ސައްޔިދަތުއް ނިސާ ފާޠިމާ ބިންތު މުޙައްމަދު (صلى الله عليه وسلم) (2)

އެއްފަހަރެއްގައި އަބޫ ޖަހުލު ކަޢުބާގެ ކުރިމަތީގައި އެހެން މުޝްރިކުންތަކަކާއި އެކުގައި އިނެވެ. އަދި އެމީހުންގެ ބުދުތަކަށް އިންކާރު ކުރި މީހާ ނައްތާލާނެ ގޮތަކާއިމެދުގައި ރާވާން ތިއްބެވެ. ﷲތަޢާލާގެ އެއްކައުވަންތަކަމަށް ގޮވާލާ އަދި އިތުރު އެކަލޭގެފާނަކީ އެންމެ ފަހުގެ ނަބިއްޔާ އަދި ރަސޫލާ ކަމަށް ޙަދީޘް ކުރެއްވުމުން، މިގޮތަށް ދަޢުވާ ފެތުރުމާއިމެދުގައި އެމީހުން ނަފްރަތު ކުރެއެވެ. އެވަގުތު އެތަނުން ފާޠިމާ(رضي الله عنها) ހުރަސްކޮށް ވަޑައިގަތެވެ. އަދި އަބޫ ޖަހުލުގެ ވާހަކަތައް އެކަމަނާއަށް އަޑުއިވިވަޑައިގަތެވެ. އެކަމަނާގެ ބައްޕާފުޅަށް މިއަނިޔާވެރިންތައް ކޮށްފާނެ ކަމަކާއިމެދުގައި ބިރުފުޅު ހީވެ ވަޑައިގެން ދުވެވަޑައިގެން އެކަމަނާގެ ބައްޕާފުޅުގެ އަރިހުގައި މިވާހަކަ ދަންނަވަން ވަޑައިގެންނެވިއެވެ. ކީރިތި ކުރައްވަމުން އެކަމަނާ އެކަލޭގެފާނުގެ އަރިހުގައި ދެންނެވީ، މުޝްރިކުންތައް އެމީހުންގެ އެންމެ މަޝްހޫރު ބުދުތައް ގަންދީ އެކަލޭގެފާނު އަވަހާރަކުރާނެ ކަމަށް ހުވާކުރި ކަމުގައި ދެންނެވިއެވެ. އެކަލޭގެފާނު، އެކަލޭގެފާނުގެ ގެކޮޅުން ނިކުމެވަޑައިގަންނަވާ ވަގުތުގައި އެމީހުން އެންމެން އެކަލޭގެފާނަށް ޙަމަލާ ދެއްވާނެ ކަމަށެވެ. މަޢުޞޫމްކަމާއިއެކުގައި އެކަމަނާ އެކަލޭގެފާނުގެ އަރިހުގައި ދެންވާނީ ކިހިނެތްތޯ ސުވާލުކުރެއްވެވިއެވެ. ނަބިއްޔާ(صلى الله عليه وسلم) އެކަމަނާގެ އަރިހުގައި ޙަދީޘް ކުރެއްވީ ﷲއަށް ތަވައްކަލް ކުރުމަށެވެ. އެހެނީ އެކަލޭގެފާނު ރައްކާތެރިކުރައްވާ ފަރާތަކީ އެކަލާނގެ ކަމަށެވެ.

