އަމީރު ޢުޘްމާން އަލް ޣާމިދީ (1)
ތަރުޖަމާ: އަބޫ މުސްޢަބް (جزاك الله خير)
އެހެން ޒުވާނުންނެކޭ އެއްފަދައިން، އަހަރެންނަކީވެސް، މި އަގެއްނެތް ދުނިޔޭގައި، ދިރިއުޅުމެއް ހޯދުމަށް، ފައިސާ އެއްކުރުމަށް މަސައްކަތް ކުރަމުން ދިޔަ މީހަކީމެވެ. ހައި ސްކޫލް ނިންމުމަށް ފަހު، ނޭވީއާ ގުޅުނީމެވެ. ނޭވީގައި ދެއަހަރު ހޭދަކުރީމެވެ. އިސްލާމީ އުއްމަތަށް ވަމުންދާ ގޮތުގެ އެއްވެސް ފިކުރެއް ނެތިއެވެ. ހަމައެކަނި ދަރަނިވެރި ނުވެ، އުޅެވޭ ވަރަށް ފައިސާ އެއްކުރުމުގެ ޚިޔާލުގައެވެ. ނަމަވެސް އަހަރެން ހުރީ ހިތްހަމަ ޖެހިފައެއް ނޫނެވެ. އަމިއްލަ ނަފްސުގެ ތެރޭގައި، ކޯޅުން ގަނޑެއް އުފެދެން ފެށިއެވެ. ﷲ ތަޢާލާ އަހަރެންނަށް ހިދާޔަތު ދެއްކެވި ދުވަހާ ޖެހެންދެނެވެ. އެހިނދުން އަހަރެން އަހަރެންގެ މަސައްކަތް ހުއްޓާލުމަށް ފަހު، މިސްކިތުގައި ގިނަ ވަގުތު ހޭދަކުރަން ފެށީމެވެ.
އޭގެ ކުރިން އެ ވީ ހުރިހާ ދުވަހެއްގައި، އުއްމަތަށްޓަކައި އަހަރެންނަށް ނުކޮށްދެވި ހުރި ހެޔޮ ކަންކަން ކުރެވެން ހުރި ފުރުޞަތުތައް ހޯދުމަށް އަހަރެން މަސައްކަތް ކުރީމެވެ. އެހެނަސް އަހަރެންނަށް ކުރެވޭ މިންވަރު ފުދޭ ކަމަކަށް ނުފެނުނެވެ. މުސްލިމް އުއްމަތަށް ބޭނުންވަނީ ހަމައެކަނި، ޔަތީމުންނާއި، ހުވަފަތްވެފައިވާ އަންހެނުންނަށް މާލީ ގޮތުން އެހީތެރިކަން ދޭނެ ބައެއް ނޫނެވެ. އޭގެ އިތުރުން، އުއްމަތަށް ބޭނުންވަނީ، އެއުއްމަތް ވަށައިގެން ޙަމަލާ ދެމުންދާ ޢަދުއްވުންގެ ކިބައިން ރައްކާތެރިކޮށްދޭނެ ބައެކެވެ. އުއްމަތުގެ ފުން ޒަޚަމްތަކަށް ފަރުވާދޭނެ ބައެކެވެ. އަދި އެކަން ކުރެވޭނީ ޖިހާދާއި، އެކަމަށް ތައްޔާރުވުމުންކަން ވެސް އަހަރެންނަށް އެނގިގެން ދިޔައެވެ. އަފްޣާނިސްތާނުގެ އިސްލާމީ ޢިމާރާތަށް ދިއުމަށް އަހަރެން ނިންމީ އެހިނދުންނެވެ. އެއީ ޠާލިބާންގެ ވެރިކަމުގެ ދަށުގައި ތިބި މުޖާހިދުންގެ ބިމެވެ. އެތަނަށް ގޮސްގެން އަހަރެންނަށް ބޭނުންވާނެ ތަމްރީނުތައްވެސް ލިބޭނެއެވެ. ނަމަވެސް އަހަރެންނަށް ދަތުރުކުރެވޭ ކަށް ނެތެވެ. އެހެނީ ޚާއްޞަ ހުއްދައެއް ހޯދައިގެން މެނުވީ އެއްވެސް ޢަސްކަރީ މީހަކަށް ޤައުމުން ބޭރަށް ދެވޭކަށް ނޯވެއެވެ. އަދި އެކަން ކުރުމަށް ވަރަށް ދިގު އުނދަގޫ ޕްރޮސީޖަރ ތަކެއް