ކުރިފަދައިން ކޮށްފިއެވެ.
🔳 "دِقَّةً بِدِقَّةٍ وَلَو زِدتَ لَزَادَ السَّقَّاء" 🔳 [[ކުރިފަދައިން ކޮށްފިއެވެ. ތިބާ އިތުރުކުރިނަމަ ، ފެން ވިއްކާމީހާވެސް އިތުރު ކުރީހެވެ.]]
1️⃣ އިރާޤުގެ އުތުރުން އޮންނަ މޫސަލްގެ ޞާލިޙު ވިޔަފާރިވެރިއެކެވެ. މި ވިޔަފާރިވެރިއަށް ފިރިހެން ދަރިއަކާއި އަންހެން ދަރިއެއް ލިބިފައިވެއެވެ. ދަރިން ޒުވާން އުމުރަށް އަޅައިފިއެވެ. ނަމަވެސް އޭރު އެކުދިންގެ ބައްޕަ ވަނީ އުމުރުން ދުވަސްވެ މުސްކުޅިވެފައެވެ. ދަތުރު ފަތުރު ކޮށްއުޅުމަށް ދަތިވެފައެވެ. އެހެންކަމުން އޭނާގެ ފިރިހެންދަރިފުޅު ވިޔަފާރި ޤާފިލާގައި ފޮނުވުމަށް ނިންމެވިއެވެ. އަދި ވަޞިއްޔަތް ކުރަމުން ބުންޏެވެ. "އޭ ދަރިފުޅާއެވެ. ތިބާގެ އުޚްތާގެ ޢިއްފަތަށް ރައްކާތެރިވައްޗެވެ."
އެޒުވާނާ ވިޔަފާރިފަރި ދަތުރުގޮސް އުޅުމުގެ ތެރޭގައި އެއްދުވަހަކު ޒުވާން އަންހެނަކު ފެނި ،ޝައިޠާނާގެ ވަސްވާސްތައް ފެތުރިގަތެވެ. އަދި އެއަންހެނާގެ ކައިރިއަށްގޮސް ދޮނެއް ނެގިއެވެ. ނަމަވެސް ލަސްތަކެއްނުވެ ކުރެވުނު ނުބައިކަންތައް ހަނދުމަވެ އެ އަންހެނާގެ ގާތުން ދުރަށްދިޔައެވެ. އަދި ކުރެވުނު ފާފައަށް ތައުބާވެ އިސްތިޣްފާރު ކުރިއެވެ.
2️⃣ އާދަކާދައިގެމަތިން ޢިރާޤުގެ މި ވިޔަފާރި ވެރިޔާގެ ގެއަށް ފެންވިއްކަން އަންނަ ހެޔޮލަފާ ސާޤީއެކެވެ. އޭނާ އެގެއަށް ފެންވިއްކާތާ އެތަކެއް އަހަރެއް ވެއްޖެއެވެ. އެއްދުވަހަކު ފެންވިއްކާމީހާ އެގެއަށް އައިސް ފެންރުނބަޔަށް ފެންއަޅާފައި ދަމުން ، އެ ޞާލިޙު ވިޔަފާރިވެރިޔާގެ އަންހެން ދަރީގެ ކިބައިން ދޮނެއް ނަގައިފިއެވެ. އެކަން ހިނގީ ފެންވިއްކާމީހާ ނިކުތުމުން ދޮރުލެއްޕުމަށް އެ ޒުވާން އަންހެންކުއްޖާ އައިސް މަޑުކޮށްގެން ހުއްޓައެވެ. ފެންވިއްކާމީހާގެ ބޭ އިޚްތިޔާރު ގައެވެ. އެހިނދު އެ އަންހެންކުއްޖާގެ މުސްކުޅި ބައްޕަ ގޭތެރޭގެ ކަނެއްގައި އިށީނދެގެން ބަލަހައްޓައިގެން ހުއްޓެވެ.
އެހިނދު ، އޭނާގެ ފިރިހެން ދަރިފުޅު ވިޔަފާރި ދަތުރުގައި ކަމެއް ކޮށްފިކަން ޔަޤީންވެއްޖެއެވެ. އެހެނީ މިއީ އޭގެ ބަދަލެވެ. އެހެންކަމުން ފިރިހެންދަރިފުޅު ވިޔަފާރި ޤާފިލާއާއިގެން އަންނާނެ ދުވަހަކަށް އިންތިޒާރުކޮށްގެން ހުއްޓެވެ. ދުވަސްކޮޅަކަށްފަހު މި ޞާލިޙު ވިޔަފާރިވެރިޔާގެ ފިރިހެންދަރި ޤާފިލާއާއިގެން އެނބުރި ޢިރާޤަށް އައިއްސިއެވެ. އަދި ގެއަށްވަދެ ދަތުރުވަރުބަލި ފިލުވައިހެދުމުން ، ދަތުރާއިބެހޭގޮތުން އެ ޒުވާނާގެ ބައްޕަ ސުވާލު ކުރަންފަށައިފިއެވެ. އެހިނދު ދަތުރުގެ ކަންކަން ވަރަށް ފުރިހަމަކަށާއި ވިޔަފާރވެސް ރަނގަޅުކަމަށް ބުންޏެވެ. އަނެއްކާވެސް ތަކުރާރުކޮށް ސުވާލުކުރުމުންވެސް ލިބުނީ ހަމަ މިޖަވާބެވެ. އެހިނދު މި ޞާލިޙު ބައްޕަ އޭނާގެ ދަރިފުޅުކައިރީ އެހިއެވެ. ދަރިފުޅު އެއްވެސް އަންހެނެއްގެ ޢިއްފަތަށް އަރައިގަތީމުތޯއެވެ. އެހިނދު އެޒުވާނާއަށް އޭނާގެ އަންހެން ކޮއްކޮގެ ޢިއްފަތަށްވެސް މީހަކު އަރައިގަނެފިކަން ޔަޤީންވިއެވެ. އަދި ދަތުރުމަތީގައި ދިމާވިކަންތައް ތަފްޞީލުކޮށް ބައްޕައަށް ކިޔައިދިނެވެ. އެހިނދު ޞާލިޙު އެބައްޕަ އެނާގެ ޒުވާން ދަރިފުޅަށް ބުންޏެވެ. "(ތިބާ) ކުރިފަދައިން ކޮށްފިއެވެ. ތިބާ ، އިތުރުކުރިނަމަ ފެންވިއްކާމީހާވެސް އިތުރު ކުރީހެވެ."
📌 ނަމަވެސް މިއަދު އަޅުގަނޑުމެންގެ ތެރޭގައި މިފަދަ ޞާލިޙު ބައްޕައިން ވަރަށް މަދުވެއްޖެއެވެ. މިފަދަ ޞާލިޙުން ފިރިން ވަރަށް މަދުވެއްޖެއެވެ. މިފަދަ ޞާލިޙު ދަރިން އިންތިހާއަށް މަދުވެއްޖެއެވެ.
އޭ މުސްލިމް އަޚާއެވެ.
⭕️ ތިބާ އެހެން އަންހެނުންގެ ޢިއްފަތަށް އަރައިގަންނަނަަމަ ، ތިބާގެ އަންހެނުންގެ ޢިއްފަތަށް ވެސް އެހެންމީހުން އަރައިގަންނާނެ އެވެ.
⭕️ ތިބާ އެހެންމީހުންގެ އަންހެންދަރިންގެ ޢިއްފަތަށް އަރައިގަންނަ ނަމަ ތިބާގެ އަންހެން ދަރީގެ ޢިއްފަތަށްވެސް މީހުން އަރައިގަންނާނެއެވެ.
⭕️ ތިބާ އެހެންމީހުންގެ އުޚްތުންގެ ޢިއްފަތަށް އަރައިގަންނަ ނަމަ ތިބާގެ އުޚްތާގެ ޢިއްފަތަށްވެސް ބަޔަަކު އަރައިގަންނާނެކަން ދަންނާށެވެ.
ފަހެ ތިބާގެ އަނބިދަރީންގެ ޢިއްފަތް އެހެންމީހުންގެ ކިބައިން ރައްކާތެރިކުރުމަށް އެދޭނަމަ ، ތިބާގެ ކިބައިން އެހެންމީހުން ރައްކާތެރި ކުރާށެވެ. އޭރުން ﷲ ތަޢާލާ ތިބާގެ އަނބިދަރީން އެހެންމީހުންގެ ކިބައިން ރައްކާތެރި ކޮށްދެއްވާނެއެވެ.
