”އުއްތަމަ ޓެރަރިސްޓުން“ ރަށުތެރޭގައި މިނިވަންކަމާއެކު
ކާފަރުންނާއި ހުޅަނގުގެ ލާދީނިއްޔަތުން ތަރުބިއްޔަތުވެފައިވާ މީހުން ދެކޭ ގޮތުގައި ކޮންމެ މުސްލިމަކީ ޓެރަރިސްޓެކެވެ. އަދި އިސްލާމުންގެ ތެރެއިން ކޮންމެވެސް ވަރަކަށް ތުނބުޅި ދިގުކޮށްފައިތިބޭ މީހުންނަކީ އެންމެ މަތީ ދަރަޖައިގެ ޓެރަރިސްޓުންނެވެ. އަދި އޭގެތެރެއިންވެސް ތުނބުޅި އެއްކޮށް ދޫކޮށްލައި ލައިގެންހުންނަ ހެދުން ގަޔަށް ތަންކޮޅެއްދޫކޮށް ހުރެ ހެދުމުގެ ފައިކުރި ކަށިމަށްޗަށް ބަހައްޓައި ބޮލުގައި ފަގުޑިއެއް އަޅައިފިއްޔާ އެއީ އެންމެ މަތީ ދަރަޖައިގެ ވެސް މަތީގައި ހިމެނޭ ރަތްލާޖެހި މާ ޓެރަރިސްޓެކެވެ. އެމީހަކީ ކުށެއްކޮށްގެން ފުލުހުންގެ ބެލުމުގެ ދަށަށް ދުވަހެއްގެ ކޮޅުންވެސް ގެންގޮސްފައިވާ މީހަކަށް ނުވިޔަސް ވެހެވެ. އަދި އެފަދަ މީހެއްގެ ފުށުން ކުށެއް ކުރެވިއްޖެނަމަ އެކަމަކީ ދުނިޔޭގައި އެވަގުތު ހިނގި އެންމެ ބޮޑު ޖަރީމާކަމަށް ހަދައި ނޫސްތަކުގެ ފަލަ ސުރުޚީ ތަކުގައި ލިޔެއެވެ. އަޅުގަނޑުމެންގެ ތެރޭގައި ތިބި އިސްލާމުންކަމަށް ދަޢުވާކުރާ ބައެއް މީސްތަކުންގެ ކަންތައްތައް ހުރިމަގަކީވެސް މިއީއެވެ. މިދެންނެވިފަދަ މީހެއްގެ ފައިދަށުވެ ހިންޏެއް މަރުވިޔަސް މިބައިމީހުންނަށް އެމަންޒަރު ފެންނަނީ ބޮޑު ޤަތުލު ޢާންމެއްގެ ގޮތުގައެވެ.
މިގޮތުން މިހާރު ފަތުއަޑުކިޔާފައި ފެތުރެމުންދާ އަޑަކީ ސަލްޓަންޕާރކްގައި ދިން ބޮމުގެ ޙަމަލާގެ ތުޙުމަތުގައި ޢުމުރަށް ޖަލަށްލީ މީހުން ޙުކުމް ތަންފީޒުކުރުން ފަސްކޮށް ދޫކޮށްލި ވާހަކައެވެ. ބައެއް މީޑިއާ ތަކުން މިކަން ސިފަކުރާ ގޮތުގައި ”ރާއްޖޭގައި ތިބި އެންމެ ބޮޑެތި ޓެރަރިސްޓުން“ ބަންދުން ދޫކޮށްލީއެވެ. އަދި އެކަމާއި ދިވެހި ރައްޔިތުން ބިރުވެތިވެ ރައްކާތެރިވުމަށް މީސްތަކުންނަށް އެބައިމީހުން ގޮވަމުންދެއެވެ. އަތުޖެހުނުހައި މީހަކު އެމީހުން މަރާނެ ކަމުގައި އެބައިމީހުން ސިފަކޮށް މީސްތަކުންނަށް ވަސްވާސްދީ ހަދަމުންދެއެވެ. މަޤްޞަދަކީ އެންމެ މަޤްޞަދެކެވެ. އެއީ މުސްލިމުން، މުސްލިމުންގެ ސިފައިގައި އުޅުނަ ނުދިނުމެވެ. ޑޮލަރު ބޮނޑިތައް ރުއްސުމުގެ ބޭނުމުގައެވެ. އެއްވެސް ޙާލެއްގައި ޓެރަރިސްޓުންގެ ފަރާތުން ދިވެހި ރައްޔިތުންނާއި ދިވެހި ޤައުމު ސަލާމަތްކުރުމެއް ނޫނެވެ.
މިބައިމީހުންގެ މަޤްޞަދަކީ ޓެރަރިސްޓުންގެ ފުށުން ދިވެހި ޤައުމު ސަލާމަތް ކުރުންކަމުގައި ވާނަމަ ދިވެހި ޤައުމުގައި ދިވެހި ދަރިން ޙައްޤަކާނުލައި ޤަތުލުކޮށް ކަތިލައި ދިވެހި ބިމުގައި ލޭއޮރުވުން ޢާންމުކުރާ ޓެރަރިސްޓުންގެ ވާހަކަ ދައްކާނެ ނޫންތޯއެވެ. މީޑިއާ އަކަށްވެސް އަދި ދިވެހިންގެ ތެރޭގައިތިބި އަޑުފޮށިތަކަކަށް ވެސް މިކަމާއި މެދު ހަޅޭއްފަޅޭއްޖަހައި މީސްތަކުން ސަމާލު ކުރުވާކަށް ނުކެރެއެވެ. ސަބަބަކީ އެމީހުންގެ ވާހަކަ ގޮވައިފިއްޔާ ޓީވީ ސްޓޭޝަން ނުވަތަ ރޭޑިއޯ ސްޓޭޝަން އަންދާލާނެއެވެ. މުވައްޒިފުންނަށް ޙަމަލާދޭނެއެވެ. އެހެންވީމާ ދެން މުޅިން އެހެން ބައެއްގެ ވާހަކަ ދައްކައިގެން އެމީޑިއާއެއްގެ އެޓޭންޝަން ހޯދަމުންދަނީއެވެ.
