މިޞްރުގެ މުސްލިމް ދެމަފިރިއަކަށް ލިބުނު"ސާރާ ޙިޖާޒީ" ވަނީ 14 ޖޫން 2020 ގައި ކެނެޑާގައި އަމ
📌 މިޞްރުގެ މުސްލިމް ދެމަފިރިއަކަށް ލިބުނު"ސާރާ ޙިޖާޒީ" ވަނީ 14 ޖޫން 2020 ގައި ކެނެޑާގައި އަމިއްލައަށް މަރުވެފައެވެ.
މުސްލިމެއްގެ ގޮތުގައި ޙަޔާތުގެ ކުރީކޮޅު އުޅުމަށްފަހު، މީސްތަކުންގެ ތެރެއިން އެތައް ބަޔަކު މިއަދު އިސްލާމްދީނުން ނިކުމެ މުރުތައްދު ވަމުންދެއެވެ.އަދި އިންސާނުން ވަލުޖަނަވާރުންނަށް ވުރެ ދަށުދަރަޖައަށް ވެއްޓި އެއްޖިންސުން ގުޅުންހިންގުމަކީ ރީތިކަމަކަށް ހަދައި އެއީ ޙައްޤެއްކަމުގައި މި ދެކެނީ ކޮން ސިކުނޑިއަކުން ބާއެވެ.
މިއަންހެނާއަކީވެސް އެންމެ ފުރަތަމަ ބުރުގާ އަޅައިގެން އުޅުމަށްފަހު ބޮލުން ބުރުގާ އެއްލާލި މީހުންގެ ތެރޭގައި މިއަދު ގުނާލެވިގެންދާ އެކަކެވެ. އޭނާގެ އައުރަ މިސްތަކުންނަށް ނީލަން ކީއެވެ. ހަވާނަފްސަށް ތަބަޢަވީއެވެ. ޝައިޠާނާގެ ގޮވާލުމަށް އިޖާބަދިނީއެވެ. އެއަށްފަހު އަދި މިނިވަންވެވުނު ކަމަކަށް ނުވިއެވެ. އެއްޖިންސުން ގުޅުން ހިންގުމުގެ މުޑުދާރު ޢަމަލު ޒީނަތްތެރި ކުރީއެވެ. އަދި އެއަށް މި ނުބައި އަންހެނާ ވަދެ ޣަރަޤު ވުމުން އެހެންމީހުންވެސް އެމަގަށް ލެންބުމަށް އެފަދަ މީހުންގެ ދިފާޢުގައި ތެދުވެ ވަކާލާތު ކުރަންފެށީއެވެ. ﷲ ގެ ދީނުން ނިކުމެ ހަވާނަަފްސަށް އަޅުކަންކުރަން ފެށީއެވެ. އެހެނީ މިއަންހެނާގެ މަޤުޞަދަކަށް ވީ އޭނާގެ ހިތްހަމަޖެހުން ހޯދުން ކަމުގައެވެ. އަދި މި މުޑުދާރު އަންހެނާ ވިސްނާގޮތަށް އެހެން މީހުން ނުވިސްނުން އަދި އޭނާގެ އެ މުޑުދާރު ޢަމަލާއި މެދު ނުރުހުން ފާޅުކުރުން ވެގެން ދިޔައީ އޭނާއަށް ކުރިމަތިވި ހުރަހަކަށެވެ. އެހެނީ އޭނާގެ ހިތްނުތަނަވަސް ކުރުވުމުވެ.
ނަމަވެސް އަބުރާއި ޢިއްޒަތް ވިއްކާލައި ، މައިންބަފައިން ލަދުގަންނަވާލައި ، އަދި ތިމާގެ ދީންދޫކޮށްލައި ، ދުނިޔެއާއި އާޚިރަތް މިގެއްލުވާލަނީ ފަހެ ކީއްވެބާއެވެ. އަދި މާތްވެގެންވާ އިސްލާމްދީނުގެ މަބްދައުތަކަށް ގޮންޖަހައި ، މިފަދަ މުޑުދާރު ޝިޢާރުތަށް ބޮލަށްލައިގެން މިދުވަނީ ކީއްވެބާއެވެ؟ އަދި އެކަމުގެ ދިފާޢުގައި ތިމާގެ ފުރާނައާއި ނަފްސު ދުއްވާލާއިރު ، އެ ނަފްސު އެ ދުއްވާލެވެނީ ކޮން މަގެއްގަތޯ ވިސްނާނުލަނީ ކީއްވެ ބާއެވެ؟ އަދި މިފަދަ ނަޖިސް ފިކުރުތަކުގެ އަވާގައި ޖެހި އިއްޔެ މުސްލިމެއްގެ ގޮތުގައި އުޅުނު އެތައް މީހަކު މިއަދު ދީނަށް ފުރައްސާރަކޮށް ، ލާދީނިއްޔަތާއި ، އިލްޙާދުގެ ދިދައިގެ ދަށުގައި މަރުވެ ދެއެވެ. އަދި އެލް.ޖީ.ބީ.ޓީ ފަދަ މުޑުދާރު ޖަމާޢަތްތަކުގެ ދިދަ ކަމުގައިވާ ރެއިންބޯ ދިދައިގެ ހިޔާވަހިކަން ހޯދައި ، ފިރިހެނުން އަންހެންދުޅާވެ ، އަންހެނުން ފިރިހެންދުޅާވެގެން ދުވާއިރު މައިންބަފައިން ކޮބައިތޯ އެވެ.
