އޭ މުސްލިމް އުއްމަތެވެ. ފަހެ ތިބާއަށް ނިސްބަތްވާ ފިރިހެންދަރީންތަކެއް ޣައްޒާގައި ފިޔަވައި ނެތީހެއްޔެވެ؟
ނަޞްރަށް އެދި ރޮއެ އާދޭސްކުރާއިރު، ބީރު މަންމަން ކަނު ބަޔަކުފަދައިން ވަނީ ހެއްޔެވެ؟ ފަހެ ތިބާގެ ހިތަކީ ގާވެފައިވާ ހިލަހިތަކީ ހެއްޔެވެ؟
ތުއްތު އެތަކެއް ޅަދަރިންގެ ވޭނާ ކެކުޅުމުގެ އުދާސްތަކަށް ބީރުކަންފަތެއްދޭއިރު، އެއީ ތިބާގެ ލޯބިވާ ދަރިފުޅުގެ ރުއިންކަމުގައިވާނަމަ ހުންނާނީ ހަމަ ތިޔަގޮތަށް ކުޅިބަލަން ހެއްޔެވެ؟
ޢިމާރަތުގެ ދަށުގައިވަނީ ތިބާގެ އަނބިމީހާއާއި އެއްބަނޑު ތިމާގެ މީހުންކަމުގައިވާނަމަ ތިބާގެ ޙަރަކާތްތައް ހުންނާނީ ތިޔަފަދައިން ހެއްޔެވެ؟ ފަހެ ތިބާގެ ނަފްސަށް ތިބާގެ ދަރީންނަށް އަމާންކަން އެދޭފަދައިން ޣައްޒާގެ އަޚުންނާއި ޅަދަރިންނަށްވެސް އަމާންކަން ލިބުމަށް އެދެފުމަށް ދާންދެން އީމާންކަން ފުރިހަމަނުވެއެވެ. ރަސޫލާ ﷺ ޙަދީޘްކުރެއްވިއެވެ.:
((އޭނާގެ ނަފްސަށް ލޯބިކުރާ ކަންތައް، އޭނާގެ އަޚާއަށް (ލިބުމަށް) އެދެފުމަށް ދާންދެން ތިޔަބައިމީހުންކުރެ އެކަކުވެސް އީމާންވިކަމުގައި ނުވެއެވެ.))
(ބުޚާރީ އަދި މުސްލިމް)
ވީއިރު ތިބާގެ އީމާންކަން ކޮބައިތޯ ނަފްސާއި ސުވާލުނުކުރާނަންހެއްޔެވެ؟
