ޣައްޒާގެ މިތުއްތު ދަރިފުޅު އެވަނީ ރޮއެރޮއެ ވަރުބަލިކޮށްލާފައެވެ.
އެ މަޢުސޫމު ދަރިފުޅުގެ ބަލާލުމުގައި އެތައް ވޭނެއްގެ ޝަކުވާ ކޮށްލަން ބޭނުންވެފައިވާ ކަހަލައެވެ.
ނަމަވެސް މިއަދު އެތުއްތު ދަރިފުޅުގެ އަޑުއަހަން ހުރީ ކޮންބައްޕައެއް ހެއްޔެވެ؟ ލޯބިން އެހަށިގަނޑު ގަޔާލައި ބޮނޑިކޮށްލައި އެނަފްސުން ބިރުވެރިކަން ފިލުވައިލަދޭނީ އުންމަތުގެ ކޮން އަޚަކުހެއްޔެވެ؟ މިހުރިހާ މަންޒަރެއް ފެނި އެރުއިމުގެ އަޑު އިވި އެހެނަސް މިހިތްތަކަށް އަސަރެއް ނުކުރެއެވެ. މިއަދު އުއްމަތުގެ ފިރިހެނުންގެހިތް ހިލައަށްވުރެވެސް ހަރޭ ހީވާ ކަހަލައެވެ. ﷲ ގެ ކަލާމްފުޅު އަޑުއެހުމުން ދުރުވެފައިވުމުން އެހިތްތަކުގެ މަޑުމޮޅިކަން ގެއްލިފައިވާ ކަހަލައެވެ.
އޭ މާތްނަބިއްޔާ ﷺ އުއްމަތުގެ ފިރިހެންތަކުންނޭވެ! މިއަދު ތިޔަބައިމީހުން އެނަބިއްޔާގެ އުއްމަތް ނިކަމެތިކޮށްލާފައި، މާދަމާގޮސް އެކަލޭގެފާނާއި ބައްދަލުކުރާނީ ކޮންމޫނަކާއިގެން ހެއްޔެވެ؟ އެކަލޭގެފާނު މާދަމާ (( އުއްމަތީ، އުއްމަތީ )) އޭ ގޮވާއިރު ތިޔަބައިމީހުނަށް އެރަޙުމަތް ލިބޭނެހެއްޔެވެ؟ ނުވަތަ ތިޔަބައިމީހުން ވާހުށީ އެކަލޭގެފާނާއި ދުރަށް ފަހާލެވޭ މީހުންކަމުގައި ހެއްޔެވެ؟
