رسول الله صلى الله عليه وسلم ދެކެ ލޯބިވުން (2)

އެމީހެއްގެ ބަފައިންނާއި ދަރީންނާއި އަޚުންނާއި އަނބިންނާއި ގާތްތިމާގެމީހުންނާއި މުދަލާއި ވިޔަފާރިއާއި ގެދޮރާއި މިއިން އެއްޗެއް އެމީހެއްގެ ކައިރީގައި ﷲ سبحانه وتعالى އާއި އެއިލާހުގެ ރަސޫލާ އާއި އެއިލާހުގެ މަގުގައި ޖިހާދުކުރުމަށްވުރެ ލޯބިކޮށްފި މީހަކަށް އެއިލާހުގެ ވަރުގަދަ އުޤޫބާތް ހުރިކަން އެ އިލާހު ވަނީ އަންގަވާފައެވެ. ﷲ سبحانه وتعالى، ވަޙީކުރައްވާފައި ވެއެވެ:

”قُلْ إِنْ كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُمْ مِنَ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُوا حَتَّى يَأْتِيَ اللَّهُ بِأَمْرِهِ وَاللَّهُ لا يَهْدِي الْقَوْمَ الْفَاسِقِينَ“

”ވިދާޅުވާށެވެ! ތިޔަބައިމީހުންގެ މައިންބަފައިންނާއި ދަރިންނާއި އަޚުންނާއި އަނބިންނާއި ގާތްތިމާގެ މީހުންނާއި ހޯދައިފައިވާ މުދަލާއި އަދި ގެއްލުންވެދާނެކަމަށް ބިރުވެތިވާ ވިޔަފާރިއާއި އަދި ތިބުމަށް ލޯބިކުރާ ގޯތިގެދޮރާއި (މިކަންކަން) ﷲ އާއި އަދި އެއިލާހުގެ ރަސޫލާއާއި އަދި އެއިލާހުގެ މަގުގައި ޖިހާދު ކުރުމަށްވުރެ ތިޔަބައިމީހުންގެ ގާތުގައި ލޮބުވެތިވެއްޖެ ނަމަ ﷲ ގެ އަމުރު (އެބަހީ: ޢަޒާބު) އަތުވެއްޖައުމަށްދާންދެން އިންތިޒާރު ކޮށްލާށެވެ. އަދި ހަމަކަށަވަރުންވެސް ފާސިޤުވެގެންވާ ބަޔަކަށް ﷲ ހިދާޔަތް ނުދައްކަވައެވެ.“ [ސޫރަތުއް ތައުބާ: 24]

އިބްނި ކަޘީރު (رحمه الله) މިއާޔަތުގެ ތަފްސީރުގައި ވިދާޅުވިއެވެ: ”މިހުރިހާ އެއްޗަކީ رسول الله صلى الله عليه وسلم، އާއި އެއިލާހުގެ މަގުގައި ޖިހާދުކުރުމަށްވުރެ ތިޔަބައިމީހުން ރުހޭ އަދި ލޯބިކުރާ ތަކެތިކަމުގައި ވަނީނަމަ ތިޔަބައިމީހުންގެ މައްޗަށް ޙަލާލުވެގެންވާ ﷲ سبحانه وتعالى ގެ ގަދަފަ ވޭންދެނިވެގެންވާ ޢަޒާބުގެ އިންތިޒާރުގައި ތިބޭށެވެ. ”حَتَّى يَأْتِيَ اللَّهُ بِأَمْرِهِ“ (ﷲ ގެ ގަދަފަދަ އަމުރުފުޅު އަންނަންދެން) މިބަސްފުޅުގެ ތަފްޞީރުގައި ވިދާޅުވިއެވެ: ”އެއީ ދުނިޔޭގެ ޢަޒާބު ނުވަތަ އާޚިރަތުގެ ޢަޒާބެވެ.“ ޢަލް ޢައްލާމާ ޒަމަޙްޝަރީ (رحمه الله) މިއާޔަތުގެ ތަފްޞީރުގައި ވިދާޅުވެފައިވެއެވެ: ”މިއާޔަތަކީ ބިރުވެރި އާޔަތެކެވެ. މިއާޔަތަށްވުރެ ބިރުވެރިއާޔަތެއް ތިބާއަށް ނުވެސް ފެންނާނެއެވެ.“

އިމާމް ޤުރުތުބީ (رحمه الله) ވިދާޅުވެފައިވެއެވެ: ”ﷲ އާއި رسول الله صلى الله عليه وسلم، އަށް ލޯބިކުރުމަކީ ވާޖިބެއްކަން މިއާޔަތުން ދަލީލުކޮށްދެއެވެ. އެކަމުގައި އެއްވެސް ޚިލާފެއްނެތެވެ. އެލޯބި އެހެން ހުރިހާ ލޯތްބަކަށްވުރެ އިސްވެގެންދެއެވެ.“

