މުއުމިނު އަޅާއަށް ކަށްވަޅުގައިވާ ގާތް އެކުވެރިއެކެވެ. ޖަންނަތުންވާ ދޮރުކޮޅެކެވެ.
♻️ ޒަމާން ފަސްވެ ނުބައިކަންތައް ޒީނަތްތެރި ވެއްޖެއެވެ. ރަމަޟާންމަސް ބޯމަތިވެއްޖެއެވެ. އެމަހަށް ދިވެހިން ތައްޔާރުވަނީ އެއީ ހަމަ މާތްނަބިއްޔާ ﷺ ގެ ސުންނަތުގައިވާ ގޮތްތޯއެވެ. ނުވަތަ އެއަށްފަހު އުޅުއްވި މާތް ޞަޙާބީންނާއި ، ސަލަފުއްޞާލިޙުންގެ ގޮތްތޯއެވެ. ނޫނެކެވެ. އޭގެން އެއްވެސްބަޔަކާ މި ނުބައި އާދާތަކާއި ގުޅުމެއް ނެތެވެ. އެހެނަސް މިއީ ބަޔަކުމީހުން އެބައިމީހުންގެ ހަވާނަފްސު ރުއްސުމަށް ކުރާމަސައްކަތްތަކެކެވެ. އަދި ޝައިޠާނާގެ ޒީނަތްތެރި ކުރުމެކެވެ. ނިކަން ދެކޭށެވެ. ﷲ ގެ ދަރުބާރުގައި މި ބަރަކާތްތެރި މައްސަރަށް ތައްޔާރުވެފައިވަނީ ، އެމަހުގެ ކޮންމެ ރެޔަކު އެއިލާހުގެ އެތައްއަޅުތަކުންނެއް ނަރަކައިން މުއްތި ކުރެއްވުމަށެވެ. ޖަންނަތުގެ ދަރަޖަތަކަށް އުފެއްލެވުމަށެވެ. އެތައްދުވަހަކު އަޅުތަކުން ކޮށްފައިވާ ފާފަތައް ފުއްސަވައި އެހިތްތަކަށް އެއިލާހުގެ ފުއްސެވުން ވާކަން ހަނދުމަ ކޮށްދެއްވުމަށެވެ. ނަރަކައިގެ ދޮރުތައް ބަންދުކުރެވިގެން ވާ ޙާލު ޖަންނަތުގެ ދޮރުކޮޅުތައް ހުޅުވިގެންދާ ގޮތުގައެވެ. ޖިންނިޝައިޠާނުތައް ކަސްތޮޅުއެޅުވުމަށެވެ.
ނަމަވެސް %100 މުސްލިމުން ކަމަށް ބުނާ އަޅުގަނޑުމެން ދިވެހިން ތައްޔާރުވަނީ ، ﷲ ގެ ދަރުބާރުގެ ތައްޔާރީތަކާއި މުނާސަބު ގޮތަކަށްތޯއެވެ. ތިބާ ތިބާގެ ތައްޔާރީތަކާއި ބެހޭގޮތުން އަމިއްލަ ނަފްސާ ސުވާލުކޮށްލާށެވެ. ގޭގެ ދެފަރާތުން ކުލަލައި އާކުރަނީއެވެ. ސިޓިންގރޫމާއި ކާގެ ކުރެވެންހުރި އެންމެބޮޑަކަށް ޒީނަތްތެރި ކުރަނީއެވެ. ކެއްކުމަށް ބޭނުންވާނެ އެންމެ ފަހުގެ މޮޅު އާލާތްތައް ، ބާޒާރުގެ ހުރިތާކުން ހޯދައި ގަނެ ހަމަކުރަނީއެވެ. ސިޓިންގ ރޫމުގައި ބެހެއްޓުމަށް ލިބެންހުރި އެންމެބޮޑު ސައިޒުގެ ޓީވީއެއް ހޯދަނީއެވެ. ދުވާލު ޑިގުކުޅެ ރާޒުވާ ކުޅޭނެ މޭޒާއި ހަޓު ހަދާއިރު ، ތޮއްޖެހި ޖާގަނެތް ތަންތަނުގެ މީހުން ބަލަނީ ގޭމްކުޅޭނެ ސާމާނު ހޯދައި އަށްޑާ ހެދުމަށެވެ. އަނެއްބަޔަކު ސައިކަލު ބުރުޖެހުމަށް ،ސައިކަލުތައްދޮވެ ކުލައާކޮށް ، ދުވާލު ވަގަށްކާނެ ތަންތަން ހޯދުމަށެވެ.
