އެކަމަކު ދޯ!
އެންމެ ފުރަތަމަދުވަހު ތުނބުޅިން އިސްތަށިކޮށީ އަކީ ކޮށާކަށް ނޫނެވެ. އަތުގައި އޮތް ކަތުރު ތޫނުތޯ ބަލާލުމަށެވެ. ނިމުނުއިރު އެހެރަ ދިގު ތުނބުޅިއެކޭ ގެއެއްގެ ދޮރުމަތީ އިންދާފައި އޮތް ވިނަގަނޑެކޭ ދިގުމިނުގައި ތަފާތެއްނެތެވެ. ކޮށާފައި ހުރިލެއް އެއްވަރުކަމާއި ރީތިކަމުގެ ސަބަބުން އަދި ދީނުގެ މެދުމިނަށް އާދެވުމުގެ ސަބަބުން ލިބުނު ހިތްހަމަޖެހުން ބުނާކަށް ނޭންގެއެވެ. އާނއެކެވެ. ތުނބުޅި ދިގުކޮށްފައި ތިބޭނީ ހަމަ ހައްދު ފަހަނައަޅާފައި ތިބޭ މީހުންނެވެ. ކަޓު މުއްލާއިންނެވެ.
ނަމާދުކުރުމުގައި ހަމަ މި މެދުމިންގަނޑު ގެންގުޅެވޭތޯ ހާދަ މަސައްކަތް ކުރަމެވެ. ދެ ނަމާދު ކުރީޔާއި ތިންވަނަ ނަމާދު އޮންނަނީ ނުކުރެވިއެވެ. ނުކުރާކަށް ނޫނެވެ. އަދި ފަހުން ޤަޟާކުރަން ވަގުތު އޮތީމަ ލަސްކޮށްލައިގެން ހުރީއެވެ. މީހަކު ކިޔާހައި އެއްޗަކަށް ބަލަންވީ ކީއްކުރަންހެއްޔެވެ؟ އަހަރެން ސިކުނޑި ދޮވެލާކަށް ނެތީމެވެ. ފަސްވަގުތު ނަމާދު ކޮށްގެން މާ ކުރީގެ މީގެ ސާދަސަތޭކަ އަހަރުކުރީގެ ގޮތްގޮތަށް އެއުޅެނީ " ބުރެއިން ވޮސެޑް " ވެފައި ތިބޭ މީހުންނެވެ. އަންހެނުންވެސް މޫނުބުރުގާ އެޅުވުމަށްފަހު މެދުމިނަށް ތިރިކޮށްލުމަށްޓަކައި ޖިންސާއި ޓޮޕަށް ހާދަ ބަދަލުކުރާ ހިތްވެއެވެ. އެކަމަކު އޭރުން މީހުން ހާދަ މަލާމާތެއް ކުރާނެއެވެ. އަހަރެންގެ އީމާންތެރިކަމެއް ނެތް ކަމަށް ބުނެފާނެއެވެ. އެހެންބުންޏަސް ހެޔޮތާއެވެ. އަހަރެންގެ އީމާންތެރިކަން އޮތީ ހިތުގައެވެ. ނުހަނު ތާޒާކޮށެވެ. ބައެއް ފަހަރަށް ކުޑަކޮށް ބަލިކަށިވެލާ ފަހަރު ހައެއްކަ ވައްތަރުގެ ސަރާބާއި ވައިން ބޯލެވުނަސް މެއެވެ. އެކަމަކު އަދި އެއްވާހަކަ އެބައޮތެވެ. އަންހެނުންގެ މޫނުބުރުގާ ކުރިން ދުވަހު ނަގައިފިއެވެ. ފަސްނަމާދުކޮށްގެން ސުންނަތަށޭ ބުނެ ބުރެއިން ވޮށެޑް ވެފައި ހުރިއިރު އެއީ ވާޖިބޭ ބުނެވުނަސް މިހާރު ފާޑު ފާޑު ބުއިން ތައް ބޯލާ ހޭ ޖެހުނު ދުވަހު އެއީ އަންހެނުންގެ ހައްގު ނިގުޅައިގަންނަން ގެންގުޅޭ އެއްޗެއްކަން މިއިނގުނީ އަދި ކިރިޔާއެވެ. ކޮން މޫނު ބުރުގަލެއް ބުރުގަލެއް ސުންނަތެއް އިސްލާމްދީނެއް ހެއްޔެވެ؟ ރުޅި އައިސްގެން އެހެން ބުނެވުނަސް އަދިވެސް އަހަރެންނަކީ ހަމަ އިސްލާމެކެވެ. އަހަރެން ލޯބިވަނީ ހަމަ އިސްލާމް ދީން ދެކިއެވެ.
