކުން ސުވަރުގެއާއި ނަރަކައަށް ބަހައި ޙުކުމްޖެހުމަށްތޯއެވެ. ފަހެ އެބައިމީހުންގެ ކަންކަން ބައްލަވައި ޙުކުމް ކުރެއްވުމަށް އެބައިމީހުނަށް ރައްބެއް ވެއެވެ. ވީއިރު ތިބާ އުއްމަތް ނިކަމެތި ކުރުމުގައި ފޫގަޅައި ތިޔަހުރީ ފަހެ ކީއްވެ ހެއްޔެވެ؟ އަދި މީސްތަކުންގެ ޙާލު ނޭނގި ހުރެ މީސްތަކުންނަށް ޙުކުމްޖަހަމުން ތިޔަ ދުވަނީ ކިއްވެ ހެއްޔެވެ؟ ޢިލްމުގެ ކަނޑުގައި ތިބާ އަދި ތަނބިކަށި ތެމޭހިސާބަށްވެސް ނޭރެވެއެވެ. ވީއިރު ޢިލްމީ ބޮޑެތި ބާބުތަކުގައި ތިބާ ފިނާނީ ކޮންފަދައަކުން ހެއްޔެވެ؟
އިސްލާމީ އުންމަތުގެ ޢަދުއްވުން އުއްމަތާ ދެކޮޅަށް ތެދުވެ އެކަތިގަނޑަކަށް ވާއިރު ، އުއްމަތުގެ ތެރެއިން ، ތައުޙީދާއި ޖިހާދަށް ދަޢުވާކޮށް ، ތައުޙީދުގެ ނަމުގައި އުންމަތް ބައިބައި ކުރުމީ ، ޢާއިލާއެއްގެ ތެރޭގައި ހުރެ ދަރިޔަކު ، އޭނާގެ މަންމައާއި ބައްޕަގެ ދިރިއުޅުން ބަރުބާދުކޮށް ޢާއިލާ ރޫޅާލުންފަދަ ކަމެކެވެ.
އޭ އަޚާއެވެ. އުޚްތާއެވެ . ތިބާއަށް ބިނާކުރުމަށް ނޭނގޭނަމަ ، ފަނާ ނުކުރާށެވެ.
وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا ۚ وَاذْكُرُوا نِعْمَتَ اللَّهِ عَلَيْكُمْ إِذْ كُنتُمْ أَعْدَاءً فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَانًا وَكُنتُمْ عَلَىٰ شَفَا حُفْرَةٍ مِّنَ النَّارِ فَأَنقَذَكُم مِّنْهَا ۗ كَذَٰلِكَ يُبَيِّنُ اللَّهُ لَكُمْ آيَاتِهِ لَعَلَّكُمْ تَهْتَدُونَ (آل عمران 103)
"ތިޔަބައިމީހުން އެންމެން اللَّه ގެ دين ގައި ހިފަހައްޓާށެވެ! އަދި، ވަކިވަކިވެ ނުގަންނާށެވެ! އަދި، اللَّه ތިޔަބައިމީހުންނަށް ދެއްވި نعمة ތިޔަބައިމީހުން ހަނދުމަކުރާށެވެ! އެހެނީ، ތިޔަބައިމީހުން عداوة ތެރިން ކަމުގައިވަނިކޮށް، އެކަލާނގެ ތިޔަބައިމީހުންގެ ހިތްތައް އެކުވެރި ކުރެއްވިއެވެ. ދެން، އެކަލާނގެ ދެއްވި نعمة ގެ ސަބަބުން ތިޔަބައިމީހުންނީ أخ ންތަކެއް ކަމުގައި ވެއްޖައީމުއެވެ. އަދި، ތިޔަބައިމީހުން ނަރަކައިގެ ވަޅުގަނޑެއްގެ ތުންފަތްމަތީގައި ވީމުއެވެ. ދެން، އެކަލާނގެ ތިޔަބައިމީހުން އެއިން سلامة ކުރެއްވިއެވެ. اللَّه، އެކަލާނގެ آية ތައް ތިޔަބައިމީހުންނަށް ބަޔާންކޮށްދެއްވަނީ، އެފަދައިންނެވެ. (އެއީ) ތިޔަބައިމީހުން ތެދުމަގު ލިބިގަތުމަށްޓަކައެވެ."
