ރޯދަ މަހާއި ޔޫސުފް ( عليه السلام) އާއި ހުރި އެއްގޮތްކަން

އިބްނު އަލްޖައުޒީ (رحمه الله)

”ރޯދަމަހާއި އެހެނިހެން މަސްތަކާއި ދެމެދުގައިވާ ތަފާތުގެ މިޘާލަކީ ޔޫސުފް (عليه السلام) އާއި އެކަލޭގެފާނުގެ ބޭބެއިންނާއި ދެމެދުގައި ހުރި ތަފާތެވެ. އެހެންކަމުން، ޔޫސުފް (عليه السلام) އަކީ ޔަޢުޤޫބް (عليه السلام) ގެ އަރިހުގައި އެންމެ ލޮބުވެތިކަން ބޮޑު ދަރިކަލުންނަށް ވީއިރުގައި ހަމައެއާއިއެކު ރަމަޟާން މަހަކީ ﷲ ތަޢާލާގެ ޙަޟްރަތުގައި އެންމެ ލޮބުވެތިކަން ބޮޑު މައްސަރެވެ.

މުޙައްމަދު (صلى الله عليه وسلم) ގެ އުއްމަތް ވިސްނާ ފިކުރު ހިންގާލުން މުހިއްމު ނުކުތާއަކީ، ޔޫސުފް (عليه السلام) މިފަދައިން (”قَالَ لا تَثْرِيبَ عَلَيْكُمُ الْيَوْمَ ...“ މާނައީ:”އެކަލޭގެފާނު ވިދާޅުވިއެވެ. މިއަދު ތިޔަބައިމީހުންގެ މައްޗަކަށް މަލާމާތެއް ދެރަބަހެއް ނެތެވެ.“) ބުނުމުގެ އޯގާތެރިކަމާއި ލޮބިވެތިކަން ލިބިވަޑައިގެން ވީއިރުގައި، ރަމަޟާންމަހަކީ ހަމައެފަދައިން ރަޙްމަތާއި، ހެޔޮކަމާއި، ނަރަކައިން މުއްތި ކުރެއްވުމާއި އަދި އެހެން ހުރިހާ މަސްތަކަށް ވުރެން އެމަހެއްގެ ރޭތަކާއި ދުވަސްތަކުގައި ﷲ ތަޢާލާގެ ޙަޟްރަތުން ފާފަފުއްސެވުންވާ މައްސަރެވެ.

އަދިވެސް އެހެން ރީތި މިޘާލަކީ، ޔޫސުފް (عليه السلام) ގެ ބޭބެއިން އެމީހުންނަށް ކުރެވިފައިވާ ކުށްތައް ހަމަޖެއްސުމަށްޓަކައި ޔޫސުފް (عليه السلام) ގެ އަރިހަށް އައުމެވެ. އެހެންކަމުން، އެކަލޭގެފާނު އެމީހުންނާއި ބައްދަލުކުރެއްވީ އޯގާތެރިކަމާއި އެކުގައެވެ. އަދި އެމީހުންނަށް އެހީތެރިވެދެއްވެވި އެވެ. އަދި އެމީހުން ބަނޑުހައި ހޫނުކަމުގައި ވީހިނދުގައި އެމީހުންނަށް ކާން ދެއްވެވި އެވެ. އަދި އެނބުރި ދިއުމަށް އެމީހުންނަށް ހުއްދަ ދެއްވެވި އެވެ. އަދި އެކަލޭގެފާނުގެ ނޯކަރުންނަށް ވިދާޅުވިއެވެ. ”ކަލޭމެންނާއި އެކުގައި އެބައިމީހުން (ބޭބެއިން) ގެ ތަކެތި ގެންދާށެވެ. އެއީ އެމީހުންނަށް އެތަކެތި ގެއްލި ނުދިއުމަށްޓަކައެވެ.“ އެހެންކަމުން، އެކަކު 11 އެހެން މީހުންގެ ޙިއްސާ ފުރިއެވެ. އަދި ހަމައެފަދައިން ރަމަޟާން މަސް، ބާކީ 11 މަހުގެ އަހަރެމެންގެ ޢަމަލުތަކުގައި ފޫނުބެދޭ ކަންތައްތައް ފޫބައްދާދެއެވެ. ﷲ އަށް ކިޔަމަންވުމުގައި އަހަރެމެންނަށް ވެވިފައިވާ ގޯސްކަންތަކަކާއި ބަލިފައިތަކާއި ފުރިހަމަ ނުވެވި ހުރި ކަންތައްތަކާއި މެދުގައި ވިސްނާ ފިކުރުކޮށްލާށެވެ!

އަހަރެމެން އުންމީދު ކުރަނީ، އެހެނިހެން މަސްތަކުގައި އަހަރެމެންނަށް ކުރެވިފައިވާ ކުށް ފާފަތައް ރަމަޟާން މަހުން އެތަންތަން ފޫބެއްދި ދާނެކަމެވެ. އަހަރެމެންގެ ކުށްތައް އިޞްލާޙުކޮށް އަދި އެކުށްތަކާއި ފާފަތައް މަތީގައި އުފާވެރިކަމުން ފުރާލެވޭނެކަމެވެ. އަދި ފާފަފުއްސަވާދެއްވާ އިލާހުގެ ވާފަށުގައި ސާބިތުވުމެވެ.