ވިޔަފާރިވެރިން ފުރުޞަތުގެ ބޭނުން ހިފައި ކާބޯތަކެތި އަގުބޮޑު ކޮށްލައެވެ. ހެޔޮކަމުގެ މައްސަރު މީސްތަކުންނަށް ހެޔޮފޯރު ކޮށްދިނުމުގެ ބަދަލުގައި ދުނިޔެ ހިތަކަށްލިބި އެއްފަހަރުން މުއްސަނދިވާން އުޅޭކަހަލައެވެ. ޓީވީތަކާއި ރޭޑިޔޯތައް ލަވަޔާއި މިޔުޒިކް ، ކުރުފިލްމާއި ދިގުފިލްމު ، ބޮޑުބެރާއި ދަންބެރު އަދި ކުރުވާހަކައާއި ، ލޯބީގެ ދަރުބާރުފަދަ ޝައިޠާނީ ގިގުނިތަކުން ފުރާލައެވެ.
ޒުވާނުން ފުޓްސެލް މުބާރާތްތަކާއި ވޮލީ އަދި ބައިބަލާ މުބާރާތްތަކަށް ތައްޔާރުވުމުގައެވެ. ހިވާގޮތުން މިޒަމާނުގެ އިސްލާމީ ފުތޫޙާތުތައް އޮތީ ފުޓްބޯޅައާއި ބައިބަލާ ފަދަ ކުޅިވަރާއި ނާޗަރަނގީގައެވެ.
ކުރުކޮށް ބުނާނަމަ މުނިފޫހި ފިލުވުން އެއީ މުޅި ރަމަޟާންމަހުގަ ޙާސިލްކުރަންޖެހޭ ލަނޑުދަނޑިކަމަށް ވެއްޖެއެވެ. ފާއިތުވި 11 މަސްދުވަހު މީސްތަކުން ހޭބޯނާރައި އަޅުކަމުގައި އުޅެ ވަރުބަލިވީއެވެ. މިބައިމީހުންނަށް އަޅުކަމުން ޗުއްޓީއެއް ލިބުނީބާއެވެ. ނުވަތަ ފާފަކުރަން ހުއްދަދެވުނީ ބާއެވެ. ހަމައެކަނި ފާފަކުރުމެއްވެސް ނޫނެވެ.އޭގެވެސް އެންމެ ފުނަށް ޝައިޠާނާއާއެކީ ދެވޭތޯ ބަލަނީއެވެ.
އެހެނީ ރަނާ ، ޖަވާހިރާއި ޔާގޫތުގެ ބަގީޗާއެއްގެ ތެރެއިން މީހަކު ހުރަސްކުރާއިރު ހުސްއަތާ އައުމުން ، ސުވާލުކުރާމީހަކު ސުވާލުކުރާފަދައެވެ.ތިބާ އެބަގީޗާއިން ނިކުތްއިރު ކިހާ ޖަވާހިރެއް ގެނައިން ހެއްޔެވެ؟ އެހިނދު ތިބާ ސުމެކޭބުނަން ލަދުގަނެއެވެ. ޢަދަދުގެ ގޮތަކުން ނޫނެވެ. އެހެނަސް ދޫކޮށްލާފައި މިއާދެވުނީ ކިހާ އަގުބޮޑު އެއްޗެއްކަން އެނގުމުންނެވެ.
މިއަދު އަޅުގަނޑުމެންގެ ތެރެއިން ގިނަމީހުނީ މިފަދަ ގޮތަކަށް ރަމަޟާންމަސް ހޭދަކޮށްލާ މީހުނެވެ. ވީއިރު ނަޖާވާނީ ކޮންފަދައަކުންތޯއެވެ. 1000 މައްސަރަށްވުރެ ހެޔޮކަންބޮޑު ލައިލަތުލްޤަދްރި ވިލޭރޭގެ މަތިވެރި ދަރަޖައިން މަޙުރޫމުވުމުންނެވެ. ހަމައެކަނި ރޭގަނޑެއްކަމުގަ ވުމަކުން ނޫނެވެ.އެހެނަސް އެ ރެއެއްގައި އެންމެ މާތް ފޮތް ބާވައިލައްވަން ފެއްޓެވުމުންނެވެ. ހަމައެކަނި އެންމެ މާތް ފޮތަށް ވުމަކުންވެސް ނޫނެވެ. އެފޮތުގައި ވަނީ އެންމެ މާތް އަދި މަތިވެރިވަންތަ ، ރަޙުމާންވަންތަ ، ޢަރުޝީގެ ވެރިއިލާހު ﷲ ތަބާރާކަވަތަޢާލާގެ ބަސްފުޅުކަމުގައި ވުމުންނެވެ. ފަހެ ލަވަޔާއި މިޔުޒިކާއި ، ފިލްމާއި ޑްރާމާ ސިރީސްތައް ، ތިބާ މިޤުރުއާން އަޑުއެހުމުން މަޙުރޫމް ކުރުވައިފިއެވެ. ހުރިހިތާމައެއްގެ ބޮޑުކަމާއެވެ.
