ހުސްއަތާ އެނބުރި ދިއުން
” شذرات الذهب“ ގައި ބަޔާންވެގެންވެއެވެ. ”ބުވައިހް“ ދަރިކޮޅަށް ނިސްބަށްވި ރަސްކަލެއް ކަމުގައިވާ، ފަޚްރުއް ދައުލާ ބުނެފައިވެއެވެ. “ އަހަރެން، އަހަރެންގެ ދަރިންނާއި، އެމީހުންގެ ލަޝްކަރަށް ކުރިއަށް އޮތް 15 އަހަރަށް ފުދޭވަރަށް މުދަލާއި ފައިސާ ރައްކާކުރީމެވެ.“
ނަމަވެސް ފަޚްރުއްދައުލާ މަރުވިއިރު އޭނާގެ ކަންޒުތަކުގެ ތަޅުދަނޑި އޮތީ ތިމާމެންގެ ބައްޕަ ވަޅުލުމަށް ފަރުވާކުޑަކޮށްލި އޭނާގެ ދަރިންގެ އަތުގައެވެ. އެހެންކަމުން ރަސްގެފާނަށް ހެޔޮއެދޭ މީހުން، އޭނާގެ މަސްގަނޑު ލުމަށްޓަކައި މިސްކިތް ބަލަހައްޓާ މީހާގެ އަތުން ކަފުނެއް ގަތެވެ. އޭރުވެސް އޭނާގެ ދަރިންނާއި ސިފައިން، ގެންދިޔައީ މުދަލާއި ފައިސާ އާއިމެދު އެއްބަޔަކު އަނެއްބަޔަކާ ކޯޅި ޒުވާބުކުރަމުންނެވެ. މި ޒުވާބު ނިމުނުއިރު، އޭނާގެ މަރުވެފައިވާ މަސްގަނޑު ވަނީ ކުނިވެފައެވެ. އެއިން ދުވާ ކުނިވަހުގެ ސަބަބުން އެމަސްގަނޑާ ކައިރުވުމުގެ ހިތްވަރެއް އެކަކަށްވެސް ނުލިބުނެވެ.
އެހެންކަމުން ރައްޔިތުން ނުކުމެ ދުރުގައި ތިބެ އޭނާގެ މަރުވެފައިވާ މަސްގަނޑު ދަމާފައި ގަނޑުވަރުން ބޭރަށް ނެރެގެން ދުރަށް ގެންދިޔައެވެ. އެމީހުން އެހަށިގަނޑު ދަމާފައި ގެންދިޔައިރު ގަނޑުވަރުގެ ސިޑި މައްޗަށް އެ ހަށިގަނޑު ބައިބައިވެގެން ދިޔައެވެ.
މިރަސްގެފާނަކީ ދުނިޔަވީ ނިއުމަތްތަކުން ވަރަށް ގިނަ ބައިވަރުތަކެއް މިލްކުވެގެންވީ މީހެކެވެ. އޭނާގެ މިލްކިއްޔާތުގައި ދެ މިލިނިއަން ދީނާރާއި އަށްސަތޭކަ ފަންސާސް ހަ ހާސް ދިރުހަމާއި ގަހަނާއާއި ޖަވާހިރުގެ އެކި ބާވަތްތަކާއި ރަން ރިހީގެ އެތަކެއް ފުނިވަރުތަކެއް ހުއްޓެވެ. ހަތިޔާރުން ބަރާވެފައިވާ ގުދަންތައްވެސް އޭނާއަށް ލިބިގެންވިއެވެ.
އެހެންނަމަވެސް އޭނާ މަރުވުމުން އެއްވެސް މީހަކު އޭނާއަށް އަދަބު އިޙްތިރާމް އަދާއެއްނުކުރިއެވެ. ހަމައެކަނި އޭނާގެ މަސްގަނޑު ލާން މިސްކިތް ބަލަހައްޓާމީހާ އަތުން ލިބުނު ކަފުނެއް މެނުވީއެވެ. މިއީ މި ދުނިޔޭގައި ކަންހިނގާ ގޮތުގެ ޙަޤީޤަތެވެ. އަހަރެމެން މިދުނިޔެއަށް އަންނަނީ ހުސްއަތާއެވެ. އަދި މި ދުނިޔެ ދޫކޮށްފައި ދާނީވެސް ހުސް އަތާއެވެ. އެހެންކަމުން އެންމެ ބުއްދި ހެޔޮ ވިސްނޭ މީހަކީ ﷲ އަށް ކިޔަމަންތެރިވެ، އާޚިރަތް ދުވަހަށް ތައްޔާރުވެ، ހެޔޮ ޢަމަލު ކުރުންމަތީ ދެމިހުންނަ މީހާއެވެ.
