އަދި ތިޔަކަނބަލުން، ތިޔަކަނބަލުންގެ ގެތަކުގައި ތިބޭށެވެ.

عَنِ ابْنِ عَبَّاسٍ ، عَنِ النَّبِيِّ صَلَّى اللَّهُ عَلَيْهِ وَسَلَّمَ قَالَ : لاَ يَخْلُوَنَّ رَجُلٌ بِامْرَأَةٍ إِلَّا مَعَ ذِي مَحْرَمٍ فَقَامَ رَجُلٌ ، فَقَالَ : يَا رَسُولَ اللَّهِ ، امْرَأَتِي خَرَجَتْ حَاجَّةً ، وَاكْتُتِبْتُ فِي غَزْوَةِ كَذَا وَكَذَا ، قَالَ : ارْجِعْ فَحُجَّ مَعَ امْرَأَتِكَ (متفق عليه)

އިބްނު ޢައްބާސް ނަބިއްޔާ ﷺ ގެކިބައިން ރިވާކުރައްވާ ގެއްނަވާފައިވެއެވެ. އެކަލޭގެފާނު ޙަދީޘް ކުރެއްވިއެވެ.

”ހިލޭފިރިހެނަކާއި އަންހެނަކު މަޙުރަމަކާއި އެކުގައި މެނުވީ އެކަހެރި ނުވާހުށިކަމެވެ.“ ( އެބަހީ ބައްދަލު ނުކުރާށެވެ.) އެހިނދު ޞަޙާބީންގެ ތެރެއިން ބޭކަލަކު ތެދުވެވަޑައިގެން ދެންނެވިއެވެ : ”އޭ ﷲ ގެ ރަސޫލާ އެވެ. ތިމަންގެ އަންހެނުން ޙައްޖަށް ދިއުމަށް ނިކުމެއްޖެއެވެ.“( ފުރައިފިއެވެ.) ”އަދި ތިމަން ވަނީ އެވެނި މިވެނި ހަނގުރާމައަކަށް ނަންޖައްސާފައެވެ.“ އެކަލޭގެފާނު ޙަދީޘް ކުރެއްވިއެވެ : ”ތިބާ އެނބުރި އަންހެނުންގެ ގާތަށް ދާށެވެ. އަދި އެކަނބުލޭގެއާއި އެކު ޙައްޖު ކުރާށެވެ.“ (މުއްތަފަޤުން ޢަލައިހި ، ލަފްޒުލް ބުޚާރީ ، ޙަދީޘް 4955 )

⭕️ ފަހެ މިއަދު އިންސާނީ ޙައްޤުތަކާއި ، އަންހެނުންގެ ޙައްޤުތަކުގެ ގޮވެލިފަތިތައް ، އިސްލާމްދީނުގެ މަލަމަތި ހުތުރުކުރުމަށް އެބައިމިހުނަށް ކުރެވުނު ކަމެއް ކުރަމުން ދެއެވެ. ނަމަވެސް ކަޅުވިލާގެ ކަޅުކަން ގަދަވިވަރަކަށް ހަނދުގެ ހަނދުވަރު ، ކަޅު އަނދިރިކަމުގެ ތެރޭގައި ފާޅުވެ ބަޔާންވާލެއް ބޮޑުވުން ފިޔަވައި އެހެންކަމެއް ވޭހެއްޔެވެ؟ އެހެނެއްކަމަކު މޮޔައިންނަކަށް އެކަމެއް ނުވިސްނެއެވެ.