އެކުލެވިގެން ވެއެވެ. އެހެންކަމުން ޑިއުޓީން ވަކިވުމަށް މަސައްކަތް ކުރީމެވެ. ނަމަވެސް ދަތުރަށް ފައިސާ ބޭނުންވާތީ އެކަންވެސް އެގޮތަށް ކުރެވޭ ގޮތެއް ނުވިއެވެ. އެހެންކަމުން، ޤައުމުން ބޭރުވުމަށް ޓަކައި އިތުރު ގޮތްތައް ފެނޭތޯ މަސައްކަތް ކުރީމެވެ. އަޞްލުނޫން ޕާސްޕޯރޓެއް ހޯދޭތޯވެސް މަސައްކަތް ކުރީމެވެ. ނަމަވެސް ލިބޭ ގޮތެއް ނުވިއެވެ. ކަންކަން ފަސޭހަކޮށްދެއްވާތޯ ﷲ ގެ ޙަޟްރަތަށް އަހަރެން ދުޢާކުރީމެވެ. އެ ހިނދު އަހަރެންނަށް އަޞްލުނޫން ޕާސްޕޯރޓަކާއި. އޭގެ އިތުރުން ދަތުރަށް ބޭނުންވާ ފައިސާ ހޯދައިދޭނެ އަޚެއް ފެނުނެވެ. ސުންގަޑި އަތުވެއްޖެއެވެ. އަހަރެންގެ ޢާއިލާއަށް ސަލާމްކުރީ، ދާން އުޅޭ ވަކި މަންޒިލެއް ނުބުނެއެވެ. ކަރާޗީއަށް ފުރުމުގެ ކުރިން، ޤައުމު ތެރޭގެ ބައެއް އެއަރޕޯރޓްތަކުން ދުތުރުކުރީމެވެ. އެއަށްފަހު، ބަޙްރައިނާއި ދޯހާއަށް ވެސް ޖެއްސުމަށްފަހު، ކަރާޗީއަށް ދަތުރު ފެށީމެވެ. ﷲ سبحانه وتعالىގެ މަދަދާއެކު، އެންމެ ދަތި އުނދަގޫ ހުރަސްތައްވެސް މުޖާހިދުންނަށް ފޫއަޅުވާލެވެއެވެ. އަހަރެމެން ﷲ (سبحانه وتعالى) އަށް ވަކީލުކުރަން ޖެހެއެވެ. ކަރާޗީއަށް ދެވުމާއެކު ޓެކްސީއެއްގައި ކައިރީގައި ހުރި ހޮޓެލަކަށް ދިޔައީމެވެ. އެރޭ މަޑުކުރީ އެތަނުގައެވެ. ޖެހިގެން އައި ދުވަހު، ކޯރޑިނޭޓަރަށް ގުޅީމެވެ. އަދި އަހަރެން އައިކަން އެންގީމެވެ. އޭގެ އިރުކޮޅެއް ފަހުން، ރިސެޕްޝަނުން ގުޅިއެވެ. އަދި އަހަރެން ހޯދަން މީހަކު އައިސް ހުރި ވާހަކަ ބުންޏެވެ. އަހަރެންގެ ސާމާނުތައް ހިފައިގެން ނުކުމެ، އެ އަޚާއަށް ބައްދަލުކުރީމެވެ. އެ އަޚާ އައީ ޓެކްސީއެއްގައެވެ. އެއީ ޢަރަބި އަޚެކެވެ. ކަނޑައެޅިފައިވާ ކޯޑު ބަސްތައް ދެކޮޅުންވެސް ބަދަލުކުރެވުމަށް ފަހު، އޭނާއާ އެކު ދަތުރު ފެށީމެވެ. އަޚުންގެ އިންތިޒާމުތަކާއި، ދަތުރުފަތުރާއި، މުވާޞަލާތީ ގުޅުންތަކާއި، އެކަކު އަނެކަކުގެ މެދުގައިވާ ގުޅުން ފެނިފައި އަހަރެން ހުރީ ވަރަށް ގަޔާވެފައެވެ. އަހަރެމެންނަށް އާ ޕާސްޕޯރޓްވެސް ހޯދައިދިނެވެ. ހީވަނީ އެބައިމީހުންނަކީ ދައުލަތުގެ ތެރޭގައިވާ ވަކި ދައުލަތެއް ހެންނެވެ. އެންމެ ގަޔާވި ކަމަކީ އެބައިމީހުންނަކީ އެއްވެސް މުސާރައެއްވެސް ނުލިބޭ، އަމިއްލައަށް ފެނިގެން