ޖަންނަތަށް ވާޞިލުކޮށްދެނިވި ފާފަ...
އިމާމް އިބްނި އަލްޤައްޔިމް އަލްޖައުޒިއްޔާ (رحمه الله)
އިބްނި ޤައްޔިމް (رحمه الله) ވިދާޅުވިއެވެ. ”ގިނަގުނަ އެތައް ހެޔޮ އަޅުކަންތައް ކުރުމުގެ ބަދަލުގައި، މީހަކު ފާފައަށް ތަވްބާވެއްޖެނަމަ، ފާފައަކީ މީހާއަށް މާބޮޑަށް މަންފާކުރަނިވި އެއްޗަކަށް ވެދާނެއެވެ.“ މިއީ ކޮންމެވެސް ސަލަފެއް ވިދާޅުވެފައިވާ ބަސްފުޅެއްގެ މާނައެވެ.
”މީހަކު ފާފައެއްކޮށް އެފާފައެއްގެ ސަބަބުން އޭނާ ޖަންނަތް ޙާޞިލު ކުރެއެވެ. ނުވަތަ އޭނާ އަޅުކަމެއް އަދާކޮށް، އެއަޅުކަމުގެ ސަބަބުން ޖަހަންނަމައަށް ވަދެވޭހުއްޓެވެ.“
މީސްތަކުން ސުވާލު ކުރިއެވެ. ”އެއީ ކިހިނަކުންހެއްޔެވެ؟“
ސަލަފު ޖަވާބުދެއްވިއެވެ. ”މީހަކު ފާފައެއްކޮށް އެފާފައަކާއި މެދު ވިސްނާ ފިކުރުކުރަން ފަށާފާނެއެވެ. އަދި އޭނާ އިށީންނަ، އޮށޯންނަ އަދި ކޮޅަށް ހުންނަ ހިނދުގައި އެފާފަ މަތިން ހަނދާންކުރެއެވެ. އެހެންކަމުން، އޭނާ އެފާފައާއި މެދު ލަދުވެތިވެ ތަވްބާވެ، ފާފަފުއްސެވުމަށް އެދި އެކަމާއި ދެރަވެއެވެ. އެހެންކަމުން، އެއީ އޭނާއަށް އެކަމުން ސަލާމަތްވެވޭނެގޮތް ކަމުގައިވެއެވެ. އަދި މީހަކު ހެޔޮ ޢަމަލެއްކޮށް އެކުރެވުނު ހެޔޮ ޢަމަލާއިމެދު ވިސްނާން ފަށައެވެ. އަދި އޭނާ، އިށީންނަ، އޮށޯންނަ އަދި ތެދުވާ ހިނދުގައި އެހެޔޮ ޢަމަލު މަތިން ހަނދާންކުރެއެވެ. މިހެންވުމުގެ ސަބަބުން، ކިބުރުވެރިކަމާއި އަމިއްލަ ނަފްސަށް ތަޢުރީފު ކުރުމުން އޭނާގެ ހިތް ފުރިގެންދެއެވެ. އަދި މިއީ އޭނާގެ ހަލާކުކަމުގައި ވެގެން ދެއެވެ.ެ.
އެހެންކަމުން، ފާފައެއްގެ ސަބަބުން މީހާ ﷲ އަށް އަޅުކަންތައް އަދާކުރުމަށް މަގުފަހިކޮށް، ހެޔޮކަންތައްތައްކޮށް އޭނާގެ އަޚްލާޤު ބަދަލުކުރެއެވެ. އަދި އެހެންކަމުން، އޭނާ ﷲ ތަޢާލާއަށް ބިރުވެތިވެ، ލަދުވެތިވެ އަދި ނިކަމެތިވެއެވެ. ލަދުވެދިކަމާއިއެކު ރޮއެ ހިތާމާ ކުރާ ޙާލުގައްޔާއި އެކަލާނގެ ހަޟްރަތުން ފާފަފުއްސެވުމަށް އެދޭ ޙާލު އޭނާގެ ކަރު އެލުވާލައެވެ. މިއިން ކޮންމެ ކަމެއްގެ އަޡަރުތަކަކީވެސް، މީހެއްގެ ނަފްސު ކިބުރުވެރިވެ، ދެއްކުންތެރިވެ، ބޮޑާވެގަނެ މީސްތަކުންނާއިމެދު ނިކަމެތިކޮށް ދެކޭ ޙާލު ކުރާ އަޅުކަމަކަށް ވުރެ ހެޔޮކަން ބޮޑު ކަންތައްތަކެވެ. ﷲ ތަޢާލާއަށް ކުރެވޭ ހެޔޮކަމެއްގެ ގޮތުގައި ދެކިގެން އަޅުކަންކޮށް، އެކަމާއި މެދު ކިބުރުވެރިވެ ބޮޑާވެގަނެ އަދި އެހެން މީހުންނާއި މެދު ނިކަމެތިކޮށް ދެކޭ މީހާ ކުރާ ހެޔޮކަމަށް ވުރެ، މިފާފައަކީ އެއްވެސް ޝައްކެތް ނެތް ގޮތުގައި ﷲ ތަޢާލާގެ ހަޟްރަތުގައި މާހެޔޮކަން ބޮޑު އަދި އެފާފައެއްގެ ސަބަބުން ސަލާމަތްތެރިކަން ލިބުން އެންމެ ގާތް ކަމެވެ. އަދި ހެޔޮ ޢަމަލުކޮށް ބޮޑާވެގަންނަ މީހާގެ ކިބައިން ފެންނަ ކަންތައްތަކާއި އިދިކޮޅު ބަސްތަކެއް އޭނާ ބުނިކަމުގައި ވިޔަސް މެއެވެ. މީސްތަކުން އޭނާ މަތިވެރިކޮށް، އޭނާގެ ކުރިމަތީގައި އެމީހުން އަމިއްލައަށް ނިކަމެތިނުވާނަމަ، އެފަދަ މީހަކު އެހެން މީހުން ދެކެ ނަފްރަތު ކުރެއެވެ. އިޚްލާސްތެރިކަމާއިއެކު އޭނާ، އޭނާގެ އަމިއްލަ ނަފްސު ހިސާބުކޮށްފި ނަމަ އޭނާއަށް އެކަން ސާފުކޮށް ފެންނާނެއެވެ.“
އަޞްލު: މަދާރިޖުއްސާލިޙީން، 299/1
29 ޖެނުއަރީ 2010 -
www.click4islam.com