އަހަރެމެން رسول الله صلى الله عليه وسلم އަށް ކުރާ ލޯބީގެ ސަބަބުން ޙަޤީޤަތުގައި ފައިދާލިބެނީ ހަމަ އަހަރެމެންނަށެވެ. އަހަރެމެން ﷲ سبحانه وتعالى ދެކެ ލޯބިވާކަމުގައި ވަނީނަމަ އެކަލޭގެފާނަށް ތަބަޢަވާން ޖެހެއެވެ. ﷲ سبحانه وتعالى، ވަޙީކުރަށްވާފައިވެއެވެ:

”قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ وَاللَّهُ غَفُورٌ رَحِيمٌ“

”ވިދާޅުވާށެވެ. ތިޔަބައިމީހުން ﷲ އަށް ލޯބިކުރާނަމަ ތިޔަބައިމީހުން ތިމަންކަލޭގެފާނަށް ތަބަޢަވާށެވެ. (އެއިރުން) ﷲ ތިޔަބައިމީހުންނަށް ރުއްސަވައި ލޯބިވެވޮޑިގަންނަވާނެއެވެ. އަދި ތިޔަބައިމީހުންގެ ފާފަތަށް ފުއްސަވައި ދެއްވާނެތެވެ. އަދި ﷲ އީ ފާފަފުއްސަވައި ރަޙްމަތްލައްވާ އިލާހެވެ.“ [ސޫރަތުލް އާލްޢިމްރާން: 31]

އަނަސް (رضى الله عنه) ގެ ކިބައިން އިމާމް ބުޚާރީ އާއި އިމާމް މުސްލިމް (رحمهما الله) ރިވާކުރެއްވިއެވެ: رسول الله صلى الله عليه وسلم، ޙަދީޘްކުރެއްވިއެވެ:

”އެމީހެއްގެ ކިބައިގައި ތިންކަމެއް ހުރެއްޖެމީހާ އީމާންކަމުގެ ފޮނިކަން ލިބިގެންފިއެވެ. (އެއީ) އެމީހެއްގެ ގާތުގައި ﷲ އާއި އެއިލާހުގެ ރަސޫލާ ފިޔަވައި އެހެން ފަރާތެއް ލޮބުވެތިކަން ބޮޑުވެގެން ނުވުމާއި، ﷲ އަށްޓަކައި މެނުވީ އެކަކު އަނެކަކު ދެކެ ލޯބިވުމާއި އަލިފާން ގަނޑަކަށް ތިމާ ފުންމާލުމަށް އިންކާރުކުރާ ފަދައިން ކާފިރުކަމަށް ތިމާ އަނބުރާ ދިއުމަށް އިންކާރުކުރުމެވެ.“

މިފަދަ އެތައް ޙަދީޘް ތަކެއް އަހަރެމެންނަށް ފެންނަން އެބަހުއްޓެވެ. އޭ ލޮބުވެތި އަޚުންނާއި އުޚުތުންނެވެ! رسول الله صلى الله عليه وسلم ދެކެ ފުރިހަމައަށް ލޯބިވުމަކީ އެކަލޭގެފާނަށް ތަބަޢަވުމެވެ. އެކަލޭގެފާނު ގެންނެވި ކަންތަކުގައި ހިފައި އަދި މަނާ ކުރެއްވި ކަންތަކުން ދުރުވެ ބަރީއަވުމެވެ. އޭރުން ހަމަޔަޤީނުން ވެސް އަހަރެމެންނަށް ތެދުމަގުގައި ތިބެވޭނެއެވެ. އަހަރެމެން ޤުރުއާނާއި ސުންނަތުގައި ހިފަހައްޓައިގެން ތިބިހާ ހިނދަކު އަހަރެމެން މަގުފުރެދިގެން ނުދާނެ އެވެ. އަދި އަހަރެމެންގެ މައްޗަށް ޙަސަދަވެރިވާ ބަޔަކަށް ކާމިޔާބެއް ވެސް ނުމެ ލިބޭނެ އެވެ. އެހެންކަމުން އަހަރެމެންގެ މައްޗަށް ކާފަރުން އަރައިގަންފައިވަނީ އަހަރެމެން ޤުރުއާނާއި ސުންނަތާއި ދުރުވުމުންނެވެ. އެހެންކަމުން މާޟީވިކަންތަކުން ޢިބްރަތް ޙާޞިލްކޮށް ޢަޤީދާ ހަރުދަނާކުރަމާ ހިނގާށެވެ. ދީނުގެ މުހިއްމު ކަންތައްތައް ދުނިޔޭގެ ކުޑަ އުފަލަކަށް ދޫކޮށްނުލާށެވެ!

**** ނިމުނީ ****

22 ޖޫން 2010 –

www.click4islam.com