ހަމައެހެންމެ މިއަދުގެ މުޖުތަމަޢު ތަކުގެ ފަސާދަކަން ހުރި މިންވަރަކީ ، މީހަކު އިސްލާމް ދީނާއި ، ދީނުގެ ޝިޢާރުތަކަށް ގޮންޖަހައި ، ފުރައްސާރަކޮށް ، މުރުތައްދުވެ އެތީސްޓެއްގެ ގޮތުގައި ތެޅިބޭލުމަށްފަހު މަރުވުމުން އޭނާގެ އައިޑެންޓިޓީގައި މުސްލިމް ޤައުމަކަށް ނިސްބަތްވުމުން އޭނާގެ ވަކިވުމާއި މެދު ހިތާމަ ފާޅު ކުރުމެވެ. އޭނާގެ ހަނދާންތައް އާކޮށް ހޭޝްޓެގް ޖެހުމެވެ. އަދި އިސްލާމްދީނުގެ މިފަދަ ޢަދާވާތްތެރިންގެ ޙައްޤުޤައި ވަކާލާތުކޮށް ރެޑް ބެލޫން ގެ ރަމްޒުތައް ޖެހުމެވެ.
އެހެނަސް ބަދަލު ނުކުރެވޭ ޙަޤީޤަތެއް ވެއެވެ. އެހެނީ ހިތްހަމަޖެހުން ވަނީ ތިމާ ބޭނުންހާ ގޮތަކަށް ކަންކުރުމުގައެއް ނޫނެވެ. އެހެނެއް ކަމަކު ތިމާގެ ރައްބު އެދިވޮޑި ގަންނަވާ ގޮތަށް ކަންތައް ކުރުމުގައެވެ.
ނިކަން ދެކޭށެވެ. ސާރާ ޙިޖާޒީ ހިތްހަމަޖެހުމާއި މިނިވަންކަން ހޯދުމަށްކަމަށްބުނެ ދަތުރުފެށީ އިސްލާމްދީނުން ނިކުމެގެންނެވެ. އަދި އެދަތުރު ނިންމާލީ އެ ހިތްހަމަޖެހުން ބިމުގައި ނުލިބުމުން އަމިއްލަށް މަރުވެގެންނެވެ. އެހެނީ ﷲ ގެ ޛިކްރުން ( ދީނުން ) މޫނުއަނބުރާލައިފި މީހަކަށް ދުނިޔޭގަވެސް އަދި އާޚިރަތުގަވެސް އުނދަގުލާއި ވޭނާއި ތުރާ މެނުވީ ނެތެވެ. އެމީހެއްގެ އަތުގައި މުދަލާއި ފައިސާ ކިތަންމެ ގިނަކަމުގައި ވިޔަސްމެއެވެ.
وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ ( سورة طه 124) އަދި ތިމަންރަސްކަލާނގެ ޛިކްރަށް ( ދީނަށް ، ފޮތަށް ) ފުރަގަސްދީފިމީހާ (ދަންނާށެވެ!) ފަހެ، ހަމަކަށަވަރުން، އެމީހަކަށްއޮތީ، ދަތި ދިރިއުޅުމެކެވެ. އަދި قيامة ދުވަހުން އެމީހަކު ކަނުމީހެއްގެ ގޮތުގައި محشر އަށް ފޮނުއްވާހުށީމެވެ.
އެހެންކަމުން ލޮބުވެތި ބެލެނިވެރިންނޭވެ. ތިޔަބޭފުޅުންގެ ދަރީންނަށް މިއަދު ހެޔޮތަރުބިއްޔަތު ދޭށެވެ. އަދި އެކުދީން އުޅޭނޫޅޭގޮތް ގާތުން ބަލައި ދިރާސާކުރާށެވެ. އެހެނީ މާދަމާ ދަރިފުޅު ނަރަކައިގައި ، ވޭންދެނިވި ޢަޛާބުގައި ފުރޮޅި ފުރޮޅި އޮންނައިރު އެކުއްޖާ މިނިވަންކުރާކަށް ، އެތަނުން ނެރޭކަށް ، ހިޔުމަންރައިޓެއް ، ޖެންޑާއެއް ، ސަރުކާރެއް ނާންނާނެއެވެ. ޖަހަންނަމައިގެ ޒަބާނިއްޔަ މަލާއިކަތުންގެ އަތުން ތިމާގެ ދަރި ޢަޛާބުގެ ރަޙަ ދެކޭތަން ބަލަން ކެތްވާނީ ކޮން މަޔަކަށްތޯއެވެ. އެދުވަހުގައި ދެން މަރުވުމެއް ނުވެއެވެ.