އަންހެނާ ހިލޭ ފިރިހެނުންނާއި އެކަހެރިވުން އިސްލާމްދިނުގައި މަނާކޮށްފައި ވާތީ އެއީ އަންހެނާ ކަސްތޮޅު އެޅުންކަމުގައްޔާއި އަދި އޭނާގެ ޙައްޤުތައް ނިގުޅައިގަތުން ކަމުގައި ހުޅަނގާއި އެބައިމީހުންގެ ޕަޕެޓުން ސިފަކުރެއެވެ. ނަމަވެސް އަންހެނާ އޭނާގެ މަޙުރަމަކާއެކު ނޫނީ ހިލޭ ފިރިހެނަކާއި ބައްދަލު ނުކުރާނަމަ ، ދެމަފިރިންގެ ދެމެދުގައި އޮންނަ އިތުބާރު އިތުރުވެއެވެ. ދިރިއުޅުން ބާއްޖަވެރިވެއެވެ. ޢާއިލާގެތެރޭ ހިތްއުފާވެރިކަން ގެނެސް ދެއެވެ. ވަރި މަދުވެ ކައިވެނި ރޫޅުމުގެ ފުރުޞަތު އެތައްގުނައަކަށް ހަނިވެގެން ދެއެވެ. އެކަމުގެ ސަބަބުން އެތައް ދަރިޔަކު މައިންބަފައިންނާއެކު ލޯތްބާއި އަޅާލުމާއި އެކު ބޮޑުވެއެވެ. އެދަރީން ވީއްލިގެން ދިޔުމުގެ ފުރުޞަތު ކުޑަވެއެވެ.

ނަމަވެސް އަނބިމީހާ ، ނުވަތަ ހިލޭ އަންހެނާ ، ހިލޭ ފިރިހެނުންނާއި އެކަހެރިވެ އުޅޭނަމަ ، އެމިހަކާއި މެދުގައި ޝައްކުގެދޮރު ހުޅުވިއްޖެއެވެ. އަދި އޭނާގެ ފިރިމީހާވެސް ، ނުވަތަ މައިންބަފައިންވެސް ހިތްނުތަނަވަސް ކުރުވައެވެ. ދިރިއުޅުމުގެ އުފާވެރިކަން ގެއްލިދެއެވެ. ދެމަފިރިންގެ ދެމެދުގެ ގުޅުން ހީނަރުވެ ، ވާހަކަތައް ޒުވާބަށްވެ އަރައިރުންވުމާއި ނުތަނަވަސްކަމުގެ ތެރޭ ދުވަސްތައް ހޭދަކުރަން ޖެހެއެވެ. ދަރީންގެ ކަންކަމަށް އިހުމާލުވެ ފަރުވާކުޑަވެއެވެ. އަދި ކައިވެނި ރޫޅި އެކަކު އަނެކަކަށް ދަރިންގެ ގާތުގައި ތުހުމަތުގެ އިނގިލި ދިއްކޮށް ބަރީއަވުމަށް މަސައްކަތްކުރެއެވެ. އަދި ދަރީން މަގުމައްޗަށް ގިނަވެ ، މުޖުތަމަޢުއަށް އެދަރީންނަކީ ތުރާލަކަށް ވެދެއެވެ. މުޅި ދިރިއުޅުން ބަރުބާދު ވާފަދައެވެ. ބައެއްމީހުން މާޔޫސްވެ އެންމެފަހުން ކަރުދަންޖެހި މިދުނިޔެ ދޫކުރެއެވެ. މިފަދަ އެތައް ކަމެކެވެ.

އެހެންކަމުން މިފަދަ ހުރިހާކަމަކަށް ހުޅުވޭ މަގުތައް ބަންދު ކުރުމީ ހައްދުފަހަނައެޅުންތޯއެވެ. ތިބާގެ ޙަޔާތުގައި ހޯދުމަށް މަސައްކަތްކުރާ ބާއްޖަވެރިކަން ތިބާއަށް ގެނެސްދިނުމަކީ ޙައްޤުތައް ނިގުޅައިގަތުންތޯ އެވެ. ތިބާގެ އަނދިރިވަމުންދާ ޙަޔާތަށް އަލިކަމެއް ގެނެސްދިނުމަކީ ތިބާއަށް ދޭ ގެއްލުމެއް ތޯއެވެ. ވީއިރު ތިބާ ނަބަވީ އިރުޝާދުތަކުގައި ނުހިފަންވީ ކީއްވެތޯއެވެ. މުސްލިމުން އެބައިމީހުންގެ ނަބިއްޔާގެ އިރުޝާދުތަކަށް ބޯލަނބައި ކިޔަމަންގަތުން އެހެންމީހުނަށްވުރެ އައުލާކަން ބޮޑުވެގެން ވެއެވެ. އަދި އެބައިމީހުންގެ އުރެދުން އެހެންމީހުނަށް ވުރެ ބޮޑުވެގެން ވެއެވެ. ވިސްނާ ފިކުރުކުރާށެވެ.