އެހެން ފަހަރެއްގައި ފާޠިމާ، އަބޫ ޖަހުލު ބިން ހިޝާމް ހުރި މަގަކުން ހުރަސްކޮށް ވަޑައިގެންނެވި އެވެ. އަދި އަބޫ ޖަހުލު އެއްވެސް ސަބަބަކާއި ނުލައި އެކަމަނާގެ މޫނުމަތީގައި ޖެހިއެވެ. މިކަމާއި ގުޅިގެން އެކަމަނާ ޤުރައިޝުންގެ ވެރިޔާ އަބޫ ސުފްޔާންގެ ގާތަށް ވަޑައިގެންނެވިއެވެ. އަދި އަބޫ ޖަހުލުގެ މި ނާތަހުޒީބީ ޢަމަލުގެ ވާހަކައިގެ ޝަކުވާ ދެންނެވިއެވެ. އަބޫ ސުފްޔާން، ފާޠިމާ ގޮވައިގެން އެއަނިޔާވެރި އަބޫ ޖަހުލު އިން ތަނަށް ގެންދިޔައެވެ. އަދި އެކަމަނާގެ މޫނުމަތީގައި އަބޫ ޖަހުލު ހަމަ ޖެހިތަނުގައި އަބޫ ޖަހުލުގެ މޫނުގައި ޖެހުމަށް ބުންޏެވެ. އެކަމަނާ އެބުރި ގެއަށް ވަޑައިގެން ނަބިއްޔާ(صلى الله عليه وسلم) ގެ އަރިހުގައި މިވާހަކަ ދެންނެވުމުން، އަބޫ ސުފްޔާންގެ އަދުލު އިންސާފްވެރިކަމާއިމެދު އެކަލޭގެފާނު ހިތްހަމަޖެހުން ފާޅުކުރެއްވެވި އެވެ. އަދި އިސްލާމީ ޙައްޤު ދީންގެ ގޮތުގައި އަބޫ ސުފްޔާން ޤަބޫލުކުރައްވާތޯ އެކަލޭގެފާނު ދުޢާ ކުރެއްވެވިއެވެ. އެކަލޭގެފާނު އަބޫ ސުފްޔާން އާއިމެދުގައި ކުރެއްވި ދުޢާ ﷲތަޢާލާ އިޖާބަކުރެއްވެވިއެވެ. އަދި އެންމެ ފަހުން އަބޫ ސުފްޔާން ﷲއާއި ރަސޫލާއަށް އީމާންވި އެވެ.

ﷲތަޢާލާ ހޮއްވަވާފައިވާ ނަބިއްޔަކީ އެކަލޭގެފާނު ކަމުގައި މުޙައްމަދު(صلى الله عليه وسلم) ހާމަކުރެއްވިތާ 7 އަހަރު ފާއިތުވިއެވެ. މިހުރިހާ ދުވަސްތަކުގައި، ޤުރައިޝުންނަށް އެކަލޭގެފާނާއި އަދި އެކަލޭގެފާނުގެ ގޮވާލެއްވުން ހުއްޓައެއް ނުލެވުނެވެ. ﷲގެ މަގަށް އިޖާބަ ދިން މީހުންނަށް ހުރިހާ ގޮތްތަކަކުން އަނިޔާއާއި އަދަބުތައް ދެވުނެވެ. ހަމްޒާ ބިން ޢަބްދުލް މުއްޠަލިބް(رضي الله عنه)އާއި ޢުމަރު ބިން ޚައްޠާބް( رضي الله عنه) އިސްލާމް ދީން ޤަބޫލުކުރެއްވުމުން މުޅި މައްކާ ގުޑައިގެން ދިޔައެވެ. މީސްތަކުން އެމީހުންގެ ވެރިންގެ ގާތަށް ކޮންމެވެސް ފިޔަވަޅެއް އެޅުމަށް ބުނަމުން ދިޔައެވެ. އެމީހުން ނިންމީ މުސްލިމުން އެއްކޮށް ބާކީކޮށް ހުރިހާ ކަމަކުން މަޙްރޫމް ކުރުމަށެވެ. އިޖްތިމާޢީ ގޮތުންނާއި، އިޤްތިޞާދީ ގޮތުންނާއި އަދި ފެނާއި ކާނާވެސް ހުއްޓުވިއެވެ. 3 އަހަރަށް ދެމިގެން ދިޔަ ހައިނޫނުކަމެއްގައި މުސްލިމުން ޝިޢުބު އަބީ ޠާލިބްގައި ތިއްބެވެ.

