މުއުމިނުންގެ ހިތްހަމަޖެހުން
އިމާމް އިބްން ޤައްޔިމް އަލްޖައުޒިއްޔާ (رحمه الله)
މުއުމިނުން، ހިތްހަމަޖައްސައިދޭނޭ ތަފާތު ގޮތްތައްވެއެވެ. • މުދަލުން ހިތްހަމަޖައްސައިދިނުން • މަތީ މަޤާމްތަކުން ހިތްހަމަޖައްސައިދިނުން • ނަފްސުންނާއި ޚިދުމަތްތަކުން ހިތްހަމަޖައްސައިދިނުން • ނަޞޭޙަތާއި މަގުދައްކައިދިނުމުން ހިތްހަމަޖައްސައިދިނުން • ދުޢާ ކުރުމުންނާއި އެމީހުންގެ ފާފަ ފުއްސަވައި ދެއްވުމަށް އެދުމުން ހިތްހަމަޖައްސައިދިނުން • އެމީހުންނަށް ހަމްދަރުދީ ފާޅުކުރުމުން ހިތްހަމަޖައްސައިދިނުން
މިގޮތްގޮތުން ހިތްހަމަޖައްސައިދިނުން ބިނާވެގެންވަނީ، އެއަޅެއްގެ އީމާންކަމުގެ މައްޗަށެވެ. އީމާންކަން ބަލިކަށިވާ ކޮންމެ ހިނދެއްގައި، ހިތްހަމަޖެހުން ވެސް ބަލިކަށިވެގެންދާނެއެވެ. އެހެންނަމަވެސް، އީމާންކަން ވަރުގަދަވާ ކޮންމެ ހިނދެއްގައި، ހިތްހަމަޖެހުންވެސް އެފަދައިންވާނެއެވެ. ރަސޫލާ (صلى الله عليه وسلم) އަކީ އެކަލޭގެފާނުގެ ޞަޙާބީންނަށް، އެންމެ ބޮޑަށް ހިތްހަމަޖައްސަވައި ދެއްވަން މަސައްކަތް ކުރެއްވި ބޭފުޅެވެ. އަދި އެކަލޭގެފާނުގެ ޞަޙާބީންގެ ހިތްހަމަޖެހުން ބިނާވެގެންވަނީ އެބޭކަލުން އެކަލޭގެފާނަށް ތަބާޢުވާ މިންވަރަކަށެވެ.
ކޮންމެވެސް ބަޔަކު، ވަރަށް ފިނި ދުވަހެއްގައި ބިޝްރު އަލްޙާފީ (رحمه الله) ގެ އަރިހަށް ޒިޔާރަތް ކުރިއެވެ. އެހިނދުގައި އެކަލޭގެފާނު (ބިޝްރު) ގެ ގައިކޮޅުގައި އެއްވެސް ފޭރާމެއް ނެތެވެ. އަދި ތުރުތުރުއަޅައަޅައި ހުންނެވިއެވެ. އެމީހުން ސުވާލުކުރިއެވެ. ”އޭ އަބޫ ނާޞިރުއެވެ! މިއީ ކޮންކަމެއް ހެއްޔެވެ؟“ އެހިނދު އެކަލޭގެފާނު ވިދާޅުވިއެވެ. ”އަހުރެން، ފަޤީރުންގެ ހާލުމަތިން ހިތަށް އަރާ، އަދި ފިނި މޫސުމާއި އެމީހުން ތަޙައްމަލް ކުރަމުންދާ ވޭންތައް ހަނދާންވެ، އެމީހުންގެ ހިތްހަމަޖައްސައިދޭނޭ އެއްވެސް އެއްޗެއް އަހަރެންގެ އަތުގައި ނެތުމުން، އަހަރެން ނިންމީ އެމީހުން ތަޙައްމަލް ކުރަމުންދާ ފިނި މޫސުމުގައި އެމީހުންނަށް ހަމްދަރުދީ ވުމަށެވެ.“
އަޞްލު: ’އަލްފަވާއިދް‘ އިން ނެގި ތަރުޖަމާ ކުރެވިފައި
08 ފެބްރުއަރީ 2010
www.click4islam.com