އެކަން ކުރާ މީހުންނަށް ވީއިރުވެސް، އެބައިމީހުންގެ މަސައްކަތަށް އެބައިމީހުން ދޭ އަހައްމިޔަތުކަމެވެ. އަހަރެމެން ގެސްޓް ހައުސަށް ދިޔަ މަގުމަތީގައި، ކޮންމެ ފުރުޞަތެއްގައިވެސް އަހަރެންނަށް މަރުޙަބާކިޔޭތޯ އެއަޚާ މަސައްކަތް ކުރަމުން ދިޔައެވެ. ގެސްޓް ހައުސަށް ވަދެވުނުއިރު، އެތަނުގައި އެކި ޤައުމުތަކުގެ މީހުން ފެނުނެވެ. އެއިން ކޮންމެ އަޚެއްގެ ވެސް މޫނުމަތިން ހިނިތުންވުން ފާޅުވާޙާލު އަހަރެންނަށް މަރުޙަބާ ކިއެވެ. މިހުރިހާ އަޚުންވެސް އައީ ހަމަ އެއް މަޤްޞަދަކަށެވެ. އެއީ އިސްލާމް ދީނަށް ޚިދުމަތްކޮށްދިނުމެވެ. އަދި އެއިން ކޮންމެ އަޚެއްގެވެސް އަމިއްލަ ޕްރޮގްރާމަކާއި، މަންޒިލެއް ކުރިމަތީގައި އޮވެއެވެ. އެތަނުން ކޮޓަރިއެއްގައި އަހަރެންގެ ދަބަސްތައް ބެހެއްޓުމަށްފަހު، އެ ގެސްޓް ހައުސްގެ އަމީރާ ބައްދަލުކުރީމެވެ. އަހަރެންގެ ޢާއިލާއަށް ގުޅައި، ސަލާމަތްތެރިކަމާއެކު އާދެވުނު ވާހަކަ ބުނަން، އަމީރު ބުންޏެވެ. އެރޭ ގެސްޓް ހައުސްގައި ވަގުތު ހޭދަކުރުމަށްފަހު، އަނެއް ދުވަހު އަފްޣާނިސްތާނަށް ދިއުމަށް ތައްޔާރީތައް ވީމެވެ. ކަރާޗީ އެއަރޕޯރޓުން ފުރައިގެން، އަފްޣާނިސްތާނާ ގުޅޭ ބޯޑަރުގައި ހުންނަ ކުއެޓާ އެއަރޕޯރޓަށް ދިޔައީމެވެ. އެތަނުން ޓެކްސީއަކަށް އަރައިގެން ދިޔައީ އަފްޣާނިސްތާނުގެ އިސްލާމީ ޢިމާރާތުގެ ވެރިރަށް ކަމަށްވާ ކަންދަހާރަށެވެ. ޕާކިސްތާނުގެ ބޯޑަރު ހުރަސްކުރިއިރު، އަހަރެމެން ﷲ (سبحانه وتعالى) އަށް ސަޖިދަކުރީމެވެ. އެއީ އަހަރެމެން އަފްޣާނިސްތާނާ ހަމައަށް ފޯރުކޮށްދެއްވި ކަމަށްޓަކައެވެ. އަހަރެމެންނަށް ކަންދަހާރަށް ދެވުނުއިރު އަހަރެމެންނަށް މަރުޙަބާ ކީ ޠާލިބާނުގެ އަޚުންނެވެ. އެބައިމީހުން ތަކުރާރުކޮށް ކިޔަމުން ދިޔައެވެ. [ތިޔަބައިމިހުންނަކި ޢަރަބީންނެވެ. އަދި ﷲ އަށް ޓަކައި އަހަރެމެން ތިޔަބައިމީހުން ދެކެ ލޯބިވަމެވެ.] ދެން އަހަރެމެން ގެންދެވުނީ އަލަށް އަންނަ މިހުންގެ ގެސްޓް ހައުސަށެވެ. އަހަރެމެންނަށް އެތަނަށް ދެވުނީ އިރުއޮއްސުނު ގަޑީގައެވެ. އަދި އެރޭ އަހަރެން ހޭދަކުރީ މީސްތަކުންގެ ތެރެއިން އެންމެ ހެޔޮ މީހުންނާ އެކުގައެވެ. (ނުނިމޭ)
www.haqqubooks.com
ކުރީގެ ކުލިކްފޯއިސްލާމް ވެބްސައިޓްގެ ލިޔުމެއް
Click4islam
