ޚަލީފާ واثق با الله ގެ ވިސްނުންފުޅު
އެއްދުވަހަކު ޢައްބާސީ ޚަލީފާ واثق با الله ގެ ދަރުބާރުގައި މީހަކު ކޮޅަށް ތެދުވެ ދެންނެވިއެވެ. [އޭ މުއުމިނުންގެ އަމީރެވެ! ރަޙިމުގެ ގުޅުން ދަމަހައްޓަވާށެވެ! މަނިކުފާނުގެ ގާތްތިމާގެ މީހުންނަށް ހެޔޮކޮށް ހިތްތަވާށެވެ! މަނިކުފާނުގެ ޚާންދާނުގެ މީހާއަށް ހެޔޮކޮށް ކަންތައްކުރައްވައި މަދަދުކުރައްވާށެވެ!]
واثق با الله ސުވާލުކުރެއްވިއެވެ. [ކަލެއަކީ ކާކު ހެއްޔެވެ؟ ކަލެއަކީ ކާކުކަމެއް ތިމަންނައަކަށް ނޭގެއެވެ. އަދި މީގެކުރިއަކުން ތިމަންނައަކަށް ކަލޭ ފެނިފައެއްވެސްނުވެއެވެ.]
އޭނާ ދެންނެވިއެވެ. [ސާހިބާއެވެ! އަޅުގަނޑަކީ މަނިކުފާނުގެ ކާފާފުޅު آدم عليه السلام ގެ ދަރިއަކީމެވެ.]
واثق با الله އެމަނިކުފާނުގެ އަޅަކަށް ގޮވައިލެއްވުމަށް ފަހު އަމުރުކުރެއްވިއެވެ. [އޭނާއަށް އެއްދިރުހަމު ދޭށެވެ!]
އެމީހާ ދެންނެވިއެވެ. [އަމީރުލްމުއުމިނީނެވެ! ތިޔައިން އަޅުގަނޑަށް ކުރެވޭނީ ކޮންކަމެއްތޯއެވެ؟]
واثق با الله ޖަވާބު ދެއްވިއެވެ. [ދެކޭށެވެ! އަހަރެން ކަލެއަށް އެއްދިރުހަމު ދީފީމެވެ. ތިމަން، ތިމަންގެ ކާފަގެ ހުރިހާ ދަރިންގެ މެދުގައި ބައިތުލްމާލު ބަހައިފިނަމަ ކަލެއަށް ގޮދަން އޮއްޓަރެއްގެ މިންވަރުވެސް ނުލިބޭނެއެވެ.]
އެމީހާ ދެންނެވިއެވެ. [އަމީރުލްމުއުމިނީނެވެ! ﷲ ތަޢާލާ، މަނިކުފާނު ހެޔޮކަމާއި ސަލާމަތްކަންމަތީ ލަހައްޓަވާށިއެވެ! މަނިކުފާނު ވަރަށް ވިސްނުންފުޅު ތޫނެވެ.]
واثق با الله ، އެމީހާއަށް އިތުރަށް ހަދިޔާބަދިޔާ ދިނުމަށް އަމުރުކުރެއްވިއެވެ. ދެން އެމީހާ ރަސްގެފާނަށް ހެޔޮދުޢާތައް ކުރަމުން ދަރުބާރުންނުކުމެގެން ދިޔައެވެ.
******
މަޞްދަރު: سنہرے اوراق / عبد المالك مجاهد
