ދުޢާ އާއި ގުޅޭ ގޮތުން ސަލަފުންގެ ބަސްފުޅުތައް
ޝެއިޚް ހުސެއިން އަލް-އަވާޝިއާ
1- ޢުމަރު (رضي الله عنه) ވިދާޅުވިކަމަށް ރިވާވެގެންވެއެވެ. ”(ދުޢާ) ޤަބޫލުކުރެއްވުމުގެ ފިކުރު އަހުރެން ނުގެންގުޅެމެވެ. އޭގެ ބަދަލުގައި ދުޢާގައި ފިކުރެވެ. ދުޢާ ކުރާނެ ގޮތާއިމެދުގައި އަހުރެންގެ ހިތުގައި ޝައުޤުވެރިކަން އުފެދިއްޖެނަމަ، ޤަބޫލުކުރެއްވުން އެއާއި އެކުގައި އަންނާނެއެވެ.“
2- އަބޫ ޒައްރު (رضي الله عنه) ވިދާޅުވިއެވެ.”ފަރުވާއަށްޓަކައި އެވަރަށް ދުޢާ ބޭނުންވެއެވެ. ކާއެއްޗެހީގެ ރަހަ ހެޔޮވަރު ކުރުމަށްޓަކައި ލޮނު ބޭނުންވާ ފަދައިންނެވެ.“
3- މުވާރިޤް ވިދާޅުވިއެވެ. ”ކަނޑުގައި ގަސްބުޑެއްގެ މަތީގައި އޮވެގެން’ އޭ އަހަރެންގެ ވެރި އިލާހެވެ! އޭ އަހަރެންގެ ވެރި އިލާހެވެ!‘ މިފަދައިން ގޮވާ މީހާގެ މިސާލު ނޫން މިސާލެއް މުއުމިނެއްގެ މައްޗަށް އަހަންނަކަށް ނުފެނެއެވެ. ފަހަރެއްގައި ﷲތަޢާލާ އޭނާއަށް މަދަދު ދެއްވަފާނެއެވެ.“
4- ޤާސިމް ބިން ޢަބްދް ވިދާޅުވިއެވެ. ”އަހުރެން އަނަސް ބިން މާލިކް (رضي الله عنه) އަށް ދެންނެވީމެވެ. ’އޭ އަބޫ ހަމްޒާއެވެ! ﷲގެ ޙަޟްރަތުގައި އަހަރެމެންނަށް ދުޢާކޮށްދޭށެވެ.‘ އަނަސް ބިން މާލިކް (رضي الله عنه) ވިދާޅުވިއެވެ. ދުޢާ އުފުލިގެންދަނީ ހެޔޮ ޢަމަލުތަކުގެ ސަބަބުންނެވެ “
5- އިބްން މަސްޢޫދު (رضي الله عنه) ވިދާޅުވިއެވެ. ”ބޮޑާ، ދެއްކުންތެރި އަދި އެއްވެސް ސީރިއަސް ކަމެއް ނެތް މީހުންގެ ދުޢާ ﷲތަޢާލާ ޤަބޫލެއް ނުކުރައްވާނެއެވެ. އެކަލާނގެ ޤަބޫލުކުރައްވަނީ ހަމައެކަނި އެކަލާނގެއަށް ޙަމްދުކޮށް އަދި ހިތުގެ އަޑިން އެކަލާނގެއަށް ދަންނަވާ މީހުންގެ ދުޢާ އެވެ.“
6- ﷲ ތަޢާލާގެ ޙަޟްރަތަށް ދުޢާކުރަން ހުރި މީހަކު ޢަބްދުﷲ ބިން މުބާރަކް އަށް ފެނިވަޑައިގެންނެވިކަން ރިވާވެގެންވެއެވެ. އެމީހާގެ އަތުގައި ގާކޮޅެއް އޮތެވެ. އެހެން ކަމުން ޢަބްދުﷲ ބިން މުބާރަކް ވިދާޅުވިއެވެ. ”އެއްވެސް ހެޔޮކަމަކަށް އެދި ﷲގެ ހަޟްރަތުގައި ދަންނަވާނަމަ ތިބާގެ އަތުގައި ގާކޮޅެއް ބާއްވައިގެން އެކަލާނގެއަށް ނުދަންނަވާށެވެ.“
7- ޢައިޝާ(رضي الله عنها) ވިދާޅުވިކަމަށް ވާރިދުވެފައިވެއެވެ. ”އެއްވެސް މުއުމިނަކު ދުޢާކޮށް އެދުޢާ ބޭކާރުވެގެން ނުދާނެ އެވެ. އެއްގޮތަކީ އޭނާއަށް އެކަމެއް މިދުނިޔެމަތީގައި ފުއްދަވާ ދެއްވުން ނޫންނަމަ ޤިޔާމަތްދުވަހަށްޓަކައި އެކަމެއް އޭނާއަށްޓަކައި ރައްކާކުރެވިފައި ހުރުމެވެ. އަދި އެއީ އެކަމަށް އޭނާ ކަންބޮޑުވެ ނާއުއްމީދު ނުވާނަމައެވެ.“
8- ޢަބްދުﷲ އިބްނު އަބީ ޞާލިޙް ވިދާޅުވިއެވެ. ”ތާއޫސް އަހަންނަށް ގޮވާލުމުން އަހަރެން އޭނާއަށް ބުނީމެވެ. ’އޭ އަބޫ ޢަބްދުއް ރަޙްމާން އެވެ! ﷲގެ ޙަޟްރަތުގައި އަހަންނަށް ދުޢާކޮށްދޭށެވެ.‘ އޭނާ ވިދާޅުވިއެވެ. ތިބާ އަމިއްލައަށް ދުޢާ ކުރާށެވެ. އެހެނީ، ﷲތަޢާލާ އިޖާބަކުރައްވަނީ ނުތަނަވަސްވެފައިވާ މީހާ އެކަލާންގެއަށް ދެންނެވުމުންނެވެ.“
މަޞްދަރު: Islaam.com
www.click4islam.com
27 ޖުލައި 2010 -