ދާދިފަހުން ރާއްޖޭގެ މަޝްހޫރު ރިސޯޓެއްގެ މުވައްޒިފުން ހަޅުތާލުކޮށްގެން އެރަށުގައި ތިބި ހުރިހާ ގެސްޓުން ފޭބިއެވެ. މިކަންވެސް މިއީ ތުނބުޅިއެއް ލައިގެން ތިބި ބަޔަކު ކުރިކަމެއް ނަމަ މޮޅު ޤާނޫނަކުން މިބައިމީހުންގެ ދުވަސް ދުއްވާލީހެވެ. ދިވެހިރާއްޖޭގެ ފަތުރުވެރިންނަށް ބިރުދައްކައިގެން ރާއްޖޭގެ ޓުއަރިޒަމަށް ގެއްލުންދިނުމުގެ ކުށުގައޭ ކިޔާ ޢުމުރަށް ޖަލަށްލީހެވެ. ނުވިތާކަށް އެމީހުންގެ އަނބިން ފުލުހުންގެ އިދާރާއަށް ގެންގޮސް އޮރިޔާންވެސް ކުރީހެވެ.
ކޮރު އިބިލީހަށް ތަބާވެގެން ތިބި މީޑިޔާތަކުން ޙަޤީޤަތް ހާމަ ނުކުރިއެއްކަމަކު ޙަޤީޤަތް ދޮގަކަށް ނުވާނެއެވެ. މިއަދު ދިވެހިރާއްޖޭގައި ތިބި ”އުއްތަމަ ޓެރަރިސްޓުންތައް“ ތިބީ މަގުތައްމައްޗަށް ވީއްލިގެންނެވެ. އެބައިމީހުން އުޅޭނެގޮތަކަށް އުޅެން ކުރާނެހައިކަމެއް ކުރަން ދޫކޮށްލެވިފައެވެ. މަރާނެހާ ބަޔަކު މަރަން މިބައިމީހުންނަށް ފުރުޞަތު އޮވެއެވެ. ނަމަވެސް މި ޓެރަރިސްޓުންނާއި މެދު ކަންބޮޑުވާ ބަޔަކު އެބައުޅޭ ބާވައެވެ؟ އެފަދަ މީހުންގެ މައްސަލައެއް ބެލެން ނެތްތަނުގައި އެފަދަ މީހެއްގެ މައްޗަށް ކުށެއް ސާބިތުވާ ކަމަކަށްވެސް ނުވެއެވެ.
ދަންނަވަންތޯއެވެ. ހަމައެކަނި މައްސަލައަކަށްވީ ތުނބުޅިލީމީހަކު ބޮމެކޭ ކިޔައި ފަޓާހެއްގޮއްވައިލައިގެން ރާއްޖެއައި ފަތުރުވެރިއެއް ގެންގުޅުނު ވިއްސާރަކުޑައިގެ ފޮތިގަނޑު އެނދީމައެވެ. އެބައިމީހުންނާ މެދުގައި ޓެރަރިޒަމްގެ ދަޢުވާ ވެސް ކުރެވުނެވެ. އެމީހުންގެ ޙުކުމް ތަންފީޒުކުރުން ފަސްކުރުން މައްސަލައަކަށްވީއެވެ. ނަމަވެސް ޙުކުމްގަނޑެއްހައި ހިސާބުވެސް ނުކުރެވިތިބި ބޮޑެތި ޓެރަރިސްޓުންނާއިމެދު ދަޢުވާ އުފުލާނީ ކޮންފަރާތަކުންހެއްޔެވެ؟ އަދި އެކަމާއިމެދު ވާހަކަ ދައްކާނީ ކޮން ދޫތަކެއްބާވައެވެ؟
މިވާހަކަ އަޅުގަނޑަށް ދަންނަވަން މިޖެހުނީ ދިވެހިރާއްޖޭގައި ތިބި ތަސައްރަފު ފުދިފައިވާކަމަށް ދަޢުވާ ކުރާ މީޑިޔާތަކުގެ ޢަމަލުތައް ހުންނަ ގޮތުންނެވެ. އެއްގޮތަކަށް ވެސް ފަޓާސް ގޮއްވި ކުދިން އެކުރި ކަމަށް ތާއީދުކުރުމުގެ ބޭނުމުގައެއްނޫނެވެ. އިސްލާމްދީނާއި ކަނޑައެޅިގެން ދެކޮޅަށް ލިޔެ، އިއްވައި އަދި ދައްކަމުން އަންނަ ހުޅަނގުގެ މީޑިޔާތަކުން ކަންކުރާ ބީދައިން މުސްލިމުންކަމަށް ދަޢުވާކޮށް މުސްލިމު ނަން ކިޔައިގެން އުޅޭ ބަޔަކު މުސްލިމު ރާއްޖެއެއްގެ މުސްލިމު މީޑިޔާތަކުގައި މުސްލިމުންގެ ސިފަޖެހިފައި ތިބި ބަޔަކާ މެދު މިފަދަ ވާހަކަތަކެއް ނުޙައްޤުން ދައްކަމުންދާތީ ލަގޮނޑިއަށް ކެތްނުވީއެވެ.
މަޞްދަރު: www.RaajjeIslam.com
www.click4islam.com
