މުއުމިނު އަޅާ ތަބަޢުވާނެއެވެ.

ޝެއިޚުލް އިސްލާމް އިބްން ތައިމިއްޔާ (رحمه الله)

މުއުމިނު އަޅާއަކީ، އޭގެ މާނައިގައިވާ ފަދައިން ރަސޫލުންނަށް ތަބަޢުވާ މީހެކެވެ. އަދި ރަސޫލުންގެ ގޮވާލުމަށް ތަބަޢުވުމަށް ދަޢްވަތުދެއެވެ. އަދި އެއީ އޭގެ ސަބަބުން ދީން އެކީ އެކަށް ﷲ އަށް ޚާލިޞްވުމަށްޓަކައެވެ. އަދި އޭނާ، އޭނާގެ އަމިއްލަ ފައިދާއަށް މަސައްކަތެއް ނުކުރާނެއެވެ.

މިމަގުގައި މީހަކަށް ގޮވާލުމުގެ ތެރޭގައި އޭނާ ހަޤީޤަތުގައިވެސް އޭނާގެ އަޚާ ދެކެ ލޯބި ވެއެވެ. އަދި އެހީތެރިވެއެވެ. އަދި އެހެން މީހުން އެފަދައިން ކަންތައް ކުރާތަން ފެނުމުން އުފާކުރާނެއެވެ.

އޭނާ މީހަކަށް ހެޔޮކަމެއް ކޮށްދީފިނަމަ، އެކަމެއް ކުރާނީ ހަމައެކަނި ﷲ ތަޢާލާގެ ވަޖުހުފުޅަށްޓަކައެވެ. އަދި ﷲ ތަޢާލާ އޭނާ އަކީ، ނުބައި ޢަމަލުކުރާ މީހެއްގެ ގޮތުގައި ނުލައްވަވާ ހެޔޮ ޢަމަލް ކުރާ މީހެއްކަމުގައި ލައްވަވާ އޭނާއަށް ނިޢުމަތްދެއްވީ ކަމުގައި އޭނާ ދަނެއެވެ. އެހެންކަމުން، އޭނާ ކޮންމެ ޢަމަލެއްވެސް ﷲ ތަޢާލާއަށްޓަކައި ކުރެއެވެ. އެހެނީ އެކަން ކުރެވެނީ ﷲ ތަޢާލާގެ ރަޙްމަތްވަންތަ ކަމުންނެވެ.

ކީރިތި ޤުރުއާންފެށޭ ސޫރަތް (އަލްފާތިޙާ) ގައި މިކަން ބަޔާންކުރައްވާފައިވެއެވެ. ކުރިން ބަޔާންކޮށްފައިވާ ފަދައިން، އެންމެހާ ޚަލްޤުތަކުންގެ މިބޭނުން އެމީހުންގެ އެހެން ބޭނުންތަކަށްވުރެ މަތިވެރި ވާނެއެވެ.

މިހެންކަމުން، އެހެން ސޫރަތްތަކާއި ޚިލާފަށް، ކޮންމެ ނަމާދެއްގައި މިސޫރަތް ކިޔެވުން އެމީހުންގެ މައްޗަށް ވާޖިބުކުރައްވާފައިވެއެވެ. އެސޫރަތާއި އެއްފަދަ ސޫރަތެއް ތައުރާތުގައްޔާއި، އިންޖީލުގައްޔާއި، ޒަބޫރުގައްޔާއި އަދި ޤުރުއާނުގައިވެސް ބާވައިލައްވާފައިނުވެއެވެ. އަދި މިސޫރަތުގައި މިއާޔަތް ވެއެވެ.

إِيَّاكَ نَعْبُدُ وَإِيَّاكَ نَسْتَعِينُ

އަޅަމެން އަޅުކަން ކުރަނީ، ހަމައެކަނި އިބަ ﷲއަށެވެ. އަދި އަޅަމެން ވާގިއެދެނީ، ހަމައެކަނި އިބަ ﷲގެ ޙަޟްރަތުންނެވެ.

