އަބޫބަކުރު އައްޞިއްދީޤު ރަޟިޔަﷲ ޢަންހު މުސްލިމުންގެ ޚިލާފަތަށް އައްޔަނު ކުރެވުނު ހިނދު
📌 އަބޫބަކުރު އައްޞިއްދީޤު ރަޟިޔަﷲ ޢަންހު މުސްލިމުންގެ ޚިލާފަތަށް އައްޔަނު ކުރެވުނު ހިނދު ، ނަބިއްޔާ ﷺ ގެ މިންބަރުކޮޅަށް އަރާވަޑައިގެން ދެއްވި ޚުޠުބާއަކީ ޢިބުރަތުން ފުރިގެންވާ ޚުޠުބާއެކެވެ. އެ ޚުޠުބާގައި އެކަލޭގެފާނު ވިދާޅުވިއެވެ. :
(( ﷲ ގެ މަގުގައި ޖިހާދުކުރުން ބަޔަކު މީހުން ދޫކޮށްނުލައެވެ. ﷲ ސުބުޙާނަހޫ ވަތަޢާލާ އެބަޔަކު ނިކަމެތި ކުރައްވާ ޙާލުގައި މެނުވީ ، އަދި ބައެއްގެ މެދުގައި ފާޙިޝު ކަންތައްތައް ފެތުރިގެން ނުދެއެވެ. އެބައެއްގެ މެދުގައި ﷲ ސުބުޙާނަހޫ ވަތަޢާލާ ، ބަލާވެރިކަން ޢާންމު ނުކުރައްވާ ގޮތެއްގައި ))
[ބިދާޔަތު ވައްނިހާޔަތު ، އިބްނު ކަޘީރު 5 / 248 ]
އެހެންކަމުން މިއަދު އިސްލާމީ ޤައުމުތައް ދެކެމުން މިދާ ނިކަމެތިކަމާއި ބަލިމަޑުކަމުގެ ހައްލު މިއޮތީ ފެންނާށެވެ. އިޞްލާޙު ކުރަންޖެހެނީ 2 ކަމެކެވެ.
1 - އުއްމަތުގެ ފިރިހެންތަކުން ﷲ ގެ މަގުގައި ޖިހާދަށް ނިކުތުމެވެ. އެއީ ނިކަމެތިކަން ފިލައިގޮސް ޢިއްޒަތާއި ޝަރަފު ލިބުމުގެ ހައްލެވެ.
2 - ފާޙިޝް ކަންތައްތަކާއި މުންކަރާތްތައް މަނާކުރުމެވެ. އެއީ ޢާންމުވަމުން މިދާ އެތައް ބަލިމަޑުކަމެއްގެ ފަރުވާއެވެ.
* މުންކަރާތް މަނާކުރުން އޮތީ ވަކިބަޔަަކަށް ޚާއްޞަވެފައެއް ނޫނެވެ. އެއީ ކޮންމެ މުސްލިމެއްގެ ފަރުދީ ޒިންމާއެކެވެ. އެކަންކަމަކީ ސަރުކާރުތަކުން ފުލުހުން ފޮނުވައިގެން ކުޅޭ ސިޔާސީ ކުޅިގަނޑު ތަކަކަށް ހަދަން ދޫކޮށްލައިފިނަމަ ، މުންކަރާތްތައް އިތުރުވުން ނޫންކަމެއް ނުވެއެވެ. އެހެންކަމުން އެއްވެސް މުންކަރާތެއް ފެނިއްޖެ ނަމަ ، އެކަމަކާ އަހަރެންނާ ކީއްހޭ ބުނެ ދޫކޮށްނުލާށެވެ. އެހެނީ އެހެން ކަންކޮށްފިނަމަ އެއީ ތިބާގެވެސް ހަލާކެވެ. އަދި މުޖުތަމަޢުގެވެސް ހަލާކެވެ. މިއީ އިސްލާމީ ޤައުމެކެވެ. އަހަރެމެންނަކީ މުސްލިމުންނެވެ. އެހެންކަމަށް ވީ ހިނދު އެއީ އަހަރެމެންގެ ޤައުމުގެ މީހަކަސް ނުވަތަ ޤައުމުން ބޭރު މީހަކަސް އިސްލާމްދީނާ ޚިލާފަށް ބަހެއްވެސް ބުނަން ފުރުޞަތު ދީގެން ނުވާނެއެވެ. އަދި ޢަމަލެއް ކުރަންވެސް ފުރުޞަތު ދެވިގެން ނުވާނެއެވެ. އަދި އެފަދަ ނުބައި މީހުން ޙިމާޔަތް ކުރުމަށް ފުލުހުންނަށްވެސް ފުރުޞަތުދީގެން ނުވާނެއެވެ. އެހެނީ އެއީ ތަނުގެ ހަލާކެވެ. އެހެނީ ފުލުހަކު ފުލުހަކަށްވެ ، އެ ޤާނޫނަށް ބޯލެނބުމުގެ ކުރީގައި އޭނާވެފައިވަނީ ﷲ ގެ އަޅަކަށެވެ. އަދި އޭނާގެ މައްޗަށް ޢަމަލުކުރުން އޮތީ ﷲ ގެ ޤާނޫނެވެ. ވީއިރު އެ ޤާނޫނާއި ޚިލާފުވެ އެހެން ޤާނޫނަކަށް ތަބަޢަވާނީ ކިހިނެއް ހެއްޔެވެ؟
* ނޯޓް : އިސްލާމީ އުއްމަތުގެ މިފަދަ އާޘާރުތަކަށް މައުމޫނިޒަމް އާއި ، ވެރިންގެ އުނގުން ފައިސާބޮނޑި ހޯދަމުން ދުވާ މީހުން އިންކާރު ކުރާނެކަމީ ޝައްކެއް އޮތް ކަމެއް ނޫނެވެ. ނަމަވެސް އެބައިމީހުންނަށް އޮތީ 2 ގޮތެކެވެ. އެއްގޮތަކީ މިއުންމަތުގެ އެންމެ ހެޔޮ ޞަޙާބީ އަދި ، ނަބިއްޔުންނާއި ރަސޫލުންނަށް ފަހު އެންމެ ހެޔޮ ވެގެންވާ އަޅާ ، އަބޫބަކުރު ރަޟިޔަﷲ ޢަންހުގެ ބަސްކޮޅު ދޮގު ކުރުމެވެ. ފަހެ ޞަޙާބީންގެ ބަސްކޮޅުތައް ދޮގުކުރުމީ އެބޭކަލުންގެ ޢަދުލުވެރިކަމާއި މެދު ޝައްކު ކުރުމެވެ. ފަހެ އެފަދަ ބައެއްގެ ނުބައިކަމާއެވެ.
ދެވަނަ ގޮތަކީ އެޔާ މުވާފަޤާ ވުމެވެ ( އެއްބަސްވުމެވެ.) ނަމަވެސް މިއީ ވުން ދުރު ކަމެކެވެ. ފަހެ އެބައެއްގެ ދޫ ބާޠިލުގައި ތަތްތެޅިފައިވާނަމަ ، އެދުލަކުން ޙައްޤުބަސް ނިކުތުމަކީ ވަރަށް ދުރުކަމެކެވެ. އެހެނީ ޢިލްމަކީ ﷲ ލައްވާ ނޫރެކެވެ. މިޞްރުގެ އަޒްހަރާއި އެހެނިހެން ތަންތަނުން ނަގާ ސެޓްފިކެޓެއް ނޫނެވެ.
