ފިރިންނަށް ކިޔަމަންތެރި ޞަލިޙު އަނބީންނަށް ހުރި އަޖުރެއްގެ ބޮޑުކަމާއެވެ.
🔰އަސްމާއު ބިންތު އައްސަކަނުލް އަންޞާރީ އަލް އަޝްހަލީ ރަޟިޔަﷲ ޢަންހާ ނަބިއްޔާ ގެ އަރިހަށް ވަޑައިގެން ދެންނެވިއެވެ : އޭ ﷲ ގެ ރަސޫލާ އެވެ. ކަލޭގެފާނަށްޓަކައި ތިމަންގެ މަންމައާއި ބައްޕަ ފިދާއެވެ.
ހަމަކަށަވަރުން ﷲތަޢާލާ ، ކަލޭގެފާނު ފޮނުއްވީ އެންމެހާ ފިރިހެނުންނާއި ، އަންހެނުންގެ ގާތަށެވެ. ފަހެ އަހަރެމެން ކަލޭގެފާނަށާއި ، ކަލޭގެފާނުގެ ވެރި އިލާހަށް އީމާންވީމެވެ. އަހަރެމެން ، އަންހެނުން މިވަނީ ވަކި އިމެއްގައި ހިފެހެއްޓިފައެވެ. އުނިބައެއްގެ ގޮތުގައެވެ. ތިޔަބޭކަލުންގެ ގެތަކުގައި ގަރާރުވެތިބޭ ބައެއްގެ ގޮތުގައެވެ. ތިޔަބޭކަލުންގެ ދަރިން ބަނޑުގައި އުފުލާ ބައެއްގެ ގޮތުގައެވެ. އަދި ހަމަކަށަވަރުން ފިރިހެންވެރީން ، ތިޔަބޭކަލުންވަނީ އަހަރެމެންގެ މައްޗަށް ހުކުރުނަމާދާއި ، ފަރުޟު ނަމާދުގެ ޖަމާޢަތަށް ހާޒިރުވުމުން މަތިވެރި ކުރެވިގެންނެވެ. އަދި ޖަނާޒާތަކަށް ދިޔުމާއި ، ބަލިމީހުނަށް ގޮވާލަން ދިއުމުންނެވެ. ހަމައެހެންމެ ހައްޖަކަށްފަހު ޙައްޖެއް އަދާކުރުމުންނެވެ. އަދި މިއަށްވުރެވެސް މަތިވެރިވެގެން ވަނީ ﷲ ގެ މަގުގައި ޖިހާދުކުރުމުންނެވެ. ފަހެ ތިޔަބޭކަލުންގެ ތެރެއިން މީހަކު ، ޙައްޖަށް ނުވަތަ ޢުމުރާއަށް ނުވަތަ ޖިހާދަށް ނިކުމެއްޖެ ނަމަ ، އަހަރެމެން ތިޔަބޭކަލުންގެ ގޭގައި ތިބެމުއެވެ. ތިޔަބޭކަލުންގެ މުދަލަށް ރައްކާތެރިވަމެވެ. އަދި ތިޔަބޭކަލުންގެ ދަރީން ތަރުބިއްޔަތު ކުރަމުއެވެ. އަދި ތިޔަބޭކަލުންގެ ހެދުންތައް ފަހަމެވެ.
ފަހެ ތިޔަބޭކަލުންނަށް ﷲތަޢާލާ ދެއްވި ހެވާއި އަޖުރުގައި އަހަރުމެން (އަންހެންކަނބަލުން) ބައިވެރި ނުކުރާނަން ހެއްޔެވެ؟
އެހިނދު ނަބިއްޔާ ﷺ އެނބުރިލަމުން ޙަދީޘްކުރެއްވިއެވެ. : އަންހެނަކު އޭނާގެ ދީނުގެ ކަންކަމާއި ބެހޭގޮތުން މިއަށްވުރެ ހެޔޮ ސުވާލެއް ކުރި އަންހެނަކު ތިޔަބޭކަލުން ދެނެލެއްވީމުހެއްޔެވެ؟
އެހިނދު އެބޭކަލުން ދެންނެވިއެވެ. : އަންހެނަކު މިފަދަ (ފުރިހަމަ) ސުވާލެއް ކޮށްފާނެކަމަށް ، ތިމަންމެން ހީނުކުރަމެވެ.
އެހިނދު ނަބިއްޔާﷺ ޙަދީޘްކުރެއްވިއެވެ.:އޭ އަސްމާއެވެ. ތިމަންކަލޭގެފާނު ކިބައިން ދެނެގަންނާށެވެ. ކަމަނާގެ ފަހަތުގައިވާ އަންހެން ކަނބަލުންނަށް ޚަބަރުކުރައްވާށެވެ. އަންހެނާ އޭނާގެ ފިރިމީހާއަށް ހެޔޮކޮށް ހިތައި އަދި ފިރިމީހާގެ ރުހުން ހޯދުމަށް އެދި ފިރިމީހާ ހިތް އެދޭކަންތައްތަކަށް ތަބާވާމީހާ އެހުރިހާ ކަމަކާއި އެއްވަރުވެގެން ވެއެވެ."
އެހިނދު އެކަމަނާ ތަހުލީލާއި ތަކުބީރު ކިޔުއްވަމުން އެނބުރި ވަޑައިގަތެވެ. އަދި މިފަދައިން ތަކުރާރު ކުރައްވަމުން ގެންދެވިއެވެ.
" އެހުރިހާ ކަމަކާއި އެއްވަރުވެގެން ވެއެވެ. އެހުރިހާ ކަމަކާއި އެއްވަރުވެގެން ވެއެވެ." [އަލް ބައިހަޤީ ، ފީ ޝުޢަބިލް އީމާން]
ނޯޓް : އިމާމް ބައިހަގީގެ ރިވާޔަތް ގިނަމުޙައްދިޘުން ޟަޢީފް ކުރައްވައެވެ. ނަމަވެސް މިހަދީސް އިބްނު އަބިއްދުންޔާ، ރަނގަޅު ސަނަދަކުން ގެންނަވާފައި ވެއެވެ. އަދި އެއިން މިއަށް ބާރުދެއެވެ.