ފާފަކުރެވިދާނެތީ ގެޔަށް ޓީވީ ނުލާންވެސް ހާދަހިތްވަރެއް ކުރީމެވެ. އެކަމަކު އަޅުގަނޑުގެ ބަފައިކަލުން އިބްލީސްބޭބެ އެއީ އެއްގޮތަކަށްވެސް ކަމުދާ ހިޔާލެއް ނޫންކަމަށް ހިޔާލު ދީ، ދަރިން ޖާހިލުކަންމަތީގައި ބޮޑުވެދާނެކަމަށް ބުނެ ޓީވީ ލުމަށް އެހެރަ ދަނީ އަބަދުވެސް ނަސީހަތްދެމުންނެވެ. ވީމާ ސާޅީހަކަށް އިންޗީގެ ހައެއްކަ ޓީވާއާއި އިނގިރޭސި ފިލްމުގެ ޔެލޯ ބުލޫ ރެޑް ކެޓަގަރީގެ ހުރިހާ ފިލުމުތަކަކުން ގޭ ފުރާލަދިނީމެވެ. ހުރިހާ އެއްޗެއް އެހެރީ އަތްފޯރާ ފަށުގައެވެ. އެކަމަކު އެކުދިންވެސް ކިޔަވާކަށް ނޫޅެއެވެ. އެކަކު ވަޅަށް ފުންމާލާފައި އެއްދުވަހަކު ތިމަންނާ މިހިރީ ސުވަރުގޭގަޔޭވެސް ކިޔައިފިއެވެ.
އަދި އެވަރުން ނުވެގެން އަންހެނުންބަލާ ހިންދީ ޑުރާމާތަކުގައި ހުންނަ ކަހަލަ ދެފައި ވައްކޮށްގެން އިންނަ ބުދެއް ގޭގެ ސިޓިންރޫމުގައި ބައިންދަ ދީފައިވެސް ހުންނާނެއެވެ. އަންހެނުން ޔޯގާ ހަދަން ބުދުކުރުމަތީ ދެލޯމަރާލައިގެން ދެއަތް މޭގައި ޖައްސައިގެން އެއިންނަ އިރު ހާދަހާވައި ހިތްގައިމެވެ. ބައެއްފަހަރު އެތަނުގައި ފާޑުފާޑުގެ ދުންބުރުވައި ދެއަތް ނަގައިގެން ލޯމަރައިގެން ތިބޭ އިރު ހާދަހައިވާ ސަޅިއެވެ. ކުރީގެ މުސްކުޅި ކަޓު ހިޔާލުގެ ރަހުމަތްތެރިޔަކު އެއީ ސަރީކު ކުރުން ކަމަށް ބުނުމުން، އައި ރުޅިން އޭނާގެ މޫނަށް ކުޅު ނުޖެހުނީ ހަމަކިރިޔާއެވެ. ކޮންތާކުހެއްޔެވެ؟ އީމާންތެރިކަން އޮންނަން ޖެހޭނީ ހިތުގައެވެ. އަތާފަޔާއި ބޭރުފުށަކު ނޫނެވެ. ހިތްދެއްކޭ ނަމަ އަހަރެމެންގެ ހިތުގައު މިއޮތް ތާޒާ އީމާންތެރިކަން ދައްކައިވެސް ލައިފާނަމެވެ.
