ޢުމަރު ބިން ޢަބްދުލްޢަޒީޒުގެ ކުރިފުޅުމަތީގައި އަނިޔާލިބިފައިވާ މީހާގެ ޤަދަރު
އުމަވީ ޚަލީފާ ޢުމަރު ބިން ޢަބްދުލްޢަޒީޒު (ރަޙިމަހުﷲ) އެއްދުވަހަކު ބާޒާރުގެ ކަންތައް ބެއްލުވުމުގެ ގޮތުން ބާޒާރުމަތީ ބުރުޖައްސަވަމުން ގެންދެވިއެވެ. އެވަގުތު ރޮނގުދަމާފައި ހުރި ފޮށައެއް އޮޅައިގެން ހުރި މީހަކު އެކަލޭގެފާނުގެ އަރިހަށް އައިސް ދެންނެވިއެވެ. [އޭ އަމީރުލް މުއުމިނީންއެވެ! އަނިޔާލިބިފައިވާ މީހެއްވާނަމަ ކަލޭގެފާނުގެ އަރިހަށް އައުމަށް ކަލޭގެފާނު އަމުރުކުރެއްވީމުނޫންތޯއެވެ؟] ޢުމަރު ވިދާޅުވިއެވެ. [އާނއެކެވެ!] އެމީހާ ދެންނެވިއެވެ. [އަޅުގަނޑަކީ ވަރަށް ދުރު ހިސާބަކުން ކަލެގެފާނުގެ އަރިހަށް އައިސްހުރި މަޡްލޫމަކީމެވެ.]
ޢުމަރު ބިން ޢަބްދުލްޢަޒީޒު ސުވާލުކުރެއްވިއެވެ. [ތިބާގެ ޢާއިލާ ދިރިއުޅެނީ ކޮންތާކުހެއްޔެވެ؟]
އޭނާ ދެންނެވިއެވެ. [އަބްޔަން (ޔަމަނުގެ ޕްރޮވިންސެއް) އަށްވުރެވެސް ދުރުގައެވެ.]
ޢުމަރު ވިދާޅުވިއެވެ. [ﷲ ގަންދީބުނަމެވެ! ތިބާގެ ޢާއިލާ، ޢުމަރުގެ ޢާއިލާ އާ ވަރަށް ދުރެވެ.] މިހެން ވިދާޅުވުމަށްފަހު ވަގުތުން ސަވާރީން ފައިބައިވަޑައިގެންނެވިއެވެ. އަދި ސުވާލުކުރެއްވިއެވެ. [ތިބާގެ މައްޗަށް އަނިޔާވެރިވެވުނީ ކިހިނެއްހެއްޔެވެ؟]
ބީރައްޓެހި މީހާ ދެންނެވިއެވެ. [އަޅުގަނޑު ގޮވާންކުރާ ބިމުގެ މައްޗަށް ނާޖާއިޒުގޮތެއްގައި މީހަކު ގަދަވެގެންފިއެވެ. އަދި އެބިމުން ތިމަން އެއްކޮށް ބޭރުކޮށްލައިފިއެވެ.]
ޢުމަރު ބިން ޢަބްދުލްޢަޒީޒު އެމައްސަލަ އަޑުއެއްސެވުމަށްފަހު ޢުރުވާ ބިން މުހައްމަދުއަށް ލިޔުއްވިއެވެ. [ތިބާ މިސިޓީ ހިފައިގެންދާ މީހާގެ ވާހަކަ އާއި އޭނާ ހުށައަޅާ ހެކި އަޑުއެއްސެވުމަށްފަހު އެބިމަކީ އޭނާގެ ޙައްޤެއްކަން ސާބިތުވެއްޖެނަމަ އެބިން އަނބުރާ އޭނާއަށް ހޯއްދަވައިދެއްވާށެވެ!] ދެން އެސިޓީގައި އެކަލޭގެފާނުގެ ސިއްކަ ޖެއްސެވުމަށްފަހު އޭނާގެ އަތަށް ދެއްވިއެވެ.
ދެން ދަތުރުވެރިޔާ އެނބުރި ދިއުމަށްޓަކައި ތެދުވަން އުޅުމުން ޢުމަރު ބިން ޢަބްދުލްޢަޒީޒު ވިދާޅުވިއެވެ. [މަޑުކުރާށެވެ! ތިބާއަކީ ވަރަށް ދުރު ހިސާބަކުން ދަތުރުކޮށްފައި އައިސްހުރި މީހަކީމެވެ. ދަތުރުމަތީގައި ދަތުރުގެ ކޮއްތަށް ކިހާވަރެއް ޚަރަދުވިހެއްޔެވެ؟ ކިތައް ހެދުން ބަދަލުކުރަންޖެހުނު ހެއްޔެވެ؟ ސަވާރީއަށް ކިހާއެއްޗެއް ޚަރަދުކުރަން ޖެހުނުހެއްޔެވެ؟]
އެހުރިހާކަމެއް ހިސާބުކުރުމުން ފަނަރަ ދިރުހަމު ޖެހުނެވެ. އެހެންކަމުން އެވަރަށް ފައިސާ ދެއްވުމަށްފަހު އެމީހާ ފުރުވާލެއްވިއެވެ.
މަޞްދަރު: ސުންހެރޭ ފައިސަލާ:49 / ޝެއިޚް ޢަބްދުލްމާލިކް މުޖާހިދް
