އެކަލޭގެފާނުގެ އަނބި އަނބިކަނބަލުންނާއެކު ، އެކަނބަލުން ފޫހި ފިލުވައިދީ ހިތްއުފާކޮށްދީ ހައްދަވައެވެ
1️⃣ އަބޫ ޔަޢުލާ އެކަލޭގެފާނުގެ (ޙަދީޘް ފޮތް) މުސްނަދުގައި ، ރިވާކުރައްވާފައި ވެއެވެ. ޢާއިޝާ ރަޟިޔަﷲ ޢަންހާ ވިދާޅުވިއެވެ. ތިމަން ކަމަނާ ، ނަބިއްޔާ ޞައްލަﷲ ޢަލައިހި ވަސައްލަމައަށް ތައްޔާރު ކުރެއްވި ކާނާ ހިފައިގެން އެކަލޭގެފާނުގެ އަރިހަށް ވަޑައިގަތީމެވެ. އެހިނދު ތިމަންކަމަނާ ސައުދާ ރަޟިޔަﷲ ޢަންހާ އަށް (ސައުދާ ރަޟިޔަﷲ ޢަންހާއަކީވެސް ނަބިއްޔާގެ އަނބިކަނބަލެކެވެ.) ދެންނެވީމެވެ. ކަމަނާ މީގެން ކާށެވެ. ފަހެ އެކަމަނާ އެކަމަށް އިންކާރު ކުރިއެވެ. ފަހެ ތިމަންކަމަނާ ސައުދާ ރަޟިޔަﷲ ޢަންހާއަށް ދެންނެވީމެވެ. ކަމަނާ މީގެން ނުކައިފިނަމަ ، ކަމަނާގެ މޫނުގައި މިއެތި އުނގުޅާ ހުށީމެވެ. އެހިނދު ނަބިއްޔާ ޞައްލަﷲ ޢަލައިހި ވަސައްލަމަ ހުންނެވީ ތިމަންކަމަނާއާއި ސައުދާ އާއި ދެމެދުގައެވެ.
2️⃣ ފަހެ އެކަމަނާ އިންކާރުކުރުމުން ، ތިމަންކަމަނާގެ އަތް ކާތަކެތީގެ ތެރެޔަށް ލުމަށްފަހު އެކަމަނާގެ މޫނުގައި އުނގުޅައިފީމެވެ. އެހިނދު ނަބިއްޔާ ޞައްލަﷲ ޢަލައިހި ވަސައްލަމަ ހިނުފުޅު ވެޑުވިއެވެ. އަދި އެކަލޭގެފާނުގެ އަތްޕުޅު ކާތަކެއްޗަށް ލެއްވުމަށްފަހު ސައުދާ ރަޟިޔަﷲ ޢަންހާއަށް ދެންނެވިއެވެ. ކަމަނާވެސް އެކަމަނާގެ މޫނުގައި އުނގުޅުއްވާށެވެ. ފަހެ އެކަމަނާ އުނގުޅުމުން ނަބިއްޔާ ޞައްލަﷲ ޢަލައިހި ވަސައްލަމަ ހިނިފުޅު ވެޑުވިއެވެ. އެހިނދު ޢުމަރު ރަޟިޔަﷲ ޢަންހު އެތަނަށް ވަޑައިގެން ވިދާޅުވިއެވެ. އޭ ﷲ ގެ އަޅާއެވެ. އޭ ﷲގެ އަޅާއެވެ. ފަހެ އެހިނދު ޢުމަރުގެފާނު ވެދެވަޑައިގެންފާނެހެން ހީވެ ، ނަބިއްޔާ ޞައްލަﷲ ޢަލައިހި ވަސައްލަމަ ތިމަންމެނަށް ދެންނެވިއެވެ. "ތިޔަ ދެކަނބަލުން ތެދުވެ މޫނު ދޮންނާށެވެ." [4476]
📌ފަހެ މިއީ މާތް ނަބިއްޔާ މުޙައްމަދުން ޞައްލަﷲ ޢަލައިހި ވަސައްލަމަ ގެ ސުންނަތެވެ. އެކަލޭގެފާނުގެ އަނބި އަނބިކަނބަލުންނާއެކު ، އެކަނބަލުން ފޫހި ފިލުވައިދީ ހިތްއުފާކޮށްދީ ހައްދަވައެވެ. އެކަނބަލުންނަށް ގޭތެރޭގައި އެހީތެރިވެ ދެއްވައެވެ. އެކަނބަލުންނަށް ކިޔަވައިދީ ދީނުގެ ކަންކަން އުނގަންނަވައި ދެއްވައެވެ. ނަމަވެސް އަޅުގަނޑުމެން ގޭތެރޭގައި އަނބިންނާމެދު ކަންތައް ކޮށްއުޅެނީ ކިހިނެއް ހެއްޔެވެ؟