ކުރިން ނުބަލާން އުޅުނު އިނގިރޭސި ކުލަކުލައިގެ ފިލުމުތަކާއި ޑުރާމާތައްވެސް ބަލަން ފެށިފަހުން ހަގީގީ ފިރިހެނުން ތިބޭނީ ހިތްތަލަހެން ތުނބުޅި ބާލައި އޮމާންކޮށްލާފައި ކަން އެނގެންފަށައިފިއެވެ. ދުނިޔެ މިއިނގެނީ ދުނިޔެ ހޯދަން ފެށީމައެވެ. ފިލްމީތަރިން އާނޯޑު ކަހަލަ ފިލްމީ ތަރިން ތުނބުޅި ބާލާފައި ތިބޭއިރު ހާދަ ޓަފެވެ. ފިރިހެނުންނަކީ އެއީއެވެ. އަނެއްކާ މިތުނބުޅި ގަނޑެއް ދިގުކުރި ފަހުން މަގޭ އެހެރަ ރީތި ސޫރަ ގެއްލިއްޖެއެވެ. މަޖީދީ މަގުން ސައިކަލުގައި ދާއިރު ކަޅިއަޅަމުން އައި އަންހެންކުދިންތައްވެސް ބެލުން ހުއްޓާލީ މިއެއް ދިގުކުރި ފަހުންނެވެ. ގެޔަށް ބައިނަލްއަގުވާމީ ކުނިގޮނޑު ( އިންޓަރނެޓު)ވެސް ގުޅައި ޒަމާނީ ވެލީމެވެ. ދެން އަންހެނުންނާއެކު ސެލޫނަށް ދާން ފަށަންވީތާއެވެ.
ދެގަޑި އިރަށް ފަސްސަތޭކައެއްހާ ޑޮލަރަށް އެޕޮއިންޓުމަންޓު ހަމަޖެހިއްޖެއެވެ.އަގުވެސް ބޮޑޭ ހިތަށްއެރިއެވެ. މިހާރުގެ ސެލޫންތައް ޒަމާނީކަމުން އަގުބޮޑުވީތާއެވެ. ގައިމު އަހަރެމެން އެންމެފަހުންވެސް ބޯކޮށާ އުޅުނީ ދިހަ ރުފިޔާއަށެވެ. އެކަމަކު ޒަމާނީ ވަންޏާ ބޮޑު އަގު ދައްކަންޖެހުމަކީ މައްސަލައެއްނޫނެވެ. ވަރަށް ނަލަވެލައިގެން ސެލޫނަށް ހިނގައްޖައީމެވެ. އަޖައިބުން އަންތަރީހެވެ. އެއީ ސެލޫނެއް ނޫނެވެ. ބޮޑު ހޮޓަލެކެވެ. ވަންނަ އިރަށް އަތުގައި ހިފައިގެން ކޮޓަރިއަކަށް އެގެންދަނީ ތައިލެންޑު ދޮން އަންހެންކުދިންނެވެ.
ކޮޓަރިއަށް ވަނުމާއެކު އެޕޮއިންމަންޓު ފެށިއްޖެއެވެ. ތުނބުޅި ބާލައިދިނެވެ. ބޯވެސް ކުޑަކޮށް ކަޅުކޮށްލާ މަސާޖުކޮށްލަދިނެވެ. ތައިލެންޑު ތަމްރީނު ލިބިފައި ލިބިފައި ތިބޭއަންހެން ކުދިންތައް ހާދަމޮޅޭ ހިތަށް އެރިއެވެ. ބޯކޮށަން އައެއްކަމަކު ފިރިއަކަށް ބޭނުންވާނެ ހުރިހާ ހިދުމަތެއް އަންބަކު ފަދައިން އެދެނީއެވެ. ހާދަވާ ހެޔޮކުދިންތަކެކެވެ.