މައްކާގެ އެންމެ މުއްސަނދި އަންހެން ކަމަނާ، ޚަދީޖާ(رضي الله عنها) އާއި އެކަމަނާގެ އަންހެން ދަރިކަނބަލުން އަދި އެންމެ ހަގު ދަރިކަނބަލުންވެސް ހަރުދަނާކަމާއިއެކުގައި ބައްޕާފުޅާއިއެކުގައި ސާބިތުވެ ވަޑައިގެންނެވިއެވެ. އެކަލޭގެފާނަށްޓަކައި އެކަނބަލުންގެ ފުރާނަވެސް ޤުރުބާންކުރައްވާނެއެވެ. އަދި މިކަމުގެ ސަބަބުން ތުއްޕުޅު ފާޠިމާ(رضي الله عنها)ގެ ވިސްނުންފުޅަށް އަސަރުކޮށް ޖިސްމާނީ ގޮތުންވެސް އަސަރުކުރި އެވެ. އަދި މިކަމުގެ ސަބަބުން އެކަމަނާގެ ޞިއްޙަތަށާއި ހަށިގަނޑަށް މުޅި ޢުމުރަށް އަސަރުކުރުވިއެވެ.

މި ހައިހޫނުކަން ހަމަ ނިމުމާއިއެކުގައި، ނަބިއްޔާ(صلى الله عليه وسلم) އާއި ފާޠިމާއާއި އެކަމަނާގެ ދައްތައިން ލޯބިވާ މަންމާފުޅު ޚަދީޖާ( رضي الله عنها) އަވަހާރަވުމުގެ ހިތާމަ ތަޙައްމަލް ކުރައްވަން ޖެހިވަޑައިގެންނެވިއެވެ. އެކަމަނާއީ އެކަލޭގެފާނުގެ އެންމެ މަތިވެރި އެހީތެރިޔާ އާއި މަދަދުވެރިޔާއެވެ. އަދި އެކަލޭގެފާނުގެ ބޮޑުބޭބެ އަބޫ ޠާލިބްވެސް މެއެވެ. ފާޠިމާ ވަޑައިގެންނެވީ އެކަމަނާގެ ބައްޕާފުޅާއިއެކުގައި މިހުރިހާ އިމްތިޙާންތަކެއް ތަޖުރިބާ ކުރައްވަވަމުންނެވެ. އަދި އިސްލާމް ދީނަށް ގޮވާލެއްވުމަށްޓަކައި ނަބީ(صلى الله عليه وسلم) ޠާއިފަށް ވަޑައިގެންނެވީވެސް މިދުވަސްވަރުގައެވެ. ޠާއިފްގެ މީހުން އެކަލޭގެފާނަށް މަރުހަބާކީ ގަލުންނެވެ. އަދި އެކަލޭގެފާނަށް އަނިޔާލިބި ލޭއޮހޮރުނެވެ. ޠާއިފްގެ މީހުންނަށް ތެދު މަގު ދެއްކެވުމަށް ނަބިއްޔާ(صلى الله عليه وسلم) ދުޢާ ކުރެއްވެވިއެވެ.

އުއްމު ކުލްޘޫމް އާއި ފާޠިމާ(رضي الله عنها) އަށް މިމަންޒަރު ފެނިވަޑައިގެންނެވުމުން ކީރިތި ކުރައްވަން ފެއްޓެވިއެވެ. ލޯތްބާއިއެކުގައި އެކަލޭގެފާނުގެ ދެދަރިކަނބަލުންގެ ކަރުނަތައް ފޮހެދެއްވަވާ އެދެބޭފުޅުންނަށް ހިތްވަރުދެއްވެވި އެވެ. ހުރިހާ ކަމަކާއި ދެކޮޅަށް ﷲތަޢާލާ އެކަލާނގެ ބަސްފުޅު ފެތުރުއްވުމުމަށް އެހީތެރިވެދެއްވާ އަދި އެދީނަށް ނަޞްރުދެއްވާނެ ކަމީ ޔަޤީންކަމެއް ކަން އެކަލޭގެފާނު ޙަދީޘް ކުރެއްވެވިއެވެ. ދަތިތަކަކާއި އުދަނގުލުގެ ދުވަސްތަކަށްފަހުގައި ފަސޭހަ އަންނާނެ ކަމަށެވެ.

އަދި މަދީނާއަށް ނަބިއްޔާ(صلى الله عليه وسلم) ފޮނުއްވެވި ސަފީރު މުސްޢަބް ބިން އުމެއިރު(رضي الله عنه)، މަދީނާގެ މީހުން އިސްލާމް ދީނަށް ވަންނަމުންދާކަމުގެ އުފާވެރި ޚަބަރު ދެއްވެވި އެވެ. މަދީނާގެ މީހުން ނަބިއްޔާ(صلى الله عليه وسلم)އަށް މަދީނާއަށް އައުމަށް ދަޢުވަތު ދެއްވެވިއެވެ. އަދި އެމީހުންނަށް ވީ ހުރިހާ ގޮތަކުން އެކަލޭގެފާނަށް ޙިމާޔަތްދީ ރައްކާތެރިކުރާނެ ކަމަށް ބުންޏެވެ. ނަބިއްޔާ(صلى الله عليه وسلم)، އެބައިމީހުންގެ ދަޢުވަތު ޤަބޫލުކުރައްވާ ﷲތަޢާލާގެ އިޒްނަ ފުޅާއިއެކުގައި މަދީނާއަށް ހިޖުރަ ކުރެއްވުމަށް ނިންމެވިއެވެ. އެކަލޭގެފާނު އައު އަނބިކަނބަލުން ކަމުގައިވާ ސަވްދާ ބިންތު ޒަމްއާގެ އަރިހުގައި އެކަލޭގެފާނުގެ ދެދަރިކަނބަލުން މައްކާގައި ބެހެއްޓެވި އެވެ.

ފަހުން އެކަނބަލުން މަދީނާއަށް ގެންދެވިއެވެ. އެހެންކަމުން އެތިން ކަނބަލުންނަށްވެސް ﷲގެ މަގުގައި މުހާޖިރާތުންނަށް ވުމުގެ ޝަރަފް ލިބިވަޑައިގެންނެވި އެވެ. ނަމަވެސް ހުރިހާ މުސްލިމުން މިގޮތަށް ބޭރުވެގެން ދިއުމަކަށްވެސް މުޝްރިކުންނަށް ކަމަކު ނުދިޔައެވެ. ބައެއް ނުބައި ބަޔަކު މުސްލިމު ބަޔަކާއި މައްކާގެ ރައްބޭރުން ބައްދަލުކުރިއެވެ. ޤުރައިޝުންގެ ތެރެއިން ނުބައިކަންބޮޑު ޒުވާނެއްކަމުގައިވާ ހުވެއިރާ ބިން ނާގިތް އައިސް ނަބިއްޔާ(صلى الله عليه وسلم)ގެ ދަރިކަނބަލުން އިންނެވި ޖަމަލަށް ޙަމަލާދޭން ފެށިއެވެ. އަދި ޖަމަލު މައްޗަށް އެރުމުން އެދެއަންހެން ދަރިކަނބަލުން ވެއްޓިވަޑައިގެންނެވިއެވެ. ހުވެއިރާއަށް މިތަން ފެނުމުން އޭނާ ދުވެ ފިލި އެވެ.

އެބޭފުޅުންގެ މަންޒިލާއި ހަމައަށް ވަޑައިގެންނެވުމުން ނަބިއްޔާ(صلى الله عليه وسلم) އެބޭފުޅުން ބަލާ ވަޑައިގެން ހުންނެވިއެވެ. އެބޭފުޅުން ހެޔޮ ޙާލުގައި ދިރިހުއްޓާ ބައްދަލުވެވަޑައިގެންނެވުމުން އެކަލޭގެފާނު ވަރަށް އުފާކުރެއްވިއެވެ. ﷲތަޢާލާ ރައްކާތެރިކުރައްވާ ފަރާތަކަށް އެއްވެސް މީހަކަށް ގެއްލުމެއް ނުދެވޭނެ އެވެ.

**** ނުނިމޭ ****

އަޞްލު: Islam’s women

24 ޖުލައި 2010 -

www.click4islam.com