އަނެއް ނުކުތާއަކީ، ޔަޢުޤޫބް (عليه السلام) ގެ ތިއްބެވީ އެ ދަރިންގެ އުޅޭ ނޫޅޭ ގޮތް އެކަލޭގެފާނަށް އަބަދުވެސް ފެނިވަޑައިގަންނަވާ އެކަލޭގެފާނާއި އެކުގައި އުޅުނު 11 ދަރިންނެވެ. އަދި އެކަލޭގެފާނުގެ ލޮލުގެ ފެނުން އެއިން އެއްވެސް ކުއްޖެއްގެ ފޭރާމުގެ ސަބަބުންނެއް ލިބިވަޑައެއް ނުގެންނެވިއެވެ. އޭގެ ބަދަލުގައި، އެ ލޯފުޅުގެ ފެނުން ލިބިލެއްވީ ޔޫސުފް (عليه السلام) ގެ ހެދުންކޮޅުގެ ސަބަބުންނެވެ. އަދި އެކަލޭގެފާނުގެ ލޯފުޅުގެ ފެނުން ވަރުގަދަވެ އަދި އެކަލޭގެފާނުގެ އަމިއްލަ ނަފްސުފުޅު ވެސް ވަރުގަދަވެގެން ދިޔައެވެ. ހަމައެއާއިއެކު، ފާފަވެރިޔާއަށް ރަމަޟާން މަހުގެ މީރުވަސް ދުވައިފިނަމަ، ﷲ ތަޢާލާ މަތިން ހަނދުމަކޮށްދޭ މީހުންނާއި އެކުގައި އޭނާ އިށީނދެއެވެ. ޤުރުއާން ކިޔަވާ، އިސްލާމްދީނާއި އީމާންކަމަށްޓަކައި ގުޅުން ބާއްވާ، ނުބައި ވާހަކަތަކާއި ޣީބަ ބުނުމުން ދުރުހެލިވެއެވެ. އަދި ﷲ ގެ އިރާދަފުޅުން ފާފަވެރިއެއްގެ ގޮތުގައި ހުރެފައި އެކަލާނގެ އޭނާއަށް ޢަފޫކޮށްދެއްވައެވެ. އޭނާ އެކަލާނގެއާއި ދުރުގައި ވުމަށްފަހު، އޭނާ އެކަލާނގެ އާއި ކައިރިވެއެވެ. އަނދިރި ކަމުގައި ވުމަށްފަހު އޭނާއަށް އޭނާގެ ހިތުން ފެންނަން ފަށާނެއެވެ. ކުރިން އެކަމަކީ ނުރުހުންތެރިވާ ކަމަކަށްވެފައި ވަނިކޮށް އޭނާގެ ބައިވެރިވުން ވެގެންދާނީ އުފާވެރިކަމެއް ގޮތުގައެވެ. ކުރިން އޭނާއާއި ނުރުހުމާއި ހިތްހަމަނުޖެހުން ބައްދަލުވެފައި ވީއިރު މިހާރު އޭނާއާއި ބައްދަލުވާނީ ރަޙްމަތެވެ. އޭނާގެ އަމިއްލަ މަސައްކަތަކާއި ނުލައި ނުވަތަ އެއްވެސް ޙައްދެއްނެތި އޭނާއަށް ރިޒުޤް ލިބިގެންދާނެއެވެ. އޭނާގެ މުޅި ޙަޔާތުގައި އޭނާއަށް ޙިދާޔަތް ލިބިގެންވާނެއެވެ. އޭނާ މަރުވާ ހިނދުގައި އޭނާގެ ފުރާނަ ނިކުމެގެންދާނީ ހަމަޖެހުމާއި ފަސޭހަކަމާއި އެކުގައެވެ. ﷲ ތަޢާލާއާއި އޭނާ ބައްދަލުކުރާ ހިނދުގައި އޭނާއަށް ފާފަފުއްސެވުމުން ރަޙްމަތް ލިބިގެންވާނެއެވެ. އަދި ޖަންނަތުގެ ބަގީޖާތަކުން އޭނާއަށް އެންމެ މަތީ ދަރަޖަތައް ދެއްވޭނެއެވެ.

އެހެންކަމުން، ﷲ ގަންދީ ބުނަމެވެ. މިމަދު ދުވަސްކޮޅުގެ މަތިވެރިކަމުގެ ފައިދާ ލިބިގަންނާށެވެ. އޭރުން ގުނާ ޢަދަދުނުކުރެވޭ ނިޢުމަތްތައް ތިބާއަށް ފެންނާނެއެވެ. މަތިވެރި އަޖުރާއި، ﷲ ގެ އިރާދަފުޅުން ދިގުދެމިގެންވާ އަރާމާއި ހަމަޖެހުން ލިބިގެންދާނެއެވެ.

ﷲގަންދީ ބުނަމެވެ! ޙަޤީޤީ ހަމަޖެހުމަކީ މިއީއެވެ.....“

މަޞްދަރު: އިބްން ޖައުޒީގެ 'ބުސްތާން އަލްވާޢިދީން ވަ ރިޔާދް އައްސާމިއީން' ޞަފްޙާ ނ. 214-213) އިން ނެގިފައި

29 އޮގަސްޓު 2010 -

www.click4islam.com