ލޯގަނޑުން މޫނުބަލައިލިއިރު ވާ ސަރީވާ އޭ ކިޔައި ހަޅޭއްލަވައިގަނެވުނެވެ. ހާދަ ޒުވާން ކަމަށް ދައްކައެވެ. މިއަންނަ އަހަރު ކޮންމެހެންވެސް ބެންކޮކަށް ދާން ޖެހުނީތާއެވެ.
އަންހެނުންނަށް ސަޕްރައިޒެއް ދޭންވެގެން އަވަހަށް ގެޔާއި ދިމާއަށް ދުއްވައިގަތީމެވެ. ސައިކަލުގައި ގެޔަށް ތަންކޮޅެއް އަވަހަށް ދެވުނުހެން ހީވެއެވެ. ސަބަބަކީ ތުނބުޅި ބޭލުމުން ތުނބުޅީގައި ވައި އަޅާލެއް ކުޑަވުމެވެ. ސައިންސުގެ ގޮތުން ބަލާއިރުވެސް ތުނބުލި ބޭލުމުން ފައިދާ ކުރާކަން އެހެރަ ސާބިތުވަނީތާއެވެ.
ގެޔަށް ދިޔައިރު ހުރީ ބަންގި ގޮވާފައެވެ. ނަމާދު ކުރަން ހިތަށްއެރިއެވެ. އެކަމަކު ސެލޫނުން އައިސް އަދި މިހުރެވެނީ ހިނައި ނުގަނެއެވެ. ކޮން ހިނެއުމެއް ހިނާކަށްހެއްޔޭ ހިތަށް އެރިއެވެ.
އަންހެނުން ކޮބައިތޯ ބެލިއިރު އަންހެނުން ވީ ރޭގަނޑު ފުލައިޓުން ސިންގަޕޫރަށް ބާޒާރުކުރަންގޮހެވެ. ނުވެސް ބުނެއެވެ. ކުޑަކޮށް ރުންކުރުވާ ގޮތްވިއެވެ.
ގޭގައި ގެންގުޅޭ ބަންގާޅީ ސޮރު ކޮބައިތޯ ބެލިއިރު އަންހެނުން ދިޔައީ އޭނާވެސް ގޮވައިގެންނެވެ. ސައްކުވާތާ ވަރަށް ދުވަސްވެއްޖެއެވެ. އެކަމަކު... އެކަމަކު އެއީ ޒަމާނީ ގޮތްތާދޯއެވެ.
އެނދުމަތީގައި ބާއްވާފައި އޮތް ނޯޓެއް ފެނިގެން ބެލިއިރު އޭގައި އޮތީ އަންހެނުންގެ މެސެޖެކެވެ. ކިޔާ ނިމުނު އިރު ދެކަމު ހާޖަތަށް ދެވި ލޮލުން ކަރުނަ ފައިބަމުން ދިޔައެވެ. ތިން ދުވަސްތެރޭ އޭނާ އަންހެނުންނަށް ފަތްލިޔެދީފައިވާ ގެއިން ނުކުތުމަށް އަންގާފައި އޮތް ނޯޓެކެވެ. މާ މުސްކުޅި ކަމުން ފިރިމީހާ ދޫކޮށްލުމަށްފަހު ގޭގައި ގެންގުޅޭ ބަންގާޅީ މީހާއާއި އިންނަ ވާހަކަ އޮތް ޖުމްލަ ކިޔާ ނިންމާލިއިރު ވާނެ ހައެއްޗެއް އޮތީ ވެ ނިމިފައެވެ. ދީންވެސް، އަންހެނުންވެސް، ދަރިންކޮޅުވެސް އެންމެ ފަހުން ގެގަނޑުވެސް ގެއްލުނީއެވެ. ކަތިވަޅިގެއްލި މަރިޔަނބު ގެއްލި އަދި ކޮށިދަނޑުވެސް ގެއްލުނީއެވެ.” އެކަމަކު ދޯ...... ނުވިސްނުނީމަ ވީ ގޮތް...“