(ސޫރަތުލްފާތިޙާ: 5)

އެހެންކަމުން، މުއުމިނު އަޅާ އޭނާގެ ޢަމަލުގެ ނިޔަތް ﷲ އަށްޓަކައި ޚާލިޞްކުރެއެވެ. އެހެނީ، އޭނާ އަޅުކަން ކުރަނީ ހަމައެކަނި ﷲ އަށް ކަމަށްވާތީއެވެ. އަދި އޭނާ ދެކެނީ އޭނާގެ ޢަމަލްތައް ކުރެވެނީ ﷲ ތަޢާލާގެ ރަޙްމަތްވަންތަ ކަމުންނެވެ. އެހެނީ.، އޭނާ މަދަދަށް އެދެނީ ހަމައެކަނި އެކަލާނގެ ހަޟްރަތުން ކަމަށްވާތީއެވެ. އެހެންކަމުން، އޭނާގެ ކުރިމަތީގައި ރަނގަޅަށް ކަންތައްކުރާ މީހެއްގެ ކިބައިން ޝުކުރެއް ނުވަތަ ދަރުމަ ލިބުމަކަށް އޭނާ ނޭދޭނެއެވެ. އެހެނީ އޭނާ އޭނާއަށް ކުރިކަމަކީ ﷲ އަށްޓަކައި ކުރިކަމަކަށްވާތީއެވެ. ޞާލިޙުން ބުނިފަދައިންނެވެ.

إِنَّمَا نُطْعِمُكُمْ لِوَجْهِ اللَّهِ لا نُرِيدُ مِنْكُمْ جَزَاءً وَلا شُكُورًا

(ބުނަމުންނެވެ.) ތިމަންމެން ތިޔަބައިމީހުންނަށް ކާންދޭކަންކަށަވަރީ، ﷲ ގެ ވަޖުފުޅަށްޓަކައެވެ. ތިޔަބައިމީހުންގެ ކިބައިން އެކަމުގެ އުޖޫރައެއް، އަދި ޝުކުރެއްވެސް ތިމަންމެން ނޭދެމުއެވެ.

(ސޫރަތުލް އިންސާން 9)

އެހެންކަމުން، މުއުމިނު އަޅާ އޭނާއަށް އަނެކާއަށް ކޮށްދެވުނު ކަންތަކާއިމެދުގައި ނުވިސްނައެވެ. ނުވަތަ އޭނާއަށް، އޭނާގެ އަޚާއަށް ކޮށްދެވުނު ކަންތައް އަޚާއަށް ހަނދާންކޮށްދީ އެކަމުގެ ސަބަބުން އަޚާއަށް އުދަނގުލެއްވެސް ނުކުރާނެއެވެ. އެހެނީ، އެކަލާނގެ އޭނާ ހެޔޮކަމެއްގައި ބައިވެރިކުރައްވާހިނދު، އޭނާގެ މައްޗަށް ނިޢުމަތް ދެއްވާ ފަރާތަކީ ﷲ ތަޢާލާކަން އޭނާ ދަނެއެވެ. އަދި މިއީ، އޭނާއަށާއި އަނެކާއަށް ﷲ ތަޢާލާގެ ފަރާތްޕުޅުންވާ ނިޢުމަތެއްކަން އޭނާ ދަންނާނެއެވެ.

އެހެންކަމުން، މުއުމިނު އަޅާއަށް ﷲ ތަޢާލާ ފަސޭހަ މަގަށް މަގުދައްކަވައިފިނަމަ އެކަމަށް ޝުކުރުވެރިވާންޖެހޭނެއެވެ. ﷲ ތަޢާލާގެ ފަރާތްޕުޅުން މީހަކު އޭނާއަށް ފައިދާ ކުރަނިވި ކަންތައްކަމުގައިވާ ރިޒުޤް، ނުވަތަ ޢިލްމު، ނުވަތަ މަދަދު ނުވަތަ އެފަދަ އެހެން ކަމެއް ދެއްވީތީވެ، ދެވަނަ މީހާވެސް ﷲ ތަޢާލާއަށް ޝުކުރުވެރިވާންޖެހޭނެއެވެ.

އަޞްލު: www.islaam.com

20 މާރޗް 2010

www.click4islam.com