ތަޢުރީފު ލިބެނިވި ސިފަތަކާއި ތަޢުރީފު ނުލިބޭ ސިފަތައް

އިމާމް އިބްނި އަލްޤައްޔިމް އަލްޖައުޒިއްޔާ (رحمه الله)

ތަޢުރީފު ނުލިބޭފަދަ ސިފަތަކަކީ، ކިބުރުވެރިކަމާއި، ނިކަމެތިކަމާއި އަދި ދަށްކަމެވެ. އަދި ތަޢުރީފު ލިބެނިވި ސިފަތަކަކީ ތަޤްވާވެރިކަމާއި އަދި މަތިވެރި ނިޔަތްތަކެއް ވުމެވެ. ކިބުރުވެރިކަމާއި، ޝުކުރުވެރި ނުވުމާއި، ފުރައްސާރަ ކުރުމާއި، ބޮޑާކަމާއި، ހަސަދަ ވެރިކަމާއި، ނާއިންސާފާއި، ނުބައިކަމާއި، އަނިޔާވެރިކަމާއި، ނުކިޔަމަންތެރިކަމާއި، ނަސޭޙަތަށް އިންކާރުކުރުމާއި، ކަންތައްތަކުގައި ހައްދުފަހަނައަޅާ ދިއުމާއި، މަތިވެރިކަމާއި ދަރަޖަތަކަށް ލޯބިކޮށް އެކަންތައްތައް ހާސިލްކުރުމަށް ދަހިވެތިވުމާއި އަދި އޭނާ ނުކުރާ ކަމަކަށް އޭނާއަށް ތަޢްރީފު ކުރުމާއި، މިހުރިހާ ކަންތައްތަކަކީ ކިބުރުވެރިކަމުގެ ސަބަބުން އުފެދޭ ކަންތައްތަކެވެ.

ދޮގު ހެދުމާއި، ހިތުގައި ރަޙުމެއް ނެތުމާއި، މަކަރުވެރިކަމާއި، މުނާފިޤުކަމާއި، މަކަރާއި، އޮޅުވާލުމާއި، ދަހިވެތިކަމާއި، ބިރުގަތުމާއި، ފިނޑިކަމާޢި، ނިކަމެތިކަމާއި، ކަންނެތްކަމާއި، ﷲ ނޫން އެހެން ފަރާތްތަކުގެ ކުރިމަތީގައި މަޑުމޮޅިވުމާއި، އަދި ރަނގަޅު ކަންތައްތަކުގެ ބަދަލުގައި ނުބައި ކަންތައްތައް ޚިޔާރު ކުރުން ފަދަ ކަންތައްތަކަކީ ދަށްކަމާއި ނިކަމެތި ކަމުގެ ސިފަތަކެކެވެ.

އެއާއި ޚިލާފަށް، މަތިވެރި ސިފަތަކަކީ، ކެތްތެރިކަމާއި، ހިތްވަރާއި، ޢަދުލުވެރިވުމާއި، ހިތްވަރުގަދަކަމާއި، ދުނިޔެވީ ކަންތައްތަކުން އެއްކިބާވެގެން ވުމާއި، ދީލަތިކަމާއި، ކެތްކުރުމާއި، މަޢާފު ކުރުމާއި، ތަޙައްމަލު ކުރުމާޢި، އަމިއްލަ ނަފްސަށް ދަހިވެތި ނުވުމާއި، ނިކަމެތިކަމުން އަމިއްލަ ނަފްސު ސަލާމަތް ކުރުމާއި، މަޑުމޮޅިކަމާޢި، ހިތްހަމަޖެހުމާއި، ތެދުވެރިކަމާއި، އިޚްލާސްތެރިކަމާޢި އެހެން މީހުން ކުރާ ރަނގަޅު ކަންތައްތަކުގެ ބަދަލުގައި އެމީހުންނަށް އެފަދަ ހެޔޮ ގޮތަކުން ނުވަތަ އެއަށްވުރެ ފުރިހަމައަށް އެކަން ފާހަގަކުރުމާއި، އެހެން މީހުންގެ ކުށްތައް ދޫކޮށްލުމާއި، ބޭކާރު ކަންތައްތައް ދޫކޮށްލުމާއި، އަދި ހުރިހާ ނުބައި ސިފަތަކުން ހިތް ޠާހިރު ކުރުން ފަދަ ކަންތައްތަކެވެ. މިސިފަތަކަކީ ތަޤްވާވެރިކަމުން އުފެދިގެން އަންނަ ސިފަތަކެކެވެ. އަދި މަތިވެރި ނިޔަތްތަކެއް ހުރުމުގެ ސަބަބުން ވެސްމެއެވެ. މަތިވެރި ވަންތަ ﷲ ތަޢާލާ ވަނީ މަރުވެފައިވާ ބިންގަނޑަކަށް އެކަލާނގެ ވާރޭ ފޮނުއްވަވާ އެބިންގަނޑަށް ދިރުން ލިބި، ގޮވާން އުފެދޭ ވާހަކަ އަހަރެމެންނަށް އަންގަވާފައެވެ. އަދި ބިމުން އުފެއްދެވިގެންވާ ޚަލްޤުތަކުންނަށް، ﷲ ތަޢާލާގެ ރަޙްމަތުން އެބައިމީހުންނަށްވާ ހިއްޞާ ލިބޭ ހިނދުގައިވެސް، ކަންތައްވަނީ ހަމަ މިފަދައިންނެވެ. ތަޢުރީފު ލިބިގެންވާ ސިފަތަކުގެ މިޘާލަކީ، ވަރުގަދައަށް ރޯކޮށްފައި ހުންނަ އަލިފާންގަނޑެއްގެ އުސްމިން ފަދައިންނެވެ. އަދި އެއަލިފާން ނިވެމުންދާއިރު އަލިފާން ގަނޑު ތިރިވެ ނިކަމެތިވެގެންދާނެއެވެ. ރަނގަޅު ސިފަތަކުގެ މިޘާލަކީ ބިމާއި އޭގެ ޚަލްޤުތަކުންގެ މިޘާލެވެ. މަތިވެރި ނިޔަތެއް ލިބިގެންވާ، ތަޤްވާވެރި މީހާގެ ކިބައިގައި ހުރިހާ ރަނގަޅު ސިފަތަކެއް ވާނެއެވެ. އަދި އޯގާތެރިކަން ކުޑަ، އަޚްލާޤީ ގޮތުން ދަށުދަރަޖައިގެ މީހުންގެ ކިބައިގައި ހުރިހާ ނުބައި ސިފަތަކެއް އެކުލެވިގެންވާނެއެވެ.

އަޞްލު: އަލްފަވާއިދު އިން ނެގި ތަރުޖަމާ ކުރެވިފައި

www.click4